அலுவலகத்தில் டீம் லீடர் ஆக நினைக்கிறீர்களா..? இந்த வார்த்தைகளை ஒருபோதும் பயன்படுத்தாதீங்க

ஒரு தலைவன் என்பவன் எல்லோருக்கும் முன்னுதாரணமானாக இருக்க வேண்டும். தனக்கு கீழ் உள்ள அனைவரையும் வழிநடத்திச் செல்பவராக இருக்க வேண்டும். ஒரு இலக்கை அடைவதில் தலைவன் காட்டும் வேகம், முயற்சி, நம்பிக்கை ஆகியவற்றை பார்த்து தான் கீழே உள்ளவர்கள் உந்து சக்தியோடு உழைக்கத் தொடங்குவார்கள். தலைவனின் உறுதிதான் ஒட்டுமொத்த குழுவின் வெற்றிக்கு காரணமாக அமையும்.

ஆக, நாம் தலைவாக இருக்கும் பட்சத்தில் அல்லது தலைவனாக வர விரும்பும் பட்சத்தில் நாம் பயன்படுத்தும் வார்த்தைகள் குறித்து மிக கவனமாக இருக்க வேண்டும். ஏனென்றால் நாம் பயன்படுத்தும் வார்த்தைகள் என்பது நம் செயல்திறன் குறித்து கேள்வி எழுப்பக் கூடியதாக அமைந்து விடக் கூடாது. இலக்கை அடைவோமா என்ற சந்தேகத்தை மற்றவர்களுக்கு கொடுத்து விடக் கூடாது. உங்கள் பேச்சில் எந்தவித தடுமாற்றமும் இருக்கக் கூடாது. நீங்கள் எந்தெந்த சொற்களை பயன்படுத்தக் கூடாது என்பதை இந்தச் செய்தியில் தெரிந்து கொள்ளலாம்.

உறுதியாக தெரியவில்லை : நீங்கள் எந்தவொரு கருத்தை முன்வைத்தாலும், அதைப் பற்றி உறுதியான தரவுகளோடு பேச வேண்டும். ஒரு விஷயம் குறித்து உங்களுக்கே சந்தேகம் இருக்குமானால் அதை மற்றவர்களிடம் கொண்டு செல்லக் கூடாது. குறிப்பாக, “இந்த விஷயத்தை பற்றி எனக்கு உறுதியாக தெரியவில்லை’’ என்று நீங்கள் பேசக் கூடாது.

உண்மையை சொல்வதென்றால் : இந்த வார்த்தையை நீங்கள் பயன்படுத்துகிறீர்கள் என்றால், மற்ற விஷயங்கள் சிலவற்றில் பொய் பேசியுள்ளீர்கள் என்ற அர்த்தமாகிவிடும். நீங்கள் பேசும் அனைத்துமே உண்மை என்றால், இதை நீங்கள் குறிப்பிட்டு சொல்ல வேண்டியதில்லை.

மன்னிக்கவும் : நீங்கள் ஏதோ ஒரு செயலை முன்னெடுக்கும்போது, அது ஊழியர்களுக்கு அல்லது தொண்டர்களுக்கு சிரமத்தை கொடுப்பதாக இருக்கலாம். அதற்காக மன்னிக்க வேண்டுகிறேன் எனக் கூற வேண்டியதில்லை. அந்த வார்த்தைக்கான மதிப்பு போய்விடும்.

நான் முயற்சிக்கிறேன் : பணியிடத்தில் நீங்கள் தலைமையாக இருக்கும்போது, நான் முயற்சி செய்கிறேன் என்ற சொல் பயன்படுத்தக் கூடாது. உங்கள் திறமை மீது உங்களுக்கே நம்பிக்கை இல்லை என்ற அர்த்தம் வந்துவிடும். ஒரு செயலுக்கு நீங்களே முயற்சி செய்கிறேன் என்ற சொல்லை பயன்படுத்தும்போது, உங்களுக்கு கீழ் உள்ளவர்கள் அந்த இலக்கை அடைய முடியாது என்ற எண்ணத்திற்கு வந்து விடுவார்கள்.

நான் சொல்வது புரிகிறதா : பேச்சின் நடு, நடுவே இந்த சொல் பயன்படுத்தப்படுவதை பார்த்திருப்பீர்கள். அப்படியானால் ஊழியர்களுக்கு, தொண்டர்களுக்கு புரியாத ஒரு தோரணையில் நீங்கள் பேசுவதாக அர்த்தம் ஆகிவிடும்.

அப்பட்டமாக கூறுகிறேன் : இது பயன்படுத்தக் கூடாத சொல். எந்தவொரு விஷயத்திலும் இதை நீங்கள் சேர்த்து சொல்லும்போது, அதன் மதிப்பு குறைந்துவிடுகிறது. உங்கள் பேச்சை கவனிக்கும் நபர்களிடம் நீங்கள் ஒரு ஸ்ட்ரெஸ் ஏற்படுத்த முயற்சிப்பதாக மாறிவிடும். ஆகவே இதை தவிர்த்துக் கொள்ளுங்கள்.