2019-ன் டாப் 10 வசூல் படங்கள்... பேட்ட, விஸ்வாசம், பிகில் எந்த இடம்..?

2019-ம் ஆண்டில் வெளியான டாப் 10 வசூல் படங்கள் ஒரு தொகுப்பு.

அயன், மாற்றான் படங்களை அடுத்து சூர்யா - கே.வி.ஆனந்த் கூட்டணியில் உருவாகிய படம் காப்பான். இந்தப் படத்தில் மோகன்லால், ஆர்யா, சாயிஷா சைகல், பொமன் இரானி உள்ளிட்ட பலர் நடித்துள்ளனர். இந்தப் படத்தில் நடிகர் மோகன்லால் இந்திய பிரதமராகவும், அவருக்கு பாதுகாப்பளிக்கும் உயர் அதிகாரியாக சூர்யாவும் நடித்திருந்தார். இந்த ஆண்டின் வசூல் வரிசையில் சூர்யாவின் காப்பான் 10-வது இடத்தை பிடித்துள்ளது.

அறிமுக இயக்குனர் பிரதீப் ரங்கநாதன் இயக்கத்தில் ஜெயம் ரவி, காஜல் அகர்வால் ஆகியோர் நடிப்பில் கடந்த ஆகஸ்ட் 15-ம் தேதி வெளியான திரைப்படம் கோமாளி. 16 ஆண்டுகள் கோமாவில் இருந்த இளைஞன் இடைப்பட்ட காலத்தில் ஏற்பட்ட நவீன மாற்றங்களை வியப்புடன் பார்ப்பதை வேடிக்கையாக சொல்லி உள்ள கோமாளி திரைப்படம் ரசிகர்கள் மத்தியில் நல்ல வரவேற்பை பெற்றது. இந்த ஆண்டின் வசூல் வரிசையில்  ஜெயம் ரவியின் கோமாளி 9-வது இடத்தை பிடித்துள்ளது.

வடசென்னை படத்தை அடுத்து வெற்றிமாறன் இயக்கத்தில் தனுஷ் நடித்துள்ள படம் அசுரன். பூமணி எழுதிய ‘வெக்கை’ நாவலை அடிப்படையாக வைத்து உருவாக்கிய இந்தப் படத்தில் நடிகர் தனுஷ் நடித்துள்ளார். இந்த படத்தில் மலையாள நடிகை மஞ்சு வாரியர், பசுபதி, இயக்குநர் பாலாஜி சக்திவேல், கென், பவன் ஆகியோர் முக்கியக் கதாபாத்திரங்களில் நடித்திருந்தனர். ரசிகர்களிடையே நல்ல வரவேற்பை பெற்ற அசுரன் இந்த ஆண்டின் வசூல் வரிசையில் 8-வது இடத்தை பிடித்துள்ளது.

மிஸ்டர் லோக்கல் படத்திற்கு பிறகு பாண்டிராஜ் இயக்கத்தில் சிவகார்த்திகேயன் நடித்த படம் நம்ம வீட்டு பிள்ளை. சிவகார்த்திகேயனின் 16-வது படமான இந்தப்படத்தை சன் பிக்சர்ஸ் நிறுவனம் தயாரித்திருந்தது. இந்தப் படத்தில் சிவகார்த்திகேயனுக்கு ஜோடியாக அனு இம்மானுவேல் நடித்திருந்தார். தங்கையாக நடிகை ஐஸ்வர்யா ராஜேஷ் நடித்த இந்த படம் தமிழ் குடும்பத்தினரிடையே பெரும் வரவேற்பை பெற்றது. டி.இமான் இசையமைத்த இந்த படத்தின் பாடல்கள் பட்டி தொட்டியெங்கும் ஒலித்த நிலையில் இந்த ஆண்டிற்கான வசூல் வரிசையில் 7-வது இடத்தை பிடித்துள்ளது.

