கழுத்தைச் சுற்றிலும் கருப்பாக உள்ளதா.. இந்த வீட்டுக் குறிப்பை செய்து பாருங்கள்..!

சூரிய வெளிச்சம், அதிகப்படியான கெமிக்கல் பயன்பாடு , மாசுபாடு உள்ளிட்ட கராணங்களால் கழுத்தைச் சுற்றிலும் கருமை தோன்றும். சில சமயம் அணியும் செயின், கழுத்தணிகளில் பயன்படுத்தப்பட்டுள்ள உலோகங்கள் சருமத்திற்கு ஏற்றுக்கொள்ளவில்லை என்றாலும் இப்படி கருமை, அரிப்பு போன்றவை உண்டாகலாம். இந்த கருமையான தோற்றம் என்னதான் அழகாக மேக்-அப் செய்திருந்தாலும் அதைக் கெடுக்கும் விதமாக இருக்கும். எனவே இதை போக்க இந்த வீட்டுக் குறிப்புகளை செய்து பாருங்கள்.

ஆப்பிள் சிடர் வினிகர் : ஆப்பில் சிடர் வினிகரை 2 ஸ்பூன் எடுத்துக்கொண்டு அதில் ஒரு ஸ்பூன் தண்ணீர் கலந்து கழுத்தை சுற்றிலும் தடவி 10 நிமிடங்கள் காத்திருந்து கழுவுங்கள். இதை ஒரு நாள் விட்டு ஒரு நாள் செய்து வந்தால் நல்ல பலன் கிடைக்கும்.

பேக்கிங் சோடா : 2 - 3 ஸ்பூன் பேக்கிங் சோடாவுடன் தேவையான அளவு தண்ணீர் சேர்த்து பேஸ்ட் போல் கலந்து கொள்ளுங்கள். அதைக் கழுத்தை சுற்றிலும் தடவி காயும் வரைக் காத்திருந்து குளிர்ந்த நீரில் கழுவவும். பின் மாய்ஸ்சரைஸரை கழுத்தில் தடவிக் கொள்ளுங்கள். இதை தொடர்ந்து செய்துவர கருமை நீங்கும்.

உருளைக் கிழங்கு : உருளைக் கிழங்கு சாறை கழுத்தைச் சுற்றிலும் தடவி காய்ந்த பின் கழுவினால் நிறம் மாறுவதை உணர்வீர்கள். இதை வாரம் மூன்று முறை செய்து வாருங்கள்.

மஞ்சள் : முகத்திற்கு தேய்க்கும் மஞ்சள் கிழங்குடன் அரை ஸ்பூன் எலுமிச்சை சாறு கலந்து கழுத்தை சுற்றிலும் தேய்த்து 15 நிமிடங்கள் காத்திருந்து கழுவுங்கள். இவ்வாறு செய்தால் கருமை நிறம் நீங்குவதை காணலாம்.

தயிர் : இரண்டு ஸ்பூன் தயிருடன் ஒரு ஸ்பூன் எலுமிச்சை சாறு கலந்து கழுத்தைச் சுற்றிலும் தடவுங்கள். 20 நிமிடங்கள் கழித்து கழுவுங்கள். இதை வாரம் 3 முறை செய்து வாருங்கள். சிறந்த பலனை எதிர்பார்க்கலாம்.