சேலையில் கனிமொழி எம்.பி - மும்பை மாடலை வைத்து விளம்பரம்... வைரலாகும் போட்டோஸ்!

துணைப் பொதுச் செயலாளர் கனிமொழியின் பிறந்தநாள் ஜனவரி 5 ஆம் தேதியன்று விஷேசமாக கொண்டாட அவரது ஆதரவாளர்கள் தயாராகிவருகிறார்கள்.

துணைப் பொதுச் செயலாளர் ஆன பின் முதல் பிறந்தநாள் என்பதால் கனிமொழியின் ஆதரவார்கள் தங்களது துடிப்பை காட்டும் வகையில் சேலையில் கனிமொழி, முதலமைச்சர் முக ஸ்டாலின், அறிவாலயத்தின் படம் ஆகியவற்றை அச்சிட்டு வினியோகம் செய்ய ஆரம்பித்துள்ளனர்.

கன்னியாகுமரி மாவட்டத்தை சேர்ந்த மகளிர் அணி பிரமுகர் அம்மு ஆன்றோ ஏற்பாட்டில் ஆயிரக்கணக்கில் சேலைகள் தயார் செய்யப்பட்டுள்ளன.

இந்த சேலைகளை நலத்திட்ட உதவிகளாக கனிமொழி பிறந்தநாள் அன்று வழங்க முடிவு செய்து இருக்கிறார்கள்.

பிரத்யேகமாக வடிவமைக்கப்பட்ட அந்த சேலையை மும்பை மாடல் ஒருவர் அணிந்தபடி ஒய்யாரமாக போஸ் கொடுக்கும் வீடியோ சமூக வளைதளங்களில் வைரல் ஆகிவருகிறது.

வழக்கமாக கனிமொழி பிறந்தநாளை பெரிதாக கொண்டாடுவதில்லை என்றாலும், துணை பொதுச் செயலாளர் பதவிக்கு பின் கனிமொழியை புடவை அச்சில் ஏற்றியுள்ளனர் அவரது ஆதரவாளர்கள்.

மும்பையில் பிரத்யேகமான வடிவமைக்கப்பட்ட இந்த புடவை ஒன்றின் மதிப்பு ரூ.400 என்கிறார்கள் விபரம் அறிந்தவர்கள்.

தமிழகத்தின் முக்கிய அரசியல் ஆளுமையாக இருந்த முன்னாள் முதலமைச்சர் ஜெயலலிதாவின் பிறந்தநாளின் போது இரட்டை இலை சின்னம் பதியப்பட்ட புடவைகள், ஜெயலலிதாவின் புகைப்படம் அச்சிடப்பட்ட புடவைகளை அக்கட்சித்தலைவர்கள் மகளிர் அணிக்கு பரிசாக வழங்குவது வழக்கம். அதை இப்போது கனிமொழி டீம் காப்பியடித்துள்ளது என்று நெட்டிசன்கள் விமர்சிக்கிறார்கள்.