ஒர்க் அவுட் செய்த பின் என்ன சாப்பிடுவது என குழப்பமா..? உங்களுக்கான உணவுப்பட்டியல் இதோ..!

உடலை கட்டுக்கோப்பாக வைத்துக் கொள்வதற்காக, உடல் ஆரோக்கியத்திற்காக, உடல் எடையை குறைப்பதற்காக என ஏதோ ஒரு நோக்கத்தில் நீங்கள் கடினமான உடற்பயிற்சிகளை செய்பவராக இருக்கலாம். எப்படியும் பயிற்சி முடித்த கையோடு வயிறு கபகபவென்று பசியெடுக்க தொடங்கி விடும். இந்த சமயத்தில் நாம் இலக்குகளை மறந்துவிட்டு, மனம் போன போக்கில் இஷ்டப்பட்ட உணவுகளை ஒரு பிடி, பிடித்தோம் என்றால் நம்முடைய கடின பயிற்சி மொத்தமும் வீணாகிவிடும்.

எந்த நோக்கத்திற்காக பயிற்சி செய்தோமோ அந்தப் பலன் கிடைக்காமல் போகலாம். அதே சமயம், ஆற்றலை இழந்து நிற்கும் உடலுக்கு புத்துணர்ச்சி ஊட்டுவது அவசியம். தசை வலிமை அடையவும், புத்தாற்றல் கிடைக்கவும் இது அவசியமாகும். நாம் எடுத்துக் கொள்ளும் உணவு புரதச்சத்து நிறைந்ததாக, கொழுப்புகளை எரிக்கக் கூடியதாக இருக்க வேண்டும்.

இளநீர் மற்றும் முருங்கை பவுடர் : இளநீரில் பொட்டாசியம் மற்றும் மெக்னீசியம் ஆகிய எலெக்ட்ரோலைட்டுகள் உள்ளன. முருங்கை பவுடரில் தாவர புரதம் மிகுதியாக உள்ளது மற்றும் அனைத்து 18 வகை அமிலோ அமிலங்களை கொண்டது. நீண்ட பயிற்சிக்குப் பிறகு நம் உடலுக்குத் தேவையான சத்துக்களை இவை இரண்டும் வழங்கும்.

பீட்ரூட் ஜூஸ் : பீட்ரூட்டில் நைட்ரிக் ஆசிட் உள்ளது. இது உடலெங்கும் ஆக்ஸிஜன் விநியோகத்தை துரிதப்படுத்தும் மற்றும் அழற்சியை குறைக்கும். உயர் ரத்த அழுத்தப் பிரச்சினையால் அவதி அடையும் நபர்கள் நிச்சயமாக பீட்ரூட் ஜூஸ் அருந்தலாம்.

மோர் : புரதம் மற்றும் மாவுச்சத்து இணைந்த பானம் இது. பயிற்சி நிறைவு செய்த பிறகு எடுத்துக் கொள்வதற்கு மிக கச்சிதமான பானம் என்றே சொல்லலாம். ஒரு கிளாஸ் அளவு மோர் எடுத்துக் கொண்டால் உங்களுக்கு 8 கிராம் அளவுக்கு புரதம் கிடைக்கும். மோரில் நல்ல பாக்டீரியா நிரம்பியிருக்கும். அது உங்கள் குடல் நலனுக்கு நல்லது.

முட்டை : மிக அபரிமிதமான புரதச்சத்து முட்டையில் உள்ளது. சராசரியாக ஒரு முட்டையில் 6 முதல் 8 கிராம் அளவுக்கு புரதம் உள்ளது. முட்டையை அவித்து எடுத்துக் கொள்வது மிகுந்த பலனை தரும். கொலஸ்ட்ராலை தவிர்க்க மஞ்சள் கருவை நீக்கிவிட்டு சாப்பிடலாம்.

வேக வைத்த கொண்டக்கடலை : கொண்டக்கடலை புரதச்சத்தின் புதையல் என்றே சொல்லலாம். இது தவிர விட்டமின்கள், மினரல்கள் போன்றவையும் இதில் உண்டு. ரத்தச்சோகை பிரச்சினையால் அவதி அடையும் நபர்களுக்கு தேவையான இரும்புச்சத்து இதில் கிடைக்கும். ஒரு பவுல் கொண்டக்கடலையில் 7 கிராம் புரதம் கிடைக்கும்.

கடலை மாவு ஷேக் : இயற்கையான புரதச்சத்து இந்த கடலை மாவு ஷேக் மூலமாக கிடைக்கும். 2 டேபிள்ஸ்பூன் அளவுக்கு கடலைமாவு எடுத்து, தண்ணீரில் கொதிக்க வைத்து நாட்டுச் சர்க்கரை அல்லது பனங்கற்கண்டு சேர்த்து சாப்பிடலாம். இந்தக் கலவையில் 7 கிராம் அளவுக்கு புரதம் கிடைக்கும்.

பன்னீர் : வீட்டிலேயே தயார் செய்யப்படும் பன்னீர் மிகுந்த ஆற்றலை நீண்ட நேரத்திற்கு கொடுக்கும். குறிப்பாக பசி உணர்வை கட்டுப்படுத்தும். 100 கிராம் அளவிலான பன்னீர் எடுத்துக் கொண்டால், அதில் 18 கிராம் அளவுக்கு புரதச்சத்து கிடைக்கும். இது மட்டுமல்லாமல் எலும்புகளுக்கு வலுவூட்டக் கூடிய கால்சியம் மற்றும் பாஸ்பரஸ் ஆகிய சத்துக்கள் பன்னீரில் உள்ளன.