'மதத்தைப் பார்த்து விமான நிலையத்தில் சோதனை’.. பகீர் குற்றச்சாட்டை கிளப்பிய சனம்.. விளக்கம் அளித்த அதிகாரிகள்!

'பிக் பாஸ்' நிகழ்ச்சியின் முன்னாள் போட்டியாளர்களில் ஒருவரான நடிகை சனம் ஷெட்டி அளித்த புகாருக்கு விமான நிலைய அதிகாரி ஒருவர் பதிலளித்துள்ளார்.

சனம் ஷெட்டி தனது இன்ஸ்டாகிராம் பக்கத்தில் விமான நிலையத்தில் தனக்கு ஏற்பட்ட கசப்பான அனுபவத்தை வீடியோவாக பதிவிட்டிருந்தார்.

கோயம்புத்தூரில் இருந்து சென்னை செல்வதற்காக விமான நிலையம் வந்தடைந்தபோது, பெண் அதிகாரி ஒருவர் எனது கைப்பை மற்றும் குறிப்பிட்ட மதத்தைச் சேர்ந்த இருவரின் பைகளை மட்டும் சோதனையிட்டார். அதிகாரியிடம் விளக்கம் கேட்டபோது, குடியரசு தின விழாவையொட்டி இந்த சோதனை நடத்தப்படுவதாக தெரிவித்தார், என சனம் ஷெட்டி அந்த வீடியோவில் தெரிவித்திருந்தார்.

அந்த இரண்டு நபர்களால் மட்டுமே விமானத்தில் ஆபத்தான ஆயுதங்களை எடுத்து வர முடியுமா, மற்றவர்களால் எடுத்து வர முடியாதா எனவும் கேள்வி எழுப்பினார்.

மற்றவர்களை விட்டுவிட்டு குறிப்பிட்டவர்களை மட்டும் பரிசோதித்தது, அவமானப்படுத்தும் நோக்கில் இருந்ததாகவும் குறிப்பிட்டார்.

இதையடுத்து, நாடு முழுவதும் குடியரசு தின விழா கொண்டாடப்படுவதையொட்டி, முன்னெச்சரிக்கை நடவடிக்கையாக திடீர் சோதனை நடத்த அறிவுறுத்தப்பட்டுள்ளதாக கோவை விமான நிலைய இயக்குநர் செந்தில் வளவன் விளக்கம் அளித்துள்ளார்.

நடிகை சனம் ஷெட்டி கூறியது போல் குறிப்பிட்ட நபர்கள் யாரையும் தேர்வு செய்து பரிசோதிக்கவில்லை என்றும் மறுத்தார்.

எனினும், அவரது புகாரின் அடிப்படையில் விசாரணை நடத்தவும் உத்தரவிட்டுள்ளார்.