தாலிபான்களுக்கு எதிராக துப்பாக்கி ஏந்திய பெண்கள்: ஆப்கான் வீதிகளில் பேரணி

ஆப்கானிஸ்தானில் தீவிரவாதிகள் மற்றும் அரச படைகளுக்கு இடையே சுமார் 20 ஆண்டுகளாக உள் யுத்தம் நடைபெற்று வருகிறது. அரசு படைகளுக்கு ஆதரவாக அமெரிக்கா படைகளும் இந்த உள்நாட்டு போரில் ஈடுபட்டு வந்தன. இந்நிலையில், ஆப்கானிஸ்தான் போரை நிரந்தரமாக முடிவுக்கு கொண்டுவர அமெரிக்கா விரும்பியது.

இதன் காரணமாக கடந்த பிப்ரவரி மாதம் அமெரிக்கா- தலிபான்கள் இடையே வரலாற்று சிறப்புமிக்க ஒப்பந்தம் கையெழுத்தானது. அதன்படி, ஆப்கானிஸ்தானை விட்டு அமெரிக்க படைகள் வெளியேறும் என்றும் தெரிவிக்கப்பட்டது. இதன்படி, தங்கள் கட்டுப்பாட்டில் இருந்த பக்ரம் விமான தளத்தில் இருந்து சில நாட்களுக்கு முன்பு அமெரிக்க படைகள் வெளியேறியது.

ஆப்கன் தாலிபான் மற்றும் ஆப்கன் இராணுவத்திற்கு இடையிலான மோதல்கள் நாட்டின் பெரும்பாலான மாவட்டங்களில் நடந்து வருகின்றன. மேலும் இரு தரப்பினரும் தாங்கள் வெற்றி பெற்றதாகவும் போர் உத்திகளைப் பற்றியும் கூறுகின்றனர். தாலிபான் நிறையப் பகுதிகளில் வெற்றி பெற்றுவருகிறது என்று செய்திகள் வருகின்றன. குறிப்பாக, கிராமப் புறப் பகுதிகளை தாலிபான் கைப்பற்றிவருகிறது.

அதனால், நாட்டு மக்கள் மத்தியில் அச்சம் நிலவுகிறது, மேலும் தாலிபன்கள் தாங்கள் வெற்றி பெற்றதாகக் கூறிக்கொள்வதால், பெண்கள், ஒரு காலத்தில், தாலிபன் ஆதிக்கத்தில் ஆஃப்கன் இருந்ததையும் அப்போது பெண்களுக்கு எதிரான கொடுமைகள் அரங்கேறியதையும் அச்சத்துடன் மக்கள் நினைவு கூறுகின்றனர்.

கடந்த சில நாட்களாக, ஆஃப்கன் பெண்கள் ஆயுதமேந்தி நிற்கும் படங்கள் சில வெளியாயின. அவர்களில் பெரும்பாலோர் துப்பாக்கிகளையும் ஆப்கானிஸ்தானின் கொடியையும் சுமந்து நிற்கின்றனர். ஆஃப்கானிஸ்தானின் வடக்கு மற்றும் மத்தியப் பகுதிகளில் பெண்கள் தெருக்களில் துப்பாக்கிகளுடன் பேரணியில் ஈடுபட்டுள்ளனர்.

தாலிபான்களுக்கு எதிரான கோஷங்களை எழுப்புவதுடன் துப்பாக்கியுடன் தாங்கள் இருக்கும் புகைப்படங்களை சமூக வலைதளங்களில் வெளியிட்டுவருகின்றனர். இந்தப் பெண்கள் ஆப்கானிஸ்தான் தேசிய இராணுவத்திற்கு ஆதரவாகக் களமிறங்கியுள்ளனர். தாலிபன்களுடன் அரசாங்கத்தால் தனியாகப் போராட முடியாது, எனவே தாங்களும் அரசாங்கத்துக்கும் இராணுவத்துக்கும் ஆதரவாக நிற்பதாக அவர்கள் கூறுகிறார்கள்.

சமூக ஊடகங்களில் வெளிவந்த படங்கள் ஜோஸ்ஜான் மற்றும் கௌர் பகுதிகளைச் சேர்ந்தவை. இருப்பினும், ஆப்கானிஸ்தானில் பெண்களின் இந்த முன்னெடுப்பு, காபூல், ஃபார்யாப், ஹெராத் மற்றும் பிற நகரங்களிலும் கூட தொடங்கியுள்ளது.