சீனாவில் 1000 ஆயிரம் ஆண்டுகள் இல்லாத அளவு கனமழை... அணை எந்நேரமும் உடையும் அபாயம்

சீனாவில் கடந்த ஆயிரம் ஆண்டுகளில் இல்லாத அளவில் பெய்துள்ள கனமழையால் லட்சக்கணக்கானோர் பாதிக்கப்பட்டுள்ளனர். யிஹெடான் அணை எந்நேரமும் உடையலாம் என ராணூவம் எச்சரித்துள்ளதால் மக்கள் பீதியில் ஆழ்ந்துள்ளனர்.

உலகின் பல்வேறு நாடுகளில் பெரும் பாதிப்பை ஏற்படுத்தி வரும் இயற்கையின் சீற்றம் சீனாவையும் விட்டு வைக்கவில்லை.

கடந்த 20 ஆம் தேதியன்று ஸெங்ஸோ நகரில் ஒரு மணி நேரத்தில் 209 மில்லி மீட்டர் மழை கொட்டியது. இதனால் பெருக்கெடுத்து ஓடிய மழைநீர், சுரங்க ரயில் பாதைக்குள் நுழைந்தது. ரயில் பாதையை நிறைத்துக் கொண்டு ஓடிய நீரில் பயணிகள் சிக்கிக் கொண்டனர்.

நொடிக்கு நொடி நீர்மட்டம் ஏறிய நிலையில் உயிரை கையில் பிடித்துக் கொண்டு பயணிகள் காத்திருந்தனர். கழுத்து வரை நீர்மட்டம் ஏறிய நிலையில் மீட்புப்படையினரால் அவர்கள் மீட்கப்பட்டனர்.

சுரங்கப்பாதையை நிறைத்து ரயிலுக்குள் புகுந்த மழைநீரால் 12 பேர் உயிரிழந்ததாகத் தெரிவிக்கப்பட்டுள்ளது. ஹெனான் மாகாணத்தின் போக்குவரத்து மையமாக கருதப்படும் ஸெங்ஸோ நகரில் சாலைகள் ஆறுகளாக மாறியிருக்க, கார்கள் அவற்றில் அடித்துச் செல்லப்பட்டுக் கொண்டிருக்கின்றன.

வெள்ள பாதிப்பில் இருந்து பொதுமக்களை மீட்கும் பணிகள் போர்க்கால அடிப்படையில் முடுக்கி விடப்பட்டுள்ளன. மீட்புப் பணிகளை மேற்கொள்ள ஏழு மாகாணங்களில் இருந்து 3 ஆயிரம் படை வீரர்கள், 1800 மீட்புப்படையினர் ஹெனான் மாகாணத்திற்கு அனுப்பப்பட்டுள்ளனர்.வெள்ள பாதிப்பால் இதுவரை 25 பேர் உயிரிழந்துள்ள நிலையில், மேலும் பலர் மாயமாகியுள்ளனர்.

கடந்த சனிக்கிழமை முதல் செவ்வாய் வரை ஸெங்ஸோவில் 617.1 மில்லி மீட்டர் மழை பெய்துள்ளது. அப்பகுதியில் ஆண்டு தோறும் பெய்யும் மழையின் மொத்த அளவு 640 மில்லி மீட்டர். வருடாந்தர மழை, மூன்றே நாட்களில் பெய்ததால் மஞ்சள் நதி மற்றும் ஹைஹே நதிகளில் அபாய அளவில் நீர் மட்டம் உயர்ந்துள்ளது. யிஹெடான் அணை எந்நேரமும் உடையலாம் என ராணுவம் எச்சரித்துள்ளதால் மக்கள் பீதியில் ஆழ்ந்துள்ளனர்.

சீனாவில் வெள்ள நீர் பொதுமக்கள் இயல்பு வாழ்க்கை பாதிக்கப்பட்டுள்ளதால் அரசு பல்வேறு மீட்பு பணிகளை துரிதப்படுத்தி உள்ளது.