திருமணம் செய்துகொள்ள முடிவெடுத்த லெஸ்பியன் தம்பதி: திருமண மண்டபம் தர மறுத்த உரிமையாளர்

தென்ஆப்பிரிக்காவைச் சேர்ந்த லீ ஹீகீஸ் மற்றும் மேகன் வால்டிங். அவர்கள் ஓர்பால் ஈர்ப்பாளர்கள்.

திருமணம் செய்துகொள்ள முடிவெடுத்த இருவரும் திருமண மண்டபத்துக்காக அதன் உரிமையாளரை அணுகியுள்ளனர்.

ஆனால், மண்டபத்தின் உரிமையாளர் ஓர்பால் ஈர்ப்பாளர்கள் என்பதற்காக திருமண மண்டபத்தை தர மறுத்துள்ளார்.

அதற்கு காரணமாக, ஓர்பால் ஈர்ப்புத் திருமணம் கிறிஸ்துவ நம்பிக்கைக்கு எதிரானது என்று கூறியுள்ளார்.

இதுகுறித்து சமூகவலைதளத்தில் பதிவிட்டுள்ள ஹீகிஸ், ‘நான் காயப்படுத்தப்பட்டதை நீங்கள் புரிந்துகொள்ள மாட்டீர்கள். உங்களுடைய முன்அனுமானங்களால் நான் எவ்வளவு வேதனையடைந்திருப்பேன். அடுத்த ஆண்டுக்குள் நாங்கள் விரும்பும்படி திருமண மண்டபம் கிடைக்கும்’ என்று குறிப்பிட்டுள்ளார்.

ஆப்பிரிக்கா கண்டத்திலேயே தென்ஆப்பிரிக்காவில் மட்டும்தான் ஓர்பால் ஈர்ப்புத் திருமணம் சட்டப்பூர்வமாக்கப்பட்டுள்ளது.

இதுகுறித்து தென்ஆப்பிரிக்க மனித உரிமைகள் ஆணையம், ‘திருமண மண்டப உரிமையாளரின் செயல் பாகுபாடு நிறைந்தது’ என்று தெரிவித்துள்ளார் .