ஹேர் ஸ்டைல் முதல் ஸ்கூல் பென்ச் வரை.. வடகொரியாவின் அதிரவைக்கும் ஸ்ட்ரிக்ட் விதிகள்!

வடகொரியா நாடு கின் ஜோங் சர்வாதிகாரத்தின் கீழ் உள்ள ஒரு நாடாகவே மாறிவிட்டது. அங்குள்ள மக்களுக்கு அடிப்படை உரிமை என்பதற்கு எல்லாம் இடமே இல்லை. வடகொரிய அரசு சொல்லும் வார்த்தை தான் வேத மந்திரம். அப்படி போடப்பட்டுள்ள சட்டங்களை பாருங்க. 

வடகொரியாவில் உள்ள மக்கள் எப்படி வேண்டுமானாலும் முடியை வளர்த்துக்கொள்ள  முடியாது. நம்ம ஊர்  மாதிரி எல்லாம் ஹேர்ஸ்டைல் வைத்தால் புடுச்சு ஜெயில்ல போட்ருவாங்கலாம். அவர்கள் ஆண்களுக்கு பெண்களுக்கு என்று தனியாக ஹேர்ஸ்டைல் அட்டவணை வைத்துள்ளனர். அதில் எதாவது ஒன்றைத்தான் வைக்க வேண்டுமாம்.

வடகொரியாவில் ஆப்பிள் நிறுவன பொருட்களுக்கு ஸ்ட்ரிக்ட் கட்டுப்பாடாம். சொல்லப்போனால் அந்த நாட்டு மக்களுக்கு எலெக்ட்ரானிக் பொருட்கள் பற்றி அறிவு அதிகம் இருக்காதாம். 

வட கொரியாவில், பைபிள் மேற்கத்திய கலாச்சாரத்தின் அடையாளமாகக் கருதப்படுகிறது.அதனால் அந்த நூலுக்கு தடை விதிக்கப்பட்டுள்ளது.
2014 ஆம் ஆண்டில், வட கொரியாவில் சுற்றுப்பயணம் மேற்கொண்ட அமெரிக்க குடிமகன் ஜெஃப்ரி ஃபோல் என்பவர்  உணவகத்தின் குளியலறையில் மறந்து பைபிளை விட்டுவிட்டார். உடனே கைது செய்து  ஐந்து மாதங்கள் சிறையில் அடைத்துள்ளனர்.

நாமெல்லாம் பள்ளி படிக்கும்போது அங்கிருக்கும் பெஞ்சில் தான் நம் கலை ஆர்வத்தை காட்டிக்கொண்டு இருப்போம். ஆனால், வடகொரியா வகுப்பில் உள்ள மேசை மற்றும் நாற்காலிகளுக்கு மாணவர்கள் கட்டணம் செலுத்த வேண்டும்! பள்ளிக் கட்டணத்தில் இது சேர்ந்ததாம். நல்லவேளை நம்ம ஊர் பள்ளிகளுக்கு இந்த ஐடியா இன்னும் வரல...வந்தா என்ன ஆகும்???

வடகொரியா அரசு கூடைப்பந்து விளையாட்டு விதிகளையே மாற்றியுள்ளது. பொதுவாக , ஒரு ஸ்லாம் டங்க் 2 புள்ளி மதிப்புள்ளது. ஆனால் இங்கே 3 புள்ளியும்.. விளையாட்டின் கடைசி மூன்று நிமிடங்களில் எடுக்கும் ஷாட்கள் பொதுவாக 2-புள்ளி மதிப்பு இருக்கும். அனால் வடகொரியாவில்  8 புள்ளிகளாம் . மேலும், நீங்கள் 3 ஷாட்களைத் தவறவிட்டால், ஒரு புள்ளி கழிக்கப்படும்.

உலகின் பிற பகுதிகள் பயன்படுத்தும் நாட்காட்டியை அவர்கள் பயன்படுத்துவதில்லை.  வட கொரியாவில் ஜூச்சே நாட்காட்டி என்ற வித்தியாசமான நாட்காட்டி உள்ளது. இது அவர்களின் அன்பான புரட்சித் தலைவர் கிம் இல் சுங்கின் பிறந்த தேதி ஏப்ரல் 15, 1912 இல் தொடங்குகிறது. 

