முகப்பரு வராமல் இருக்கனுமா..? இந்த விஷயங்களை தவிருங்கள்..!

வயது வித்தியாசமின்றி அனைவருக்கும் முகப்பருக்கள் ஏற்படுவது என்பது பொதுவான பிரச்சனையாக இருந்து வருகிறது. அதிலும் டீன் ஏஜ் காலகட்டங்களில் முகப்பருக்கள் ஏற்படுவது என்பது வழக்கமான ஒன்றுதான் என்றாலும் அதனால் முகத்தின் அழகு பாதிக்கப்படுகிறது என்பதை மாற்றுக் கருத்து இல்லை. தவறான உணவு பழக்கவழக்கங்கள், அதிகப்படியான மன அழுத்தம், மாசுபட்ட சூழலில் வாழ்வது, மற்றும் உடலில் ஏற்படும் ஹார்மோன் மாற்றங்கள் என முகப்பரு ஏற்படுவதற்கு பல காரணங்கள் உள்ளன.

அனைவரும் மிக வேகமாக இயங்கி வரும் இந்த வாழ்க்கை முறையில் முகப்பரு வராமல் பாதுகாத்துக் கொள்ள அதுக்கென தனி நேரம் ஒதுக்கி நம் சருமத்தை பராமரிப்பது அனைவருக்கும் முடியாத செயல். இதனால் முகப்பரு ஏற்பட்டு மறைந்தாலும் கூட அந்த தழும்பு அப்படியே இருக்கும். இது போன்ற காரணங்களினால் முகப்பரு வராமல் தடுப்பது சிறந்த நடவடிக்கையாக இருக்கும். முகப்பரு வராமல் தடுக்க ஐந்து முக்கிய குறிப்புகளை பற்றி இந்த பதிவில் பார்ப்போம்.

பால் பொருட்களை உட்கொள்வதை தவிர்க்க வேண்டும் : பால் மற்றும் பாலை மூலப்பொருளாக கொண்டு செய்யப்படும் வெண்ணெய், பாலாடை கட்டி, தயிர், ஐஸ்கிரீம் போன்ற உணவுப் பொருட்களை உண்பதை தவிர்க்க வேண்டும். முகப்பரு ஏற்படுவதற்கு இந்த டைரி ப்ராடக்டுகள் மிக முக்கிய காரணமாக விளங்குகின்றன.

புற ஊதா கதிர்கள் மற்றும் மாசுக்களில் இருந்து விலகி இருக்க வேண்டும் : சூரியனிலிருந்து வெளிப்படும் புற ஊதாக்கதிர்கள் நம் சருமம் மற்றும் முகத்திற்கு கேடு விளைவிப்பவை. அதிகப்படியான புற ஊதா கதிர்கள் சருமத்தை பாதித்து முகப்பரு ஏற்படுவதற்கு வழி வகுக்கின்றன. மேலும் சுற்றுச்சூழல் மாசுபாடும் முகப்பருவு ஏற்பட காரணமாக உள்ளது. எனவே வெளியே செல்லும்போது சன் ஸ்கிரீனை சருமத்தில் தடவிக் கொண்டு செல்ல வேண்டும்.

கைகளால் முகத்தை தொடுவதை தவிர்க்க வேண்டும் : நம்முடைய கைகளில் பல வித கிருமிகள் மற்றும் பாக்டீரியாக்கள் தோற்றி இருக்க கூடும். அதே கையோடு நம் முகத்தை தொடும்போது அதில் உள்ள கிருமிகள் மற்றும் பாக்டீரியாக்கள் முகத்தில் பரவி முகப்பருவை உண்டாக்குகின்றன.

எண்ணெய்யில் செய்யப்பட்ட உணவுப் பொருட்களை தவிர்க்க வேண்டும் : எண்ணெய்யில் செய்யப்பட்ட உணவுப் பொருட்களை உண்பதன் மூலம் அதிக அளவு எண்ணெய் மற்றும் சீபம் உற்பத்தி அதிகரிக்கிறது. இதனால் முகப்பருக்கள் தோன்றுவதற்கான வாய்ப்பு அதிகரிக்கிறது.

தேவையான அளவு தண்ணீர் குடிக்க வேண்டும் : வேகமான வாழ்க்கை முறையில் பலரும் உடலுக்கு தேவையான அளவு தண்ணீர் பருகுவதை மறந்து விடுகின்றனர். உடலுக்குத் தேவையான அளவு தண்ணீரை பருகும் போது அது நம்மை ஆரோக்கியமாக வைத்துக் கொள்வதுடன் முகப்பருக்கள் வராமலும் பாதுகாக்கிறது.

இதைத் தவிர வேறு பல மருத்துவ காரணங்களும் முகப்பரு ஏற்பட காரணமாக இருக்கலாம். திடீரென்று முகப்பரு ஏற்படுவதற்கான அறிகுறிகள் தோன்றினால் உடனடியாக மருத்துவரை அணுகவும்.