மெகா ஹிட்டான லவ் ஸ்டோரி.. முதல் நாள் வசூல் எவ்வளவு தெரியுமா ?

கொரோனா பெருந்தொற்றுக்குப் பின் இந்தியாவில் இப்போதுதான் திரையரங்குகளில் படங்கள் வெளியாக ஆரம்பித்துள்ளன. தெலுங்கைப் பொறுத்தவரை சமீபத்தில் திரையரங்கில் வெளியான சீட்டிமார் திரைப்படம் மோசமில்லாத வசூலை பெற்றது. கோபிசந்த் நடித்திருந்த ஆக்ஷன் என்டர்டெயினர் இந்தப் படம். 

வெள்ளிக்கிழமை வெளியான சேகர் கம்முலாவின் லவ் ஸ்டோரி திரைப்படத்துக்கு பெரும் எதிர்பார்ப்பு நிலவியது. காரணம், இயக்குனர் சேகர் கம்முலா. அவர் இயக்கியப் படங்கள் சோடை போனதில்லை. அமீர் கான் உள்பட பிரபல நட்சத்திரங்கள் லவ் ஸ்டோரியை புரமோட் செய்திருந்தனர். 

நாக சைதன்யா, சாய் பல்லவி, தேவயானி, ஈஸ்வரிராவ் நடித்திருந்த இந்தப் படம் வெளியான முதல்நாளில் நிசாம் பகுதியில் மட்டும் தயாரிப்பாளர் ஷேராக 3.5 கோடிகளை வசூலித்துள்ளது. உலக அளவில் முதல்நாள் ஷேர் மட்டும் 10 கோடிகளுக்கும் மேல். சனிக்கிழமையான இன்று முன்பதிவு மிக அதிகமாக உள்ளதாக தகவல்கள் தெரிவிக்கின்றன. நாளை இது இன்னும் அதிகரிக்கும். சேகர் கம்முலா அடுத்து தனுஷ் நடிக்கும் பான் - இந்தியா திரைப்படத்தை இயக்குகிறார். 

அடுத்த மாதம் சாய் தரம் தேஜின் ரிபப்ளிக், அகில் அக்னேனியின் மோஸ்ட் எலிஜிபிள் பேச்சிலர், சித்தார்த், சர்வானந்த் நடித்துள்ள மகாசமுத்திரா ஆகிய முக்கிய படங்கள் தெலுங்கில் வெளியாகின்றன.