கம்யூனிஸ்ட் புரட்சிக்குப் பிறகு வட கொரியாவின் முதல் தலைவராக இருந்த கிம் இல் சுங் நீண்ட காலத்திற்கு முன்பு இறந்தார்,  அதனால்தான் அவரது முன்னோரின் மரணத்திற்குப் பிறகு அவரது மகனும் இப்போது பேரனும் மிக எளிதாக ஆட்சியைப் பிடிக்க முடிந்தது. அவர் இன்னும் நாட்டின் தலைவராக கருதப்படுகிறார்.

கிம் ஜாங்-உன் உடனான சந்திப்பின் போது தூங்குவது தலைவருக்கு விசுவாசமற்றதாகக் கருதப்படுகிறது. மீறி கொஞ்சம் கண் அசந்துவிட்டால்  மரணம் தான். 2015 ஆம் ஆண்டில், வட கொரியாவின் பாதுகாப்பு அமைச்சர் ஹியோன் யோங்-சோல், கிம் ஜாங்-உன் முன்னிலையில் தூங்குவது போன்ற நடத்தைக்காக 100 பேர் முன்னிலையில்  துப்பாக்கியால் சுட்டுக் கொல்லப்பட்டார்.

அதுபோல சின்ன தப்பு செய்தாலும் இங்கு பெரிய தண்டனை தான் . தண்டனையும் நம் ஊரை போல 2 வருடம் அதிகபட்சம் 20 வருடம் என்றெல்லாம்  நினைக்க வேண்டாம். 3 தலைமுறைக்கு வைத்து செய்வார்களாம். சிறையில் இருந்து தப்பிக்க நினைத்தால்  குடும்பத்தையே கொன்றுவிடுவார்களாம். நம் சினிமா வில்லன்கள் சொல்லும் செயலை அங்கே செய்து காட்டுகிறார்கள் போல ..

அது போக அவர்களது தலைநகரில் வசிக்க வேண்டும் என்றால் உரிய காரணம் சொல்லி அனுமதி பெற வேண்டுமாம். நாட்டை விட்டு உரிய அனுமதி அல்லது காரணம் இல்லாமல் ஒரு அடிகூட எடுத்து வைக்க முடியாது. முயன்றால் மரணம் தான். பெரும்பாலும் இந்த நாட்டை விட்டு யாரும் வெளியே அனுப்பப்படுவதில்லை.

இசை, கலை, கச்சேரி என்று வந்தால் கூட உள்நாட்டுக்குள் இருப்பதைத்தான் பார்க்கவேண்டும் , கேட்கவேண்டும். மீறி வெளிநாட்டு இசைகளை கேட்டால் சிறை தண்டனை. வட கொரியாவில் டிவியில் மூன்று சேனல்கள் மட்டுமே உள்ளன. மேலும் அனைத்து உள்ளடக்கமும் அரசாங்கத்தால் கட்டுப்படுத்தப்படுகிறது.

வடகொரியர்கள் அனைவரும் தங்களது வாழ்க்கையில் ஒரு முறையேனும் ராணுவத்தில் பணியாற்றவேண்டும். ஆண்களுக்கு 10 வருடம், பெண்களுக்கு 7 வருடம் என்பது கட்டாயம்.

வடகொரியா செல்லும் ஒவ்வொரு சுற்றுலாப் பயணிக்கும் ஒரு வழிகாட்டி நியமிக்கப்படுகிறார், அவர் பயணம் முழுவதும் கூடவே இருப்பார். யாராவது தங்கள் குழுவை விட்டு வெளியேறினால் அல்லது உள்ளூர் ஒருவருடன் பேச முயன்றால், அவர்கள் கைது செய்யப்படுவார்கள். இதனுடன், சுற்றுலாப் பயணிகள் குறிப்பிட்ட இடங்களுக்கும், சில வழித்தடங்களிலும் மட்டுமே அழைத்துச் செல்லப்படுகின்றனர்.அதேபோல அங்குள்ள மக்கள் வெளிநாட்டு மக்களுடன் நேரடியாகவோ அல்லது போனிலோ பேசினால்  கதம் கதம் தான்.