அலுவலகத்தின் கடுமையான பணிச்சூழலில் நம்மை தற்காத்துக் கொள்வது எப்படி..?

நம் உடல் நலன் மற்றும் மனநலன் சீராக இருப்பதில் குடும்ப விவகாரங்கள் மட்டுமல்லாமல் அலுவலக பணிச்சூழலும் முக்கிய பங்கு வகிக்கிறது. வீட்டில் எந்தவித பிரச்சினையுமே இல்லை என்றாலும் கூட அலுவலகத்தில் விதிக்கப்படும் பணி இலக்குகள், காலக்கெடு மற்றும் இதர கட்டுப்பாடுகள் ஆகியவை நம் மனதை சோர்வடைய செய்யும்.

நிர்வாகத்தில் இருந்து போதிய ஒத்துழைப்பின்மை, மேல் அதிகாரிகளின் கட்டுப்பாடுகள் போன்றவை காரணமாக ஒட்டுமொத்த வேலையையும் நாம் வெறுத்து ஒதுக்க வேண்டிய சூழல் ஏற்படும். சக ஊழியர்கள் மத்தியில் நிலவும் போட்டி, பொறாமை கூட நம் மனதை பாதிக்கும். எல்லா பிரச்சினைகளுக்கும் தீர்வளிக்க வேண்டிய ஹெச்.ஆர். அதிகாரிகள் சில சமயம் எதையுமே கண்டுகொள்ள மாட்டார்கள். இத்தகைய சூழலில் நம்மை தற்காத்துக் கொள்வது எப்படி?

எல்லைகளை வரையறை செய்வது: அலுவலகத்தில் நமக்கான எல்லைகளை நாம் வகுத்துக் கொள்ள வேண்டும். மேல் அதிகாரிகள் மற்றும் சக ஊழியர்கள் மத்தியில் எந்த அளவுக்கு நெருங்கிப் பழக வேண்டும் என்பதை நாமே முடிவு செய்து கொள்ள வேண்டும். நம் பணித்திறன் என்ன என்பதை உணர்ந்து அதற்கேற்ற பொறுப்புகளை மட்டுமே ஏற்றுக் கொள்ள வேண்டும்.

சுயநலனுக்கு முக்கியத்துவம் : அலுவலக வேலைகளை செய்கிறோம் என்ற பெயரில் பலரும் தன்னுடைய சொந்த நலனையே முற்றிலுமாக மறந்துவிடுவார்கள். ஆரோக்கியமான உணவு, தினசரி உடற்பயிற்சி, முறையான தூக்கம் போன்றவற்றுக்கு நாம் முக்கியத்துவம் கொடுக்க வேண்டும். இல்லை என்றால் நம் உடல் நலன் பாதிக்கப்படும்.

ஒத்துழைப்பு கோருவது : கஷ்டமான பணிகளை செய்யும்போது, நமக்கு ஸ்ட்ரெஸ் ஏற்படுவது வழக்கம் தான். அத்தகைய சூழலில் சக ஊழியர்களின் ஒத்துழைப்பை நாம் கோரலாம். அதேபோல அவர்கள் கடுமையான பணிகளை செய்யும்போதும் நாம் உதவி செய்ய மறக்கக் கூடாது.

கட்டுப்பாடுகள் மீது கவனம் : அலுவலகத்தில் நம் கட்டுப்பாட்டிற்கு உட்பட்டு என்னென்ன விஷயங்கள் இருக்கின்றன என்பதில் மட்டும் கவனம் செலுத்த வேண்டும். தேவையற்ற விஷயங்களில் நம் கவனத்தை திருப்பினால் வீண் பிரச்சினைகளை எதிர்கொள்ள நேரிடும். நம்முடைய உரையாடல் மீது தனிக்கவனம் செலுத்த வேண்டும்.

மன ஒருங்கிணைப்பு : அலுவலகத்தில் எப்போதாவது சிறு, சிறு பிரச்சினைகள் ஏற்படுவது இயல்பானது தான். அதற்காக நாம் மனம் உடைந்து போகக் கூடாது. சவாலான சூழ்நிலைகளை நாம் எதிர்கொண்டு வெற்றி பெற வேண்டும்.

ஓய்வு தேவை : என்னதான் பணிச்சுமை கூடுதலாக இருந்தாலும், நம் உடலுக்கும், மனதுக்கும் சற்று ஓய்வு தேவை என்பதை நாம் மறந்து விடக் கூடாது. அலுவலகத்தின் வெளியே சிறிது தொலைவுக்கு நடைபயணம் செல்லலாம். சிறிது நேரத்திற்கு கண்களை மூடி, பெருமூச்சு விட்டு நம்மை நாம் புதுப்பித்துக் கொள்ளலாம்.

உடல் நலனுக்கு முக்கியத்துவம்: என்னதான் கடுமையான பணிச்சூழலில் நாம் வேலை செய்து கொண்டிருந்தாலும், நம் உடல் நலனையும், மன நலனையும் மறந்து விடாமல் அவற்றுக்கு முன்னுரிமை கொடுக்க வேண்டும். குடும்ப உறுப்பினர்கள் அல்லது நண்பர்களுடன் உங்கள் அலுவலக பிரச்சினைகளை பகிர்ந்து கொண்டால், அதிலிருந்து ஆறுதல் கிடைக்கலாம்.