என்றென்றும் தஞ்சை மண்ணுக்கு தலைவணங்குகிறேன்: தஞ்சாவூர் மக்கள் புகாருக்கு வனிதா விளக்கம்

தஞ்சாவூர் குறித்து யாருடைய மனதையும் புண்படுத்துவதற்காக பேசவில்லை என்று வனிதா விஜயகுமார் விளக்கமளித்துள்ளார்.

நடிகை வனிதா சமீபத்தில் தஞ்சாவூர் மாவட்டம் குறித்து பேசிய வீடியோ சமூக வலைதளத்தில் தீயாய் பரவியது. அந்த வீடியோவில் ”எங்க ஊர் தஞ்சாவூரில் இரண்டு திருமணங்கள் செய்துகொள்வது இயல்பு. ஏன் என் அப்பா விஜயகுமார் கூட இரண்டு திருமணங்கள் செய்தவர் தான்” என்று தெரிவித்திருப்பார்.

மேலும், தஞ்சாவூர் மாவட்டத்தில் எந்த வீட்டில் பார்த்தாலும் ஆண்கள் அங்கு இரண்டு திருமணம்தான் பன்னிருப்பாங்க. அது தான் அங்க வழக்கம் என்றும் அது தவறு இல்லை என்றும் வனிதா அந்த வீடியோவில் பேசியிருந்தார்.

இந்நிலையில், அனைவரின் வீட்டிலும் இரு மனைவிகள் இருப்பார்கள் என தஞ்சாவூர் மக்களை பற்றி சமூக வலைதளங்களில் அவதூறாக பேசியதை கண்டித்தும் அவர் மீது வழக்குப் பதிவு செய்து உரிய நடவடிக்கை எடுக்க வேண்டும் என பட்டுக்கோட்டை காவல் நிலையத்தில் காங்கிரஸ் கட்சியின் சார்பாக புகார் அளிக்கப்பட்டுள்ளது.

இதே போல் தஞ்சாவூர் மாவட்டத்தில் மாவட்ட ஆட்சியர் அலுவலகத்திலும், காவல் கண்காணிப்பாளர் அலுவலகத்திலும் பாரதிய ஜனதா கட்சியின் சார்பாகவும் நடிகை வனிதாவிற்கு எதிராக புகார் மனு அளிக்கப்பட்டுள்ளது.தஞ்சை மக்களை இழிவுபடுத்தும் வகையில் பேசியதாகவும், மேலும் தஞ்சை மாவட்டத்தில் உள்ள ஆண்களையும், பெண்களையும் தரகுறைவாக விமர்சித்து உள்ளதாகவும், உடனடியாக அவர் இது குறித்து வருத்தம் தெரிவிக்க வேண்டும்’ என்று வலியுறுத்தியிருந்தனர்.

இதுகுறித்த வனிதாவின் ட்விட்டர் பதிவில், ‘தஞ்சாவூர் என்னுடைய சொந்த ஊர். அந்த ஊரின் பாரம்பரியம் குறித்தும் கலாச்சாரம் குறித்தும் நான் பெருமிதம் கொள்கிறேன்’ என்று குறிப்பிட்டுள்ளார்.

மேலும் அவர், ‘என்னுடைய குடும்பமாக இருக்கும் என் மக்களை காயப்படுத்தும் வகையில் நான் எப்போதும் எதுவும் பேசவில்லை. ஆண்கள் அவர்களுடைய குடும்பத்தைப் பார்த்துக்கொள்வார்கள் என்றும் அவர்களுடைய கடமைகளுக்கு பொறுப்பாக இருப்பார்கள் என்று பெருமைப்படுத்தும் வகையில்தான் பேசினேன்’ என்று குறிப்பிட்டுள்ளார்.

தொடர்ந்த அவர், ‘தஞ்சாவூரிலிருக்கும் என்னுடைய சகோதர, சகோதரிகளே என்னுடைய கோபத்தையும், குரலையும் உங்களை அவமானப்படுத்திவிட்டேன் என்று தவறாகப் புரிந்துகொள்ளவேண்டும் என்று அன்புடன் கேட்டுக்கொள்கிறேன். என்றென்றும் என் தஞ்சை மண்ணுக்குத் தலை வணங்குகிறேன்’ என்று விளக்கமளித்துள்ளார்.