பிறந்த நாளில் கர்ப்பிணி லுக்கில் கீர்த்தி சுரேஷ்...!

தமிழில் விஜய், சூர்யா, சிவகார்த்திகேயன், விஷால் உள்ளிட்ட முன்னணி நாயகர்களுக்கு ஜோடியாக நடித்த நடிகை கீர்த்தி சுரேஷ், தெலுங்கிலும் பிசியாக நடித்து வருகிறார்.

தெலுங்கில் கீர்த்தி சுரேஷ் நடிப்பில் வெளியான மகாநடி படத்துக்கு தேசிய விருது கிடைத்துள்ளது. இந்தப் படத்தில் நடித்ததற்காக சிறந்த நடிகைக்கான தேசிய விருதையும் பெற்றார்.

தெலுங்கு படங்களைத் தொடர்ந்து போனி கபூர் தயாரிப்பில் உருவாகும் மைதான் என்ற பாலிவுட் படத்தில் அஜய் தேவ்கனுக்கு ஜோடியாக நடிக்கும் கீர்த்தி சுரேஷ், தெலுங்கில் மிஸ் இந்தியா என்ற படத்திலும் நடித்து வருகிறார்.

இந்தப் படத்தை அடுத்து தமிழில் கார்த்திக் சுப்புராஜின் ஸ்டோன் பென்ச் தயாரிப்பு நிறுவனம் தயாரிக்கும் புதிய படத்திலும் நடிக்க கீர்த்தி சுரேஷ் ஒப்பந்தமாகியுள்ளார்.

இந்தப் படத்தின் டைட்டிலை கீர்த்தி சுரேஷின் பிறந்தநாளான இன்று அறிவிப்பதாக கார்த்திக் சுப்புராஜ் அறிவித்திருந்தார். அதன்படி, ‘பெண்குயின்’ என்ற படத்தின் முதல் போஸ்டரை வெளியிட்டுள்ளார். அதில் கீர்த்தி சுரேஷ் கர்ப்பம் தரித்திருக்கும் பெண்ணாக தோன்றியுள்ளார். படத்தின் ஃபர்ஸ்ட் லுக் போஸ்டரும், டைட்டிலும் படத்தின் மீதான ரசிகர்களின் எதிர்பார்ப்பை அதிகரிக்கச் செய்துள்ளது.

ரசிகர்கள் திரைத்துறை பிரபலங்கள் என பலரும் கீர்த்தி சுரேஷுக்கு பிறந்தநாள் வாழ்த்துகளை தெரிவித்து வருவதால் ட்விட்டரில் #HBDKeerthySuresh என்ற ஹேஷ்டேக் இந்திய அளவில் ட்ரெண்டாகி வருகிறது.