உடனே ரிசல்ட் காட்டும் நெகடிவ் கலோரி உணவுகள்... எடையை குறைக்க நீங்கள் சாப்பிட வேண்டியவை..!

எடை குறைப்பு முயற்சியில் இருப்பவர்கள் தினசரி தங்கள் கலோரி உட்கொள்ளல் அளவைக் கணக்கிடுவது அவசியமாகிறது. ஏனென்றால் வழக்கமான கலோரி நுகர்வு உடல் பருமன் மற்றும் கொழுப்பு சேமிப்புடன் நேரடியாக தொடர்புடையது.

மேலும் வளர்சிதை மாற்றத்தையும் மெதுவாக்கும்.எனினும் பரபரப்பான வாழ்க்கை முறைக்கு மத்தியில் கலோரி நுகர்வில் கவனம் செலுத்துவது சவாலாக இருக்கலாம். இதனை சமாளிக்க நெகட்டிவ் கலோரி உணவுகளை சாப்பிட பரிந்துரைக்கிறார்கள் நிபுணர்கள். இந்த உணவுகளை சாப்பிடுவதால் கலோரி நுகர்வு பற்றி கவலை தேவையில்லை.

நெகட்டிவ் கலோரி உணவுகள் என்றால் என்ன.? எடையை குறைக்க உதவும் குறைந்த கலோரி உணவுகளை பற்றி நாம் கேள்விப்பட்டிருப்போம். நெகட்டிவ் கலோரி உணவுகளை பற்றி வெகுசிலரே கேள்விப்பட்டிருப்பார்கள். இந்த உணவுகளை உண்ட பின் செரிமானிக்க  உடலுக்கு தேவைப்படும் ஆற்றலை விட  அந்த சத்துக்களை உறிஞ்சுவதற்கு உடல்  அதிக ஆற்றலை எடுத்துக்கொள்ளும். அந்த உணவுகளே நெகட்டிவ் கலோரி உணவுகள் ஆகும். இந்த டயட்டின் போது எடுத்து கொள்ளும் உணவுகள் ஜீரணமாகும் போது கலோரிகளையும் சேர்த்து எரிப்பதால் எடை இழப்பிற்கு பெரிதும் உதவுகிறது. ஜீரணிக்க அதிக கலோரிகளை எரிக்கும் என்பதால் எடை இழப்புக்கு நெகட்டிவ் கலோரி உணவுகள் பயனுள்ளதாக இருக்கும் என்கிறார்கள் நிபுணர்கள். உடல் எடையை குறைக்க உதவும் நெகட்டிவ் கலோரி உணவுகள் இங்கே..

லெட்டூஸ் கீரை (Lettuce) : உங்கள் சாலட்களில் கொஞ்சம் லெட்டூஸ் கீரைகளை சேர்ப்பது ஆரோக்கியத்திற்கு நல்லது. இதில் நல்ல அளவு ஃபைபர் சத்து, ஃபோலிக் ஆசிட் மற்றும் வைட்டமின் பி உள்ளிட்ட பல ஊட்டச்சத்துக்களை நம்பமுடியாத அளவிற்கு கொண்டுள்ளது. அதே நேரத்தில் 100 கிராமுக்கு 15 என்ற குறைந்த கலோரியை கொண்டுள்ளது.

வெள்ளரி : வெள்ளரிகள் அதிக அளவு ஹைட்ரேடிங் மற்றும் மினரல்ஸ், வைட்டமின்ஸ் மற்றும் எலக்ட்ரோலைட்ஸ்கள் அதிகம் உள்ளன. கோடை மற்றும் வெப்பம் மிகுந்த நாட்களில் இது உடலுக்கு குளிர்ச்சியை தரும் உணவாக இருக்கிறது. உடலின் வாட்டர் பேலன்ஸை மேம்படுத்த வெள்ளரிகள் உதவுகின்றன. இதில் 100 கிராமுக்கு 16 கலோரிகள் உள்ளன.

ஆப்பிள் : ஆப்பிள்களில் 100 கிராமுக்கு தோராயமாக 50 கலோரிகள் இருக்கின்றன. மேலும் இதில் நார்ச்சத்து நிறைந்துள்ளது. ஆப்பிள்களில் ஏராளமாக நிறைந்திருக்கும் pectin, எடை குறைப்பை ஊக்குவிக்கும் ஒரு வகையான கரையக்கூடிய நார்ச்சத்து ஆகும். மேலும் இது படிப்படியாக சர்க்கரையை வெளியிடுகிறது மற்றும் ரத்த சர்க்கரை அளவை சமப்படுத்த உதவுகிறது.

சுரைக்காய் : சுரைக்காயில் 100 கிராமுக்கு 18 கலோரிகள் மட்டுமே உள்ளது. இதிலிருக்கும் பைட்டோநியூட்ரியண்ட்ஸ் மற்றும் நார்ச்சத்து சீரான குடல் இயக்கம் மற்றும் உடலின் நீர் சமநிலைக்கு உதவுகிறது. இது எடை இழப்புக்கு சிறந்த உணவு தேர்வாக இருக்கிறது.

தக்காளி : தக்காளியில் 100 கிராமுக்கு 19 கலோரிகள் மட்டுமே உள்ளன. சுவையாக இருப்பதுடன் கூடுதலாக பொட்டாசியம், வைட்டமின் சி மற்றும் நார்ச்சத்து உள்ளிட்ட பல ஊட்டச்சத்துக்களின் சிறந்த மூலமாகும். மேலும் இதில் உள்ள ஆன்டிஆக்ஸிடன்ட்ஸ் பல புற்றுநோய்களில் இருந்து நம்மை காக்கும்.

ப்ரோக்கோலி : 100 கிராமுக்கு 34 கலோரிகள் மட்டுமே இருப்பதால் ப்ரோக்கோலி ஒரு சூப்பர்ஃபுட் என்று கருதப்படுகிறது. இதில் ஃபைபர் சத்து மற்றும் ஆன்டி-ஆக்ஸிடன்ட்ஸ் அதிகம் உள்ளது. மேலும் இது புற்றுநோய்க்கு எதிரான குணங்களைக் கொண்டிருப்பதாக ஆராய்ச்சியில் கண்டறியப்பட்டுள்ளது.

கேரட் : 100 கிராம் கேரட்டில் சுமார் 41 கலோரிகள் உள்ளன. இவற்றில் கொலஸ்ட்ரால் மற்றும் நிறைவுற்ற கொழுப்புகள் குறைவாக உள்ளன. வைட்டமின்கள் ஏ, சி மற்றும் கே ஆகியவற்றுடன் கூடுதலாக உணவு நார்ச்சத்துக்கான அற்புதமான மூலமாக கேரட்கள் இருக்கின்றன.