முகத்தில் இருக்கும் கொழுப்பை குறைக்க வேண்டுமா..? உணவில் இவற்றை தவிருங்கள்..!

உங்கள் உடல் எடை அதிகரிக்கும்போது, அதற்கேற்ப முகத்திலும் படியத் தொடங்கும். கொழுப்புகளால் கன்னம் பெருத்த பிறகு, அதன் இயல்பான அழகு காணாமல் போய்விடும். இதற்கிடையே உடல் எடையை குறைக்க நீங்கள் என்னதான் முயற்சி செய்தாலும், அதனுடன் முகத்தில் உள்ள கொழுப்பை குறைப்பது கடினமாக இருக்கும்.

உங்கள் உடலில் நிகழும் ஹார்மோன் மாற்றங்கள் மற்றும் மரபு ரீதியான காரணங்களாலும் முகத்தில் கொழுப்புகள் படியத் தொடங்கும். சில பெண்கள் பார்ப்பதற்கு ஒல்லியாக இருப்பார்கள். ஆனால், முகத்தில் ஏராளமான கொழுப்புகள் இருக்கும். அதை குறைத்து, அழகான கன்னத்தை கொண்டு வருவது மிக கடினம் ஆகும். கொழுப்பை குறைக்க ஏராளமான உடற்பயிற்சிகள் உண்டு என்றாலும், அதனுடன் குறிப்பிட்ட சில உணவுகளை நீங்கள் குறைத்துக் கொள்ள வேண்டும்.

சோயா சாஸ் : சோயா சாஸில் மிகுந்த சோடியம் உள்ளது. இதனுடன் மிகுதியான உப்பும் எடுத்துக் கொள்ளும்போது கன்னம் உப்பிவிடும். சோயா சாஸ் என்பது குறைவான கலோரி கொண்டது என்றாலும், அது உங்கள் கன்னத்தை உப்ப வைக்கும் என்பதாலும், ரத்த அழுத்தத்தை அதிகரிக்கும் என்பதாலும் இதை தவிர்ப்பது நல்லது.

மது : உடல் எடைக்கும், முகத்தில் கொழுப்பு அதிகரிக்கவும் மிக முக்கியமான காரணமாக விளங்கும் மதுவை நீங்கள் கட்டாயம் குறைத்துக் கொள்ள வேண்டும். மதுவில் ஏராளமான கலோரிகள் உள்ளன. இது தேவையற்ற அளவில் உடல் எடையை அதிகரித்து விடும்.

ஜங்க் ஃபுட்ஸ் : ஜங்க் ஃபுட்ஸ் என சொல்லப்படும், பதப்படுத்தப்பட்ட உணவுப் பொருட்களில் சோடியம் அதிகம் உள்ளது. இதனால், உங்கள் உடலில் கொழுப்பு அதிகரிக்கும்.

பிரெட் : காலை உணவாக வறுத்த பிரட் மற்றும் சாண்ட்விட்ச் போன்ற உணவை பெரும்பாலானோர் எடுத்துக் கொள்கின்றனர். கார்ப்போஹைட்ரேட் நிறைந்த பிரெட் உணவை உங்களால் முடிந்த அளவுக்கு கட்டுப்படுத்துவது நல்லது.

சிவப்பு இறைச்சி : நிறைந்த கலோரிகள் மற்றும் கொழுப்புச் சத்து நிறைந்த சிவப்பு நிற இறைச்சி என்பது உங்கள் முகத்தில் அதிகமான கொழுப்பை சேர்த்து விடும். ஆகவே, ஆட்டிறைச்சி, மாட்டிறைச்சி மற்றும் பன்றி இறைச்சி போன்ற உணவுகளை அளவோடு எடுத்துக் கொள்ள வேண்டும்.

கொழுப்பை குறைக்க என்ன செய்யலாம் : நாள் முழுவதும் உடலுக்கு போதுமான நீர்ச்சத்து வழங்க வேண்டும். வயிறு நிறைய தண்ணீர் குடிக்கும்போது உங்களுக்கு பசி உணர்வு குறையும். இதனால், நீங்கள் எடுத்துக் கொள்ளும் கலோரி அளவும் கட்டுப்படும். இதன் விளைவாக முகத்தில் உள்ள கொழுப்புகள் குறையத் தொடங்கும்.

போதுமான அளவுக்கு தூக்கம் இல்லை என்பதும் முகத்தில் கொழுப்பு அதிகரிக்க காரணம் ஆகும். இதேபோல, நார்ச்சத்து மிகுந்த உணவுகளை அதிகம் எடுத்துக் கொள்வதன் மூலமாகவும் முகத்தில் உள்ள கொழுப்பை கரைக்கலாம்.