Skincare : மழைக்காலத்தில் உங்கள் சருமத்தைப் பாதுகாக்க என்ன செய்ய வேண்டும்..? தயார் நிலையில் இருக்க டிப்ஸ்..!

மழைக்காலம் ஈரப்பதத்தைக் கொண்டு வருகிறது. இது குறிப்பாக சென்சிடிவ் சரும வகைகளை கொண்டவர்களுக்கு தோல் பிரச்சினைகளை ஏற்படுத்தும். கோடைகாலத்தில் பருவமழை பெய்தால் நாம் அனைவரும் மகிழ்வோம். ஆனால் இது சருமத்திற்கு பாதிப்பை ஏற்படுத்தும் என உங்களுக்கு தெரியுமா? மழைக்காலம் ஈரப்பதம் அதிகரிக்கும், இந்த ஈரப்பதம் ஆரோக்கியமான சருமத்தை பாதித்து முகத்தில் பிரேக்அவுட்கள், பருக்கள் போன்றவை ஏற்படுத்தும். இந்த நேரத்தில் தோல் பராமரிப்பு மிகவும் முக்கியமானது. லவ் எர்த் நிறுவனர் பரிதி கோயல், மழைக்காலத்தில் பின்பற்றக்கூடிய தோல் பராமரிப்பு முறைகளை பகிர்ந்துள்ளார். அவை குறித்து இங்கு காண்போம்.

* உங்கள் சருமம் எண்ணெய் பசை சருமமாக இருந்தால், அது முகப்பரு, கட்டிகள், வைட்ஹெட்ஸ் மற்றும் பிளாக்ஹெட்ஸ் ஆகியவற்றிற்கு வழிவகுக்கும். அதனால் மழைக்காலத்தில் எண்ணெய் பசை சேருவதை தவிர்த்து விடுங்கள். இதற்கு கடலை மாவு பயன்படுத்தி தினமும் குளிக்கலாம். எண்ணெய் தன்மை இல்லாத இயற்கை சோப் மற்றும் முகம் கழுவும் பேஸ்வோஷ்களை உபயோகிக்கலாம்.

* ஒவ்வொருவரும் ஒரு வாரத்திற்கு ஒரு முறை அல்லது இரண்டு முறை ஆவி பிடிக்க வேண்டும். இது சரும துளைகளில் இருக்கும் அழுக்குகளை நீக்கி சருமத்தை சுத்தம் செய்து புத்துணர்ச்சியாக்கும்.

* நீங்கள் வழக்கமாக மிஸ்ட் பயன்படுத்துபவராக இருந்தால் மழை காலத்தில் தவிர்த்து விடுங்கள். மிஸ்ட் என்பது சருமத்தை நீரேற்றமாக வைத்து கொள்ள உதவும் டோனர் போன்ற ஒரு சரும பராமரிப்பு தயாரிப்பாகும். இது சருமத்தில் ஒட்டும் தன்மையை ஏற்படுத்துகிறது, மேலும் நீங்கள் நாள் முழுவதும் அசவுகரியமாக இருப்பீர்கள்.

* பயணத்தின் போது எப்போதும் ஒரு பாக்கெட் ஈரமான டிஸ்ஸுவை உங்களுடன் எடுத்துச் செல்லுங்கள், இதனை கொண்டு உங்கள் முகத்தை சுத்தம் செய்யலாம் மற்றும் சருமத்தில் உள்ள மாசு, தூசியையும் அகற்றிவிடலாம்.

* எல்லா நேரங்களிலும் உங்களை நீரேற்றமாக வைத்திருங்கள். உங்கள் சருமம் பளபளப்பாகவும், ஆரோக்கியமாகவும் இருக்க தண்ணீர் தேவை, எனவே நீங்கள் வெளியே செல்லும் போதும் தண்ணீர் பாட்டிலை எடுத்துச் செல்லுங்கள். ஒவ்வொரு நாளும் குறைந்தது 3 லிட்டர் தண்ணீர் குடிக்க வேண்டும்.

* மழை காலத்தில் மாய்ஸ்சரைசர்கள் மற்றும் எண்ணெய் சார்ந்த சீரம் பயன்படுத்துவதைத் தவிர்க்கவும். அதற்கு பதிலாக நீர் சார்ந்த சீரம் மற்றும் ஜெல் சார்ந்த மாய்ஸ்சரைசர்களைத் தேர்வுசெய்து கொள்ளலாம். ஏனெனில் அவை சருமத்தை ஈரப்பதமின்றி வைத்திருக்கும், எண்ணெய் மற்றும் வியர்வையைக் குறைக்கும்.

* உங்களுடன் ஒரு டோனரை எப்போதும் வைத்து கொள்ளுங்கள். இதனை அவ்வப்போது உங்கள் சருமத்தில் பயன்படுத்தலாம் ஆனால் அதை உலர விடாமல் பார்த்துக் கொள்ளுங்கள். உங்கள் சருமத்தை குளிர்விக்க வெள்ளரி மற்றும் புதினா டோனர்களை பயன்படுத்துங்கள்.

* நீங்கள் தினமும் மேக்கப் போட்டு கொள்பவராக இருந்தால் எண்ணெய் அல்லது மாய்ஸ்சரைசர்களைப் பயன்படுத்துவதை தவிர்க்கவும். தேவைப்பட்டால் ஜெல் அடிப்படையிலான மாய்ஸ்சரைசர் அல்லது பிபி கிரீம் பயன்படுத்தவும்.

* சமூக வலைத்தளங்களில் பரவும் ஸ்கின் கேர் டிப்ஸ்களை அடங்கிய DIY வீடியோக்களை பார்த்து அவற்றை அதிகம் பயன்படுத்தாதீர்கள். தக்காளி, எலுமிச்சை போன்றவற்றை உங்கள் சருமத்தில் நேரடியாகப் பயன்படுத்துவது சிலருக்கு கடுமையான பாதிப்புகளை ஏற்படுத்தக்கூடும். முகப்பரு, கருமை போன்ற பிரச்சனைகள் ஏற்பட வாய்ப்புள்ளது என்பதால் கவனமாக இருங்கள்.

* மழைக்காலத்தில் காற்றில் ஈரப்பதம் அதிகமாக இருப்பதால் வியர்வை குறைவாக வெளிப்படும். அதனால் லோஷனை அதிகம் பயன்படுத்துவதை தவிர்க்க வேண்டும். சாப்பிடும் உணவும் சருமத்திலும், உடலிலும் தாக்கத்தை ஏற்படுத்தும். எனவே எண்ணெய்யில் பொறித்த, வறுத்த உணவுகளை அதிகம் சாப்பிடுவதை தவிர்க்க வேண்டும்.

நாம் அனைவருக்கும் வெவ்வேறு தோல் வகைகள் உள்ளன, எனவே அவர்களுக்கு வெவ்வேறு கவனிப்பு தேவைப்படுகிறது. எனவே அடிப்படை விதிகளைப் பின்பற்றினால் மழை காலத்தில் கூட உங்களுக்கு ஒளிரும் ஆரோக்கியமான சருமம் இருக்கும்.