ஆப்ரிக்க நாடான காங்கோவில் கடும் வெள்ளப்பெருக்கு... 200-க்கும் மேற்பட்டோர் பலி... நெஞ்சை உருக்கும் காட்சிகள்!

காங்கோவின் கிழக்கு பகுதியில் திடீரென்று கனமழை பெய்தது. இதனால் ஆறுகளில் வெள்ளப்பெருக்கு ஏற்பட்டு பல்வேறு கிராமங்களை நீர் சூழ்ந்தன.

குறிப்பாக நயாமுகுபி என்ற கிராமத்தில் சுமார் 100 வீடுகள் வெள்ளத்தில் அடித்து செல்லப்பட்டன. மேலும் பல்வேறு இடங்களில் நிலச்சரிவு ஏற்பட்டன. இதில், ஏராளமானோரை காணவில்லை என்றும் கூறப்பட்டது.

தற்போது மழை குறைந்த நிலையில் மீட்புப் பணிகள் தீவிரமாக நடைபெற்று வருகின்றன. இதில், வெள்ளத்தில் அடித்துச் செல்லப்பட்டும், நிலச்சரிவில் சிக்கியும் ஆங்காங்கே ஒதுங்கிய உடல்கள் கண்டெடுக்கப்பட்டன.

இதுவரை சுமார் 203 உடல்கள் கண்டெடுக்கப்பட்டுள்ளதாக அந்நாட்டு அரசு தெரிவித்துள்ளது. எஞ்சியவர்களை தேடும் பணியும் தொடர்ந்து நடைபெற்று வருவதால், உயிரிழப்புகள் மேலும் அதிகரிக்கும் என்று அஞ்சப்படுகிறது.

இந்நிலையில், வெள்ளம் மற்றும் நிலச்சரிவில் சிக்கி உயிரிழந்தவர்களுக்கு அஞ்சலி செலுத்தும் வகையில், ஒரு நாள் துக்க தினமாக அனுசரிக்கப்படும் என்று அந்நாட்டு அதிபர் பெலிக்ஸ் தெரிவித்துள்ளார்.