துறுதுறு நடிப்பு.. இளம் வயதிலேயே பல்வேறு விருதுகள்.. மீரா ஜாஸ்மின் பிறந்தநாள் இன்று!

இரண்டாயிரங்களின் தொடக்கத்தில் தன் துறுதுறு நடிப்பு குறுகுறு பார்வையின் மூலம் பிரபலமான நடிகை மீரா ஜாஸ்மினின் பிறந்தநாள் இன்று

பிரபல மலையாள இயக்குநர் லோகிததாஸ் மூலம் "சூத்ரதரன்" எனும் படத்தில் அறிமுகப்படுத்தப்பட்ட மீரா ஜாஸ்மின் மூன்று வருடத்திலேயே 'பாடம் ஒன்னு;ஒரு விலபம்' படத்திற்காக மலையாளத்தில் தேசிய விருது வாங்கினார்.

அதுமட்டுமில்லாமல் தமிழக அரசின் சிறந்த நடிகைக்கான விருது மற்றும் கலைமாமணி விருது என இளம் வயதிலேயே பல்வேறு விருதுகள் மீரா ஜாஸ்மினுக்கு கிடைத்தன.

தமிழில் லிங்குசாமியின் ரன் படம் மூலம் அறிமுகமான மீரா ஜாஸ்மின் முதல் படத்திலிருந்தே யார் இந்த பெண் என எல்லோரையும் ஆச்சரியம் கொள்ள வைத்தார். ரன் படத்தின் பாடல்கள் அனைத்திலும் மீரா ஜாஸ்மின் அழகுப் பதுமையாய் தோன்றினார்.

முதல் படமே மிகப்பெரிய வெற்றி அடைந்த காரணத்தினால் அடுத்ததாக விஜய் உடன் "புதிய கீதை" படத்தில் இணைந்தார். இந்தப் பக்கம் அஜித்திற்கு "ஆஞ்சநேயா" படத்தில் ஜோடி சேர்ந்தார். ஆனால் துரதிஷ்ட வசமாக புதிய கீதை, ஆஞ்சநேயா என இரண்டு படங்களுமே வணிக ரீதியாக பெரிதாக சோபிக்க தவறின.

தோல்விகளில் துவண்ட மீரா ஜாஸ்மினுக்கு லிங்குசாமியே, மீண்டும் "சண்டைக்கோழி "படம் மூலம் பெரிய வெற்றியை தேடிக் கொடுத்தார்." தாவணி போட்ட தீபாவளி "பாடல் முழுவதுமே மீரா ஜாஸ்மினின் இளமை ததும்பும் நடிப்பு எல்லோரையும் கவர்ந்திழுத்தது.விஷாலை சுலபமாய் கையாளும் மீரா ஜாஸ்மினின் குறும்புத் தனம் பெருவாரியாக ரசிக்கப்பட்டது.

சில வருடங்கள் கழித்து பரத்துடன் "நேபாளி"படம் மூலம் இணைந்தார்.ஆனால் நேபாளி படத்தின் பாடல்கள் மட்டுமே ஹிட் ஆகின.பெரிய எதிர்பார்ப்புடன் வெளியான இப்படம் ஏனோ வெற்றியடையவில்லை.

என்னதான் தமிழில் சில தோல்வி படங்களில் தலை காட்டி இருந்தாலும் கூட மலையாள சினிமாக்களில் அப்போது சிறந்த நடிப்பு வழங்கிக் கொண்டுதான் இருந்தார் மீரா ஜாஸ்மின். அவ்வப்போது உடல் எடையை குறைத்து அழகான புகைப்படங்களை வெளியிட்டும் வருகிறார்..