வெயில் காலம் என்பதால் தாடியின் அரிப்பு கடுமையாக உள்ளதா..? இதற்கு விடை காண இதோ வழிகள்..!

மேற்குலக நாடுகள், சீனா, தாய்லாந்து போன்ற ஒருசில தெற்காசிய நாடுகளைச் சேர்ந்த ஆண்கள் பெரும்பாலும் தாடி வைத்துக் கொள்ள மாட்டார்கள். தாடி, மீசை அனைத்தையும் க்ளோஸ் ஷேவ் செய்வதே அவர்களின் பழக்கமாக இருக்கும். அவர்களது கலாசாரத்தின் படி, அதுதான் டீசண்ட் லுக் கொடுக்கும்.

ஆனால், இந்தியாவில் முறுக்கு மீசையும், அளவான தாடியும் தான் ஆண்களுக்கு ஸ்டைலிஷ்ஷான லுக் தருகிறது. பெரும்பாலான இளைஞர்கள் தாடியை பராமரிப்பதற்கு என்றே மாதந்தோறும் சலூன்களில் நிறைய செலவு செய்கின்றனர். அவரவர் விருப்பம் மற்றும் முக தோற்றத்துக்கு ஏற்ப தாடி அமைப்புகளை மாற்றம் செய்து கொள்கின்றனர்.

அழகூட்டும் தாடி அரிப்பையும் ஏற்படுத்துகிறதா? என்னதான், தாடி அழகானதாக இருந்தாலும் பல சமயங்களில் அது உங்களுக்கு எரிச்சலையும், அரிப்பையும் ஏற்படுத்தக் கூடும். குறிப்பாக, வெயில் காலங்களில் வியர்வை வியர்த்து தாடியில் சேரும்போது, அங்கு கிருமித்தொற்று ஏற்பட்டு அரிப்பு வர வாய்ப்பு இருக்கிறது. ஆனால், இது பொதுவான காரணம் மட்டுமே. ஆனால், இது தவிர வேறு பல காரணங்களும் இருக்கின்றன.

சருமம் மற்றும் தாடி பராமரிப்பை சரிவர செய்யாமல் இருப்பதும் கூட அரிப்பை ஏற்படுத்தும். முகத்தை சோப் வைத்து முறையாக சுத்தம் செய்வது அவசியம் என்றாலும் கூட, அடிக்கடி சோப் பயன்படுத்தினால் அதன் அலர்ஜி காரணமாகவும் அரிப்பு ஏற்படக் கூடும். சில சமயம், முகத்தில் ஏற்படும் பங்கஸ் அல்லது பாக்டீரியா தொற்று காரணமாகவும் முகத்தில் அரிப்பு ஏற்படும்.

அரிப்பை தடுப்பது எப்படி? அரிப்பு ஏற்படாமல் தடுக்க வேண்டும் என்றால் முகம் மற்றும் தாடியில் எண்ணெய் பசை, அழுக்கு மற்றும் பாக்டீரியா ஆகியவை சேர விடாமல் தடுக்க வேண்டும். தினந்தோறும் ஒருமுறையாவது குளிக்க வேண்டும். நீங்கள் எப்போதுமே தாடி வைத்திருப்பவர் என்றால் வெந்நீர் வைத்து முகத்தை தினசரி கழுவ வேண்டும். முகம் அல்லது தாடி பராமரிப்புக்கு என பிரத்யேகமாக விற்கும் வாஷ் ஜெல்களை வாங்கியும் பயன்படுத்தலாம்.

இயற்கையான வழிமுறைகள் : ஒவ்வொரு முறையும் தாடியை டிரிம் செய்யும்போது முகத்தில் லோஷன் தடவுவது அவசியம் ஆகும். இதற்கு மாற்றாக கற்றாழை பசை அல்லது தேயிலை மர எண்ணெய் ஆகியவற்றையும் கூட நீங்கள் பயன்படுத்தலாம். ஆனால், அதிக ரசாயனம் மிகுந்த புராகட்களை கட்டாயம் தவிர்த்து விடுங்கள்.

மருத்துவ சிகிச்சை : தாடியில் இடைவிடாத அரிப்பு, நாள்பட்ட அரிப்பு போன்ற பிரச்சினைகள் இருந்தால் சரும நல மருத்துவரை அணுகி ஆலோசனை பெறவும். உங்கள் சருமத்திற்கு ஏற்ற க்ரீம், லோஷன் போன்றவற்றை மருத்துவர்கள் பரிந்துரை செய்வார்கள். குறிப்பாக, பாக்டீரியா மற்றும் பங்கஸ் தொற்று போன்றவற்றை தடுக்கும் மருந்துகளை கொடுப்பார்கள்.

லேசர் ஹேர் ரிமூவல் : முறையான பராமரிப்பு மற்றும் மருந்துகள் போன்றவற்றை எடுத்துக் கொண்ட பிறகும் தாடியில் நாள்பட்ட அரிப்பு இருக்கிறது என்றால் லேசர் ஹேர் ரிமூவல் சிகிச்சையை மருத்துவர்கள் செய்வார்கள். இது தவிர போட்டோடைனமிக் என்ற மேம்பட்ட சிகிச்சையையும் மருத்துவர்கள் செய்யக் கூடும்.