பால் மற்றும் பால் சார்ந்த உணவுப் பொருட்களை டயட்டிலிருந்து முற்றிலும் நீக்குவது நல்லதா..?

இந்தியர்களைப் பொருத்தவரை பால் இல்லாத வாழ்க்கை முறை என்பது சற்று கடினம்தான். ‘பால் குடிப்பது நம்மை வலிமையாக்கும்’ என்று பெரியவர்களிடம் கேட்டு நாம் அனைவரும் வளர்ந்திருக்கிறோம், ஆனால் அது உண்மையா? இன்றைய சூழலில் பலர் ஆரோக்கியமான வாழ்க்கை முறை என்று கூறி பால் மற்றும் அதன் தொடர்புடைய பொருட்களை விலக்கி வைத்துள்ளனர். உண்மையில் இது ஆரோக்கியமான போக்குதானா..? அதனால் நன்மைகள் உண்டா..? பாலை நம் அன்றாட வழக்கத்திலிருந்து தவிர்ப்பதால் ஏற்படும் நன்மைகள், லாக்டோஸ் இல்லாத உணவுகளிலிருந்து அதன் வேறுபாடு என்ன என பலவற்றை அலசுகிறது இந்த கட்டுரை.

லாக்டோஸ் என்பது பால் பொருட்களில் காணப்படும் இயற்கையான சர்க்கரையாகும். மேலும் 'லாக்டோஸ் இல்லாதது' என்பது உற்பத்தி செயல்பாட்டின் போது லாக்டோஸ் கூறு அகற்றப்படுவதை குறிக்கிறது. டெய்ரி-ஃப்ரீ என்ற சொல்லுக்கு பால் பொருட்கள் இல்லாத அனைத்தையும் குறிக்கிறது

உடல் பருமன் கட்டுப்படும் : பாலாடைக்கட்டி, சுவையூட்டப்பட்ட தயிர் மற்றும் ஐஸ்கிரீம் போன்ற பெரும்பாலான பால் பொருட்களில் அதிக அளவு நிறைவுற்ற கொழுப்பு மற்றும் சர்க்கரை இருப்பதால், பால் இல்லாத உணவை ஏற்றுக்கொள்வது எடை இழப்புக்கான வாய்ப்புகளை அதிகரிக்கும். அதிக அளவு சர்க்கரை மற்றும் நிறைவுற்ற கொழுப்பு ஆகியவை உடல் பருமன் மற்றும் அழற்சியின் அபாயத்தை அதிகரிக்கும். பால் இல்லாத உணவை நீங்கள் எடுக்க ஆரம்பித்தால், ஒரு வாரத்தில் உங்கள் உடலில் உள்ள வித்தியாசத்தைக் காணலாம்.

ஆரோக்கியமான வயிறு : பால் , மலச்சிக்கல், வாயு, வயிற்றுப்போக்கு மற்றும் வீக்கம் போன்ற பல்வேறு வயிற்றுப் பிரச்சனைகளை உருவாக்குவதால் பெரும்பாலும் இதை தவிர்க்க விரும்புகின்றனர். ஒரு நபர் பால் இல்லாத உணவைப் பின்பற்றினால் அல்லது பால் சாப்பிடுவதை நிறுத்தினால் வயிறு தொடர்பான அனைத்து பிரச்சனைகளை தவிர்க்க முடியும் என்கின்றனர் நிபுணர்கள்.

முகப்பரு நீங்கும் : பால் பொருட்களை உட்கொள்வது முகப்பரு பாதிப்புக்கு வழிவகுக்கும் என்று பல ஆய்வுகள் நிரூபித்துள்ளன. இது கால்நடை பாலில் உள்ள வளர்ச்சி ஹார்மோன்கள் காரணமாக இருக்கலாம். ஆனால், ஒரு நபர் பால் மற்றும் அது தொடர்புடைய பொருட்களை உட்கொள்வதை நிறுத்தினால், தோல், முகப்பரு அல்லது பருக்கள் இல்லாமல் புத்துணர்ச்சியுடனும், பொலிவோடும் தோற்றமளிக்கும்.

உதடு வறட்சி : பால் பொருட்களால் சிலருக்கு வாய்/உதடு அரிப்பு மற்றும் வாந்தி போன்ற ஒவ்வாமை ஏற்படுகிறது. இது வலியை உண்டாக்கும். இத்தகைய ஒவ்வாமைகளைத் தவிர்க்க வேண்டுமெனில், பாலை தவிர்ப்பதும், தாவர அடிப்படையிலான பால் மற்றும் அது தொடர்புடைய பொருட்களை உணவில் எடுத்துக்கொள்வது எப்போதும் சிறந்தது.

பிஹெச் அளவு சமன்படும் : பால் என்பது ஒரு அமிலத்தை உருவாக்கும் பொருளாகும். இது நமது குடலின் pH சமநிலையின்மையை உண்டாக்கி அமிலத்தன்மையை அதிகரிக்கிறது. அது உணவுக்குழாய் வரை சென்று அமில வீக்கத்தை உண்டாக்கும். மேலும், பால் தயாரிப்புகளை நீண்ட காலத்திற்கு உட்கொள்ளும்போது, அது காஸ்ட்ரோ-உணவுக்குழாய் ரிஃப்ளக்ஸ் நோய்க்கு (GERD) வழிவகுக்கும், இது உடலுக்கு ஆபத்தானது. ஒரு நபர் பால் பொருட்களை உட்கொள்வதை நிறுத்தும்போது, ​​உடலின் pH அளவு சமநிலையில் இருக்கும். மேலும் ஆபத்தான நோய்களின் அபாயத்தை தடுக்கலாம்.

பாலை நீங்கள் தவிர்க்க விரும்பினால் தாவர அடிப்படையிலான பாலை தேர்வு செய்யலாம். அதில் பல விருப்பங்கள் உள்ளன. சோயா பால், தேங்காய் பால் முதல் பாதாம் பால் மற்றும் முந்திரி பால், முதலியன, தாவர அடிப்படையிலான பால் பல வகைகளாகும்.

பால் இல்லாத உணவின் நன்மைகள் மகத்தானவை. ஆனால் உங்கள் தினசரி பழக்கத்திலிருந்து முற்றிலும் அகற்றுவது சரியானதல்ல. பாலின் நன்மை , தீமை என்பது ஒவ்வொருவருக்கும் மாறுபடும். ஏனெனில் பால் இல்லாத உணவு பழக்கம் உங்களுக்கு வேலை செய்யுமா இல்லையா என்பதைக் கண்டறிய எந்த வழியும் இல்லை.

உங்கள் உணவில் இருந்து பால் பொருட்களை முற்றிலுமாக நீக்குவது ஆஸ்டியோபோரோசிஸ் மற்றும் தைராய்டு செயலிழப்புக்கான வாய்ப்புகளை அதிகரிக்கும் என்பதையும் நினைவில் கொள்வது அவசியம். எனவே, ஒரு உணவைத் தேர்ந்தெடுக்கும்போதும் அல்லது தவிர்க்கும் போதும், ஊட்டச்சத்து நிபுணர் மற்றும் உணவியல் நிபுணரிடம் பேசுங்கள்.அதுதான் சிறந்த வழி.