சன் டேனில் இருந்து உங்கள் சருமத்தை இயற்கையாக பாதுகாக்கும் வழிமுறைகள்.!

சூரியனின் தீங்கு விளைவிக்கும் புற ஊதா கதிர்களிடமிருந்து உங்கள் சருமத்தைப் பாதுகாக்க ஒரு நல்ல சன்ஸ்கிரீன் எப்போதும் அவசியம். தற்போது கோடை காலம் தொடங்கியுள்ள நிலையில், வெளியில் சென்று விட்டு வந்தாலே சூரிய கதிர்கள் மற்றும் வியர்வை காரணமாக சருமம் கருமையடைந்து விடும். உங்கள் உடல் சூரியனால் உமிழும் புற ஊதா கதிர்களிடமிருந்து தன்னை பாதுகாத்துக் கொள்ள முயற்சிக்கும்போது சரும பாதிப்பு ஏற்படுகிறது. புற ஊதா கதிர்வீச்சை உறிஞ்சுவதற்கு உங்கள் தோல் அதிக மெலனின் வெளியிடுகிறது. இது உங்கள் சருமம் கருமையாக்குகிறது. அதன் மூலம் உங்கள் சருமத்தின் நிறம் சீரற்றதாகிவிடும். இது சன் டேன் என அழைக்கப்படுகிறது. இதனை சரி செய்ய எளிதான வீட்டு வைத்தியங்களை நீங்கள் முயற்சி செய்யலாம்.

முட்டைக்கோஸ் : உங்கள் சரும பாதுகாப்பிற்கு பச்சை காய்கறிகளும் உதவுகிறது. வெயிலால் பாதிக்கப்பட்ட இடத்தில் சில முட்டைக்கோஸ் இலைகளை 15 நிமிடங்கள் வைக்கவும். இதனை வாரத்திற்கு இரண்டு முறை தொடர்ந்து செய்து வந்தால் நல்ல பலன் கிடைக்கும்.

தயிர் : வெயிலில் சென்றுவிட்டு வீடு திரும்பும் போது புளித்த தயிரில் சிட்டிகை மஞ்சள் தூள் சேர்த்து நன்றாக குழைத்து முகம், கழுத்து, கை, கால் பகுதி முழுக்க தடவி 10-165 நிமிடங்கள் ஊறவிடுங்கள். பிறகு முகத்தை சுத்தமான நீரில் கழுவி வந்தால் வெயிலால் தோன்றிய கருமை விரைவில் மறைந்துவிடும்.

கற்றாழை : கற்றாழை அழற்சி எதிர்ப்பு பண்புகளையும் கொண்டுள்ளது. இது மெலனினை அடக்குவதற்கு அறியப்படுகிறது. எனவே உங்கள் சருமத்தில் கற்றாழை ஜெல்லை தவறாமல் பயன்படுத்துவது உங்கள் சருமத்தை பொலிவாக மாற்ற உதவும்.

கடலை மாவு : கடலை மாவு ஒரு சிறந்த தோல் புத்துணர்ச்சி பொருள். இதை உங்கள் முகத்திலும், கழுத்து, கைகளில் அப்ளை செய்து கழுவி வந்தால் நல்ல பலன் கிடைக்கும். கடலை மாவுடன் பாசிப்பயறு மாவு அல்லது முல்தானி மெட்டி மற்றும் ரோஸ் வாட்டர் கலந்தும் பயன்படுத்தலாம்.

பப்பாளி : வெயிலிலிருந்து வந்ததும் பப்பாளி பழத்தை நன்கு மசித்து அதனுடன் தேன் கலந்து நன்றாக கலந்து முகம், கழுத்து பகுதியில் தடவி 20 நிமிடங்கள் ஊறவைத்து முகத்தை கழுவினால் சன் டேன் பிரச்சனை ஓடி விடும். வாரம் இரண்டு முறை இதனை செய்து வரலாம்.

தக்காளி : தக்காளி சருமத்திற்கு அழகை தருகிறது. தக்காளி பேஸ்ட் மற்றும் கற்றாழை சாற்றில் சம அளவு கலந்து பேஸ்ட் செய்து உங்கள் குறைந்தது 30 நிமிடங்களாவது உங்கள் தோலில் இருக்கும் வகையில் அப்ளை செய்யுங்கள். இதனை தொடர்ந்து செய்து வந்தால் ஓரிரு நாட்களில் நீங்கள் மாற்றத்தைக் காண்பீர்கள். சண் டேனை மட்டுமின்றி, கரும்புள்ளிகளை சரி செய்கிறது.