பஞ்ஷிர் போராளிகளிடம் செம அடி வாங்கிய தாலிபான்கள்.. நூற்றுக்கணக்கில் பலி என தகவல்!

காபுலை கைப்பற்றிய போதும் பஞ்ஷிரை தாலிபான்களால் கைப்பற்ற முடியாமல் போயிருப்பதால், அங்கு அதிக அளவிலான தாலிபான்கள் குவிந்து சண்டையை தொடங்கிய நிலையில், பஞ்ஷிர் போராளிகளின் வீரத்துக்கு ஈடுகொடுக்க முடியாமல் பெரும் அளவில் உயிர் சேதத்தை சந்தித்து வருவதாக தகவல்கள் வெளியாகி உள்ளன.

ஆப்கானிஸ்தானின் 34 மாகாணங்களும் தாலிபான்கள் கட்டுக்குள் இருப்பதாக சொல்லப்பட்ட நிலையில் பஞ்ஷிர் எனும் மாகாணத்தை மட்டும் மக்கள் எழுச்சியாக தாலிபான்களிடம் இருந்து கைப்பற்றி அவர்களை ஓட விட்டனர். பஞ்ஷிர் போராளிகள். தாலிபான்கள் மட்டுமல்ல சோவியத் யூனியன் படையெடுப்பின் போதும் கூட இந்த பஞ்ஷிர் பள்ளத்தாக்கை யாராலும் கைப்பற்ற முடியாத பெருமையுடன் இருந்து வருகிறது.

இந்நிலையில், பஞ்ஷிர் மாகாணத்தை கைப்பற்றும் நோக்கில் கடந்த 3 தினங்களாக பெருமளவில் படைகளை குவித்த தாலிபான்கள், பஞ்ஷிர் போராளிகளுடன் சண்டையை தொடங்கினர். இருப்பினும் புவியியல் ரீதியாக பஞ்ஷிர் மலைப்பாங்கான பகுதி என்பதால் உள்ளூர்வாசிகள் அந்தப் பகுதியின் ஏகபோக கட்டுப்பாட்டை கைக்குள் வைத்திருக்கின்றனர்.

உள்ளூர்வாசிகளை எதிர்த்து பஞ்ஷிரின் ஷோதுல், ஜபுல் - ஷாரஜ், குல்பாஹர், கவாக் போன்ற பகுதிகளி வழியாக தாலிபான்கள் ஊடுருவ முயன்ற நிலையில், கடுமையாக சவால் அளித்த பஞ்ஷிர் போராளிகள் தாக்கியதில் தாலிபான்கள் பெருமளவில் உயிர் சேதத்தை சந்தித்திருப்பதாக அங்கிருந்து வரும் தகவல்கள் கூறுகின்றன.

ஒவ்வொரு நாளும், பல வழிகளில் தாலிபான்கள் அளிக்கும் சவால்களை முறியடித்து வருகின்றனர் பஞ்ஷிர் போராளிகள். அந்த வகையில் கடந்த 3 நாட்களில் மட்டும் 115 தாலிபான்கள், பஞ்ஷிர் போராளிகளால் கொல்லப்பட்டிருப்பதாக கூறப்படுகிறது. மேலும் பலரை உயிருடன் கைதிகளாக பிடித்துச் சென்றுள்ளதாகவும் தெரியவந்திருக்கிறது. இத்துடன் தாலிபான்கள் கொண்டு வந்த பீரங்கி போன்ற பெரிய அளவிலான தளவாடங்களையும் பஞ்ஷிர் போராளிகள் கைப்பற்றியிருக்கின்றனர்.

ஆப்கனில் ஆட்சி அமைக்கும் பணிகளில் ஈடுபட்டிருக்கும் தாலிபான்களின் கண்களில் பஞ்ஷிர் போராளிகள் விரல் விட்டு ஆட்டி வருவதாக கூறப்படுகிறது.