மாநகரம் பட இயக்குநர் லோகேஷ் கனகராஜ் இயக்கத்தில் கார்த்தி நடிப்பில் வெளியான படம் கைதி. கடந்த தீபாவளிக்கு வெளியான இந்தப் படத்தை ட்ரீம் வாரியர் பிக்சர்ஸ் நிறுவனம் தயாரித்திருந்தது.
முழுக்க இரவிலேயே நடக்கும் கதை, ஹீரோயின், பாடல்கள் என வழக்கமான சினிமா பாணியிலிருந்து விலகி தனித்து நிற்கும் இந்தப் படத்தை பலரும் பாராட்டியதோடு வசூலையும் வாரிக் குவித்தது. இந்த ஆண்டின் வசூல் வரிசையில் கார்த்தியின் கைதி 6-வது இடத்தை பிடித்துள்ளது.

அஜித் நடிப்பில் ஹெச்.வினோத் இயக்கத்தில் உருவாகியுள்ள நேர்கொண்ட பார்வை படம் கடந்த ஆகஸ்ட்  8-ம் தேதி வெளியானது. இந்தியில் வெளியாகி ஹிட் அடித்த இந்தப் படம், தமிழிலும் நல்ல வரவேற்பைப் பெற்றது. அஜித் வழக்கறிஞராக நடித்துள்ள இந்தப் படத்தில் அவருக்கு ஜோடியாக வித்யாபாலன் நடித்திருந்தார். பிங்க் படத்தின் கதைக்கருவை வைத்துக் கொண்டு தமிழில் சிலமாற்றங்களை செய்து ரசிகர்களை தன்வசப்படுத்தினார் இயக்குநர் வினோத். இந்த ஆண்டிற்கான வசூல் வரிசையில் நேர்கொண்ட பார்வை 5-வது இடத்தை பிடித்துள்ளது.

ராகவா லாரன்ஸ் இயக்கத்தில் வெளியான காஞ்சனா-3 படம் கலவையான விமர்சனங்களை பெற்றிருந்தாலும் குழந்தைகள், குடும்பங்கள் கொண்டாடும் படமாக மாறி வசூல் வேட்டை நடத்தியது. அந்த வகையில் காஞ்சன இந்த ஆண்டிற்கான வசூல் வரிசையில் 4-வது இடத்தை பிடித்துள்ளது.

அஜித் - சிவா கூட்டணியில் சத்ய ஜோதி பிலிம்ஸ் தயாரிப்பில் உருவான படம் விஸ்வாசம். இந்தப் படத்தில் அஜித்துக்கு ஜோடியாக நயன்தாராவும், அவருக்கு மகளாக அனிகாவும் நடித்திருந்தனர். இவர்களுடன் தம்பி ராமையா, யோகி பாபு, ரோபோ சங்கர், கோவை சரளா உள்ளிட்டோர் நடித்திருந்தனர். இந்த ஆண்டிற்கான வசூல் வரிசையில் அஜித்தின் விஸ்வாசம் 3-வது இடத்தை பிடித்துள்ளது.

கார்த்திக் சுப்புராஜ் இயக்கத்தில் சூப்பர் ஸ்டார் ரஜினிகாந்த் நடித்திருக்கும் படம் பேட்ட. இப்படம் ஜனவரி 10 அன்று திரைக்கு வந்தது. இந்தப் படத்தை சன் பிக்சர்ஸ் நிறுவனம் தயாரித்துள்ளது. படத்தில் ரஜினிகாந்த், ‘காளி’ என்ற கதாபாத்திரத்திலும் அவருக்கு வில்லனாக விஜய் சேதுபதி ‘ஜித்து’ என்ற கதாபாத்திரத்திலும் நடித்திருந்தனர். ரஜினியின் பேட்ட படம் இந்த ஆண்டின் வசூல் வரிசையில் 2-வது இடத்தை பிடித்துள்ளது.

அட்லீ இயக்கத்தில் வெளியான படம் பிகில். விஜய் ஹீரோவாக நடித்திருக்கும் இந்தத் திரைப்படம் பெண்கள் கால்பந்து விளையாட்டை மையப்படுத்தி எடுக்கப்பட்டிருந்தது. இந்தப் படத்தில் விஜய்க்கு ஜோடியாக நயன்தாராவும், அவர்களுடன் ஜாக்கி ஷெராஃப், யோகி பாபு, ஆனந்தராஜ் உள்ளிட்டோரும் முக்கிய கதாபாத்திரத்தில் நடித்திருந்தனர். 2019-ம் ஆண்டிற்கான வசூல் வரிசையில் பிகில் முதல் இடத்தை பிடித்துள்ளது.