விக்ரம் படப்பிடிப்பில் கமலை கலாய்த்த சுஜாதா

1986 ஆம் ஆண்டு, மே திங்கள் 29 ஆம் நாள் விக்ரம் திரைக்கு வந்தது. நேற்றோடு 36 வருடங்கள் நிறைவடைந்து இன்று 37 வது ஆண்டில் காலடியெடுத்து வைக்கிறது. கமல்ஹாசனின் திரைவாழ்க்கையில் முக்கியமான திரைப்படங்களில் விக்ரமும் ஒன்று.

ஜேம்ஸ் பாண்ட் 007 போல் ஒரு படம் செய்ய வேண்டும் என்ற விருப்பம் அனைத்து நடிகர்களுக்கும் உண்டு. இதில் அந்தக்கால நடிகர்கள் இந்தக்கால நடிகர்கள் என எந்த காலவேறