காதலர் தினம் 2023: காதல் to கல்யாணம்... லவ் மேரேஜ் செய்த தமிழ் திரை பிரபலங்கள்.!

பிரபலங்களின் திருமணம் என்றால் ரசிகர்களிடையே அதிகளவு எதிர்ப்பார்ப்பு இருக்கும். அதுவும் அவர்கள் திரையில் பார்த்து ரசித்த அவர்களுக்கு மிகவும் பிடித்த நடிகர், நடிகை காதலித்து திருமணம் செய்துகொண்டால் சொல்லவா வேண்டும்.? அந்த வகையில் இதுவரை தமிழ் சினிமாவில் காதலித்து திருமணம் செய்து கொண்ட பிரபலங்களைப் பற்றி இங்கே பார்க்கலாம்...

நடிகர் ரஜினிகாந்த கடந்த 1981ஆம் ஆண்டு லதாவை காதலித்து திருப்பதியில் திருமணம் செய்துகொண்டார். இவர்கள் இருவருக்கும் ஐஸ்வர்யா மற்றும் சௌந்தர்யா என இரு பெண் பிள்ளைகள் உள்ளனர்.

ரசிகர்களால் தல என்று அழைக்கப்படும் அஜித்தும், குழந்தை நட்சத்திரமாக அறிமுகமாகி பின் கதாநாயகியாக மாறிய ஷாலினியும் அமர்க்களம் படப்பிடிப்பின் போது காதல் வயப்பட்டு இருவரும் 2000ல் திருமணம் செய்து கொண்டனர். தற்போது அவர்களுக்கு ஒரு மகளும் ஒரு மகனும் உள்ளனர்.

தமிழ் திரையுலகில் முன்னணி நடிகராக இருக்கும் சூர்யா பூவெல்லாம் கேட்டுப்பார், மாயாவி, காக்க காக்க, ஆகிய படங்களில் தன்னுடன் நடித்த நடிகை ஜோதிகாவை காதலித்து திருமணம் செய்துகொண்டார். இவர்களது திருமணம் 2006-ம் ஆண்டு செப்டம்பர் 11-ம் தேதி திருமணம் இரு வீட்டாரின் சம்மதத்துடன் நடைப்பெற்றது. இவர்களுக்கு ஒரு மகளும் ஒரு மகனும் உள்ளனர். தங்களது 15-வது திருமண நாளை முன்னிட்டு தான் வரைந்த ஓவியத்தை சூர்யாவுக்குப் பரிசாக வழங்கியுள்ளார் ஜோதிகா.

2009 ஆம் ஆண்டு சினேகா பிரசன்னாவுடன் ‘அச்சமுண்டு அச்சமுண்டு’ படத்தில் நடித்தபோது இவர்களுக்கு இடையே காதல் ஏற்பட்டது. அதனைத் தொடர்ந்து சினேகா-பிரசன்னா இருவரும் 2012 ஆம் ஆண்டு திருமணம் செய்து கொண்டார்கள். இவர்களுக்கு தற்போது ஒரு மகனும், மகளும் உள்ளனர்.

தமிழ் சினிமாவின் முன்னணி நடிகையாக வலம் வந்த நடிகை குஷ்பு 2000ம் ஆண்டு இயக்குநர் சுந்தர் சியை காதலித்து திருமணம் செய்து கொண்டார். சுந்தர் சி இயக்குனராக அறிமுகமான 'முறை மாமன்' படத்தில் குஷ்பு கதாநாயகியாக நடித்திருந்தார். இந்த தம்பதியினருக்கு அவந்திகா மற்றும் ஆனந்திதா என இரு மகள்கள் உள்ளனர்.

நடிகை ராதிகா நடிகரும், அரசியல்வாதியுமான சரத்குமாரை கடந்த 2001 ஆம் ஆண்டு காதலித்து திருமணம் செய்துகொண்டார். இவர்களுக்கு இராகுல் என்ற மகன் உள்ளார்.

'ராஜா ராணி' படத்தின் மூலம் இயக்குனராக அறிமுகமான அட்லீ பிரபல சின்னத்திரை நடிகையான ப்ரியாவை காதலித்து திருமணம் செய்து கொண்டார். இவர்களது திருமணம் கடந்த 2014 ஆம் ஆண்டு நடைப்பெற்றது. கடந்த ஜனவரி மாதம் தான் இவர்களுக்கு மகன் பிறந்தார்.

தமிழ் சினிமாவின் சாக்லேட் பாயான ஆர்யா தன்னுடன் கஜினிகாந்த் படத்தில் நடித்த நடிகை சாயிஷாவை காதலித்து கடந்த 2019ல் திருமணம் செய்து கொண்டனர். இவர்களுக்கு ஒரு பெண் குழந்தை உள்ளார்.

படங்களில் ஒன்றாக நடித்து காதலிக்கத் தொடங்கிய ஆதி - நிக்கி கல்ராணி இருவரும் கடந்த 2022 ஆம் ஆண்டு மே மாதம் பெற்றோர் சம்மதத்துடன் திருமணம் செய்துக் கொண்டனர்.

தமிழ் சினிமாவில் பல ஆண்டுகளாக காதல் ஜோடிகளாக வலம் வந்த நயன்தாரா - விக்னேஷ் சிவன் இருவரும் கடந்த ஜூன் மாதம் திருமணம் செய்துக் கொண்டனர். விக்னேஷ் சிவன் இயக்கத்தில் 'நானும் ரவுடி தான்' நயன்தாரா நடித்த போது இருவருக்கும் காதல் ஏற்பட்டது. தற்போது வாடகைத்தாய் மூலம் இரட்டை குழந்தைகள் உள்ளனர்.

தேவராட்டம் படத்தில் ஒன்றாக நடித்து பின் காதலில் விழுந்த, கெளதம் கார்த்திக் - மஞ்சிமா மோகன் ஜோடி கடந்த 20222 ஆம் ஆண்டு நவம்பர் 23-ம் தேதி திருமணம் செய்துக் கொண்டது.

தென்னிந்திய சினிமாவில் முன்னணி நடிகையாக உள்ள ஹன்சிகா தனது காதலர் சோஹெல் கதூரியாவை கடந்த 4-ம் தேதி காதலித்து திருமணம் செய்துக் கொண்டார்.