30, 40 வயசுலையும் உங்களுக்கு முகப்பருக்கள் வருதா..? இந்த 5 விஷயங்கள்தான் காரணம்..!

ஒவ்வொரு வயதிற்கு ஏற்ப சருமத்தில் மாற்றங்களும் , பிரச்சனைகளும் வரலாம். இது ஹார்மோன் சமநிலையின்மை, ஊட்டச்சத்து குறைபாடு , டயட் அல்லது வேறு ஏதேனும் உடல் நலம் சார்ந்த பிரச்சனைகள் காரணமாக இருக்கலாம். குறிப்பாக பெண்கள் எத்தனை வயதைக் கடந்தாலும் முகப்பருவால் அவஸ்தையை அனுபவிக்கின்றனர். இது முக அழகையே கெடுத்துவிடும். 30, 40 வயதிலும் முகப்பரு என்பது சற்று கடினமான விஷயம்தான். இந்த பருக்கள் ஏன் உண்டாகின்றன. இதற்கு என்ன செய்யலாம் என சரும நிபுணர் அஞ்சால் பந்த் இன்ஸ்டாகிராமில் வீடியோ ஒன்றை வெளியிட்டுள்ளார். அதில் அவர் என்ன குறிப்பிட்டுள்ளார் என்பதை பார்க்கலாம்.

முதலில் அஞ்சால் “ முகப்பருக்கள் என்பது பதின்பருவத்தில்தான் வரும் என்பது பலருடைய தவறான எண்ணமாக இருக்கிறது. 30, 40 வயதிலும் பருக்கள் வரும். குறிப்பாக பெண்களுக்கு இந்த பிரச்சனை அதிகமாக இருக்கும்” என்கிறார். அதற்கு என்னென்ன காரணம் என்பதையும் விளக்குகிறார்.

ஹார்மோன் சமநிலையின்மை : பெண்களுக்கு மாதவிடாய் காரணமாக அடிக்கடி ஹார்மோன் சமநிலையின்மை உண்டாகும். எனவே இதுவே முதல் முக்கிய காரணம்.

மன அழுத்தம் : மன அழுத்தம் வந்துவிட்டாலே எந்த வேலையிலும் ஈடுபாடு காட்ட முடியாது. சரியாக சாப்பிடக் கூட மாட்டோம். இதன் வெளிப்பாடாக சருமத்தில் பருக்களை உண்டாக்கலாம்.

சூரிய வெளிச்சம் : அதிகப்படியா சூரிய வெளிச்சம் சருமத்திற்கு பக்கவிளைவுகளை உண்டாக்கும். எனவே நீங்கள் அதிகமாக வெளியில் வேலை செய்பவர் எனில் பருக்கள் வரலாம்.

உடல் பருமன் , கொழுப்பு அதிகரிப்பு : உடல் பருமன் காரணமாகவோ அல்லது கொழுப்பு அதிகரித்தாலோ அதன் வெளிப்பாடாக பருக்கள் வரலாம்.

பால் மற்றும் சர்க்கரை : நீங்கள் அதிகமாக பால் மற்றும் பால் சார்ந்த பொருட்களை சாப்பிடுகிறீர்கள் அல்லது சர்க்கரை கலந்த உணவுகளை அதிகமாக சாப்பிடுகிறீர்கள் எனில் அது இப்படி பருக்களாக வெளிப்படும்.