தர்பூசணியை இப்படி சாப்பிடுங்க... கண்களை சுற்றிலும் வரும் கருவளையத்தை போக்கும் உணவுகள்..!

பளபளப்பான நம் முகத்தில் கரும்புள்ளி வைத்தாற்போல கண்களை சுற்றியிலும் இருக்கும் கரு வளையமானது நம் தோற்றத்தை பாதிக்கிறது. இதைப் போக்குவதற்காக நாம் பல சப்ளிமண்ட் மருந்துகள் மற்றும் கிரீம்களை எடுத்துக் கொள்கிறோம். ஆனால், இதில் நாம் எதிர்பார்த்த பலன் கிடைப்பதில்லை. நாம் சாப்பிடும் உணவு தான், நம் உடலுக்கு உள்ளேயும், வெளியேயும் ஆரோக்கியத்தை தீர்மானிக்கிறது. ஆகவே, ஆரோக்கியமான வாழ்வியலை நாம் கடைப்பிடிக்கத் தொடங்கினால், நமது சருமம் பளபளப்பாக மாறும். சில மோசமான பழக்க, வழக்கங்களால் நாம் உடனடியாக அறிந்து கொள்ள முடியாத உடல் நல பாதிப்புகள் ஏற்படும். உதாரணமாக கண் கருவளையங்கள்.

கருவளையங்கள் வராமல் தடுப்பதற்கு பல வகையான, சத்தான உணவுகளை நாம் எடுத்துக் கொள்ளலாம் என்று ஊட்டச்சத்து நிபுணர்கள் தெரிவிக்கின்றனர். அவற்றில் சில உணவுகள் இங்கே பட்டியலிடப்பட்டுள்ளன.

தர்பூசணி : நம் உடலுக்கு பி1, பி6 மற்றும் சி விட்டமின்களை கொடுக்கக் கூடியது தர்பூசணி ஆகும். அதேபோன்று பொட்டாஷியம் மற்றும் மெக்னீசியம் ஆகிய சத்துக்களும் கிடைக்கும். தர்பூசணியில் சுமார் 92 சதவீதம் அளவுக்கு தண்ணீர் இருக்கிறது. இது சருமத்தில் ஏற்படும் நீர் இழப்பு பிரச்சினையை சரி செய்வதற்கு உதவியாக இருக்கும்.

பப்பாளி : வயது முதிர்வு பிரச்சனையை தடுப்பதில் பப்பாளி பெரும் பங்கு வகிக்கிறது. இதில், விட்டமின் ஏ சத்து நிறைவாக உள்ளது. உங்கள் கண்களை சுற்றியிலும் உள்ள கருவளையத்தை போக்குவதற்கு அது உதவியாக இருக்கும். மெக்னீசியம் மற்றும் விட்டமின் சி போன்ற சத்துக்களும் இதில் உள்ளன.

இலைக்கோசு : முட்டைக்கோஸ் போலவே உள்ள உணவுப் பொருள் தான் இலைக்கோசு. இதில் எண்ணற்ற நார்ச்சத்து உள்ளது. இதை மதிய உணவுக்கான சைட் டிஷ்ஷாக எடுத்துக் கொள்ளலாம். சுமார் 96 சதவீதம் அளவுக்கு நீர்ச்சத்து இருப்பதால் சுவையின்றி காணப்படும். ஆனால், உடலுக்கு தேவையான நீர்ச்சத்து கிடைக்கும்.

தக்காளி : நமது சருமத்தை பள பளப்பாகவும், சென்ஸிட்டிவ்வாகவும் வைத்துக் கொள்ள தக்காளிப் பழங்கள் உதவியாக இருக்கும். விட்டமின் சி, பொட்டாசியம் மற்றும் விட்டமின் கே போன்ற சத்துக்கள் நிறைந்தது. ரத்த நாளங்களின் பாதுகாப்பை மேம்படுத்தி, கண்களுக்கான ரத்த ஓட்டத்தை அதிகரிக்கிறது.

வெள்ளரிக்காய் : கோடைகால ஸ்நாக்ஸ் போல எடுத்துக் கொள்ளக் கூடிய வெள்ளரிக்காயில் நீர்ச்சத்து ஏராளமாக உள்ளது. இது கண்களின் கருவளையங்களை போக்கும். விட்டமின் கே, ஏ, இ மற்றும் சி போன்ற சத்துக்கள் நிறைந்தது.

சூரியகாந்தி விதைகள் : உடலில் இரும்புச் சத்து குறைவாக இருப்பதும் கண்களைச் சுற்றியிலும் கருவளையங்கள் வருவதற்கு காரணமாகும். ஆகவே, இரும்புச்சத்து நிறைந்த சூரியகாந்தி விதைகளை உட்கொள்ளலாம்.

ஆரஞ்சு : விட்டமின் சி மற்றும் ஏ போன்ற சத்துக்கள் நிறைந்த ஆரஞ்சுப் பழத்தை உட்கொண்டால், சருமத்தில் உள்ள கிருமிகள் வெளியேற்றப்படும். தினசரி அலுவலக நேரத்தில் அல்லது பயணத்தின் போது ஆரஞ்சு பழம் ஒன்றை சாப்பிடலாம்.