கோடைகால சரும பிரச்சனைகளை சரிசெய்ய உதவும் பேஷியல் ஸ்க்ரப்ஸ்!

கோடை காலத்தில் வியர்வை காரணமாக நமது சருமம் பொலிவிழந்து காணப்படும். இதற்கு சருமத்தில் உள்ள இறந்த செல்களை நீக்குவது அவசியம். சருமத்தை ஸ்க்ரப் செய்வதால் இறந்த செல்களை அகற்றி சருமத்தை பிரகாசமாக்க முடியும் என சரும பாதுகாப்பு நிபுணர் ஷானாஸ் ஹுசைன் விளக்குகிறார். இதுகுறித்து அவர் கூறிய தகவல்களை இங்கு காண்போம்.,

ஸ்க்ரப் செய்வதால் சரும துளைகளில் உள்ள அழுக்குகள், எண்ணெய் பசை, கரும்புள்ளிகள் மற்றும் பருக்கள் வராமல் தடுக்க முடியும். கோடையில், இயற்கையாகவே குளிர்ச்சி தரும் பொருட்களான முல்தானி மெட்டி போன்றவற்றை கொண்டு ஸ்க்ரப் செய்து பயன்படுத்தலாம். முல்தானி மெட்டியுடன் பன்னீர், சந்தனம், பழங்கள், வெள்ளரி, மற்றும் கற்றாழை சேர்த்து சருமத்தில் பயன்படுத்தலாம் என விளக்குகிறார்.

வறண்ட சருமம் உள்ளவர்கள் வாரத்திற்கு ஒரு முறை மட்டும் ஸ்க்ரப் பயன்படுத்த வேண்டும். சருமத்தில் உள்ள தடிப்புகளை தடுக்க இயற்கை கிருமி நாசினிகளான வேம்பு, துளசி, புதினா சேர்த்து கொள்ளலாம்.

சிவப்பு நிற திட்டுகள் அல்லது சொறி போன்ற சரும பிரச்சனை இருப்பவர்கள் ஸ்க்ரப்கள் பயன்படுத்துவதை தவிர்க்கவும். சாதாரண மற்றும் எண்ணெய் சருமம் இருப்பவர்கள் ஸ்க்ரப்களை அடிக்கடி பயன்படுத்தலாம்.

ஓட்ஸ், முட்டை ஸ்க்ரப் : எண்ணெய் பசை சருமம் இருப்பவர்கள் வாரம் ஒரு முறை ஓட்ஸ், முட்டையின் வெள்ளைக்கருவை ஒன்றாக கலந்து சருமத்தில் அப்ளை செய்யலாம். சிறிது நேரம் உலர்ந்த பின்னர் தண்ணீர் கொண்டு வட்ட இயக்கத்தில் மசாஜ் செய்து கழுவவும். முட்டையின் வெள்ளைக்கரு மற்றும் ஓட்ஸ் இரண்டும் எண்ணெய் பசையை குறைக்க உதவுகிறது.

பப்பாளி ஸ்க்ரப் : பப்பாளியுடன் ஓட்ஸ் மற்றும் தயிர் ஆகியவற்றை ஒன்றாக சேர்க்கவும். இந்த கலவையை முகத்தில் தடவி மெதுவாக தேய்த்து, தண்ணீரில் கழுவவும். பப்பாளி சருமத்தில் உள்ள அழுக்குகளை நீக்க உதவுகிறது. பப்பாளியில் பப்பைன் என்ற நொதி உள்ளது, இது இறந்த சரும செல்களை அகற்றி சருமத்தை பிரகாசமாக்க உதவுகிறது.

தயிர், மஞ்சள் தூள் ஸ்க்ரப் : தயிர் மற்றும் சிறிது மஞ்சள் தூள் சேர்த்து பேஸ்டாக கலந்து சருமத்தில் அப்ளை செய்யுங்கள். 10 நிமிடங்கள் அப்படியே விட்டு பின்னர் மெதுவாக தேய்த்து, தண்ணீரில் கழுவவும். வாரம் இரண்டு முறை இப்படி செய்து வந்தால் சருமம் பொலிவாகும்.

பாதாம் , தயிர் ஸ்க்ரப் : பாதாம் பருப்பை ஊறவைத்து அரைத்து எடுத்து கொள்ளவும், இதனுடன் 2 பங்கு தயிர், 1 ஸ்பூன் சந்தனம் எடுத்து கொள்ளவும். பின்னர் இதனுடன் சிறிது மஞ்சள் தூள் சேர்க்கவும். இவற்றை ஒன்றாக கலந்து உடலில் தடவவும். 5 நிமிடங்களுக்கு பிறகு, மெதுவாக தேய்த்து தண்ணீரில் கழுவவும்.

எள், தேன் ஸ்க்ரப் : எள், உலர்ந்த புதினா இலைகள் மற்றும் தேன் ஆகியவற்றை எடுத்து கொள்ளுங்கள். இவற்றை ஒன்றாக அரைத்து கொள்ளவும். அவற்றை சிறிது தேனுடன் கலந்து சருமத்தில் அப்ளை செய்து உலர்ந்த பின்னர் வாஷ் செய்யவும். எள் விதைகள் சூரிய கதிர்களால் ஏற்படும் பாதிப்புகளை சரி செய்ய உதவுகிறது.