பிரபலங்களோட ஸ்கின் எப்படி இவ்வளவு ஹெல்தியா இருக்குனு தெரியுமா..? இந்த 5 விஷயங்கள்தான் காரணம்..!

ஃபேஸ்புக், இன்ஸ்டாகிராம் போன்ற சமூக வலைதளங்களில் பலர் தங்களின் பளபளப்பான சருமத்துடன் காட்சியளிக்கும் வகையில் ஃபோட்டோ, வீடியோ பதிவிடுவதை நீங்கள் பார்த்திருப்பீர்கள். அவர்களின் சருமம் மட்டும் எப்படி இந்த அளவுக்கு பளபளப்பாக இருக்கிறது என்று நீங்கள் யோசனை செய்திருப்பீர்கள்.

உங்கள் சருமம் ஃப்ரெஷ்ஷாக இருக்க வேண்டும் என்றால் அதனை பராமரிப்பது மிக அவசியமாகும். குறிப்பாக குளிர்காலத்தில் சரும பாதுகாப்பு மிக, மிக அவசியமானது. தீர்க்கமான மற்றும் ஆரோக்கியமான பழக்க வழக்கங்களை நாம் கடைப்பிடித்தால் சரும பாதுகாப்புக்கு நிச்சயமாக உத்தரவாதம் உண்டு.

இரவு தூங்கச் செல்லும் முன்பாகவும், காலையில் எழுந்த உடனும் நமது சரும பாதுகாப்பில் நாம் அக்கறை செலுத்த வேண்டும். சருமம் பளபளப்பாக காட்சியளித்தால் நம்பிக்கை அதிகரிக்கும் என்பதையும் நினைவில் கொள்ளுங்கள். இதற்கான எளிய டிப்ஸ் இதோ..

க்ளென்சிங் முக்கியமானது : இரவு தூங்கும் முன்பாக நம் சருமத்தை சுத்தம் செய்ய வேண்டியது அவசியம் ஆகும். காலையிலும் அதனை செய்ய வேண்டும். இதனால், நமது சருமம் புத்துணர்ச்சி அடைகிறது மற்றும் அழுக்குகள் நீங்கி சருமத்திற்கு தூய்மையான காற்றோட்டம் கிடைக்கும். சருமத்தை சுத்தம் செய்வதால் கொப்பளம், பரு போன்றவை தடுக்கப்படுகிறது. இது மட்டுமல்லாமல் முன்கூட்டியே வயதான தோற்றம் ஏற்படுவது தடுக்கப்படுகிறது.

ஆரோக்கியமான உணவு முறை : நம் உடலுக்கு விட்டமின்கள், மினரல்கள், புரதம், ஊட்டச்சத்துகள் ஆகிய நிறைந்த உணவு அவசியமாகும். ஏனெனில் நமது மனதையும், உடலையும் புத்துணர்ச்சியாக வைத்துக் கொள்ள இவை அவசியமாகும். அத்துடன் சருமமும் பளபளப்பாக காட்சியளிக்கும். சரும பாதுகாப்பிற்கு தனித்த பொருள்களை பயன்படுத்துவதைக் காட்டிலும் ஆரோக்கியமான உணவுமுறை போதுமானது.

புகைப்பிடித்தல் கூடாது : புகைப்பிடிப்பதால் சருமத்திற்கு தேவையான ஆக்ஸிஜன் மற்றும் ஊட்டச்சத்துகள் கிடைக்காமல் போகிறது. இதனால், சருமம் நிறமிழந்து பொலிவின்றி காட்சியளிக்கிறது. வழக்கமாக வயதான காலத்தில் தோன்றக் கூடிய தோல் சுருக்கங்கள், புகை பிடிப்பவர்களுக்கு இளம் வயதிலேயே தோன்றி விடும்.

முறையான தூக்கம் அவசியம் : நாள் ஒன்றுக்கு 7 முதல் 9 மணி நேரம் வரையில் தூங்குவது நம் உடல் ஆரோக்கியத்திற்கு மட்டுமல்லாமல் பளபளப்பான சருமத்திற்கும் உகந்தது ஆகும். தூக்கமின்மை பிரச்சினை இருந்தால் நமது சருமம் மற்றும் முக பகுதிக்கு வரக் கூடிய ரத்த ஓட்டம் தடைபடும். இதனால் சருமம் பொலிவிழந்து காணப்படும் என்பதை நினைவில் கொள்ளுங்கள்.

அதிகமான தண்ணீர் பருகவும் : தினசரி நம் உடலுக்கு போதுமான நீர்ச்சத்து கிடைக்காவிட்டால் சருமம் கடினமானதாக மாறி விடும். நீர்ச்சத்து போதுமான அளவில் இருந்தால் சருமத்திற்கான ரத்த ஓட்டம் அதிகரிக்கும். அதேபோல, அகத்தின் அழகு தான் முகத்தில் தெரியும் என்ற பழமொழிக்கு ஏற்ப, நம் மனம் ஆரோக்கியமாக இருந்தால் தான் உடல் தோற்றமும் அழகாக இருக்கும் என்பதை நினைவில் கொள்ளுங்கள். ஆகவே, மன ஆரோக்கியத்தையும் கடைப்பிடிக்க வேண்டும்.