காஞ்சிபுரம் கோயிலுக்கு திடீர் விசிட் அடித்த ரம்யா பாண்டியன்.. வைரல் போட்டோஸ்!

காஞ்சிபுரத்தில் உள்ள கட்டிடக்கலைக்கு பெயர் பெற்றதும், உலகப் புகழ்பெற்ற கோவிலாகவும் திகழும் கைலாசநாதர் கோவிலில் ஜோக்கர், ஆண் தேவதை உள்ளிட்ட படங்களில் நடித்த பிரபல நடிகை ரம்யா பாண்டியன் சாமி தரிசனம் செய்தார்‌.

தென்னிந்திய கட்டிடக்கலை வரலாற்றில், காலத்தால் அழியாமல் நீடிக்கும் கட்டடங்களாகக் கற்கோயில்களை அமைத்துத் தென்னிந்திய கட்டிடக்கலை வளர்ச்சிக்கு உத்வேகம் கொடுத்தவர்கள் பல்லவ மன்னர்கள். அவர்கள் தொடக்க காலத்தில், குடைவரைகளையும், பின்னர் ஒற்றைக் கற்றளிகளையும் அமைத்தனர். தொடர்ந்து கட்டுமானக் கோவில்களை அமைப்பதிலும் பல்லவர்கள் முன்னோடிகளாக திகழ்ந்தனர்.

இந்நிலையில், காஞ்சிபுரத்தில் உள்ள புகழ்பெற்ற கைலாசநாதர் கோவிலை கி.பி. 700ஆம் ஆண்டளவில் பல்லவ மன்னன் இராஜசிம்மனால் கட்டத் தொடங்கப்பட்டது. இந்த கோவில் தென்னிந்திய கட்டிடக்கலையின் ஆரம்ப காலகட்டத்துக்குரிய திருப்பு முனைகளில் ஒன்றாகக் கருதப்படுகிறது. இது காஞ்சிபுரத்திலுள்ள மிக்க பழைமை மிக்க கோயிலாகும். இதைக் கல்வெட்டு ஆதாரங்கள் ‘இராஜசிம்மேச்சரம்’ எனக் கூறுகின்றன

இந்த சிறப்பு மிக்க கோவிலுக்கு, ஜோக்கர், ஆண் தேவதை போன்ற படங்களின் மூலம் தமிழ் ரசிகர்களுக்கு அறிமுகமானவர் ரம்யா பாண்டியன்.

விஜய் டிவியில் ஒளிபரப்பாகும் பிரபல குக் வித் கோமாளி நிகழ்ச்சி மூலம் இவருக்கு பல ரசிகர்கள் குவிந்தனர். பிக் பாஸ் நிகழ்ச்சியில் தலைக்காட்டி மென்மேலும் பிரபலமானார் ரம்யா பாண்டியன்.

இந்நிலையில் நடிகை ரம்யா பாண்டியன் காஞ்சிபுரத்தில் உள்ள வரலாற்று சிறப்புமிக்க கட்டிடக்கலைக்கு பெயர் பெற்ற, காஞ்சி கைலாசநாதர் ஆலயத்தில் சுவாமி தரிசனம் மேற்கொண்டார்.

பின்னர் அந்த கோவிலை சுற்றி உள்ள பல்வேறு கட்டிட கலையை பார்வையிட்டு அங்குள்ள சிற்பங்கள் மற்றும் ஓவியங்களை கண்டு ரசித்தார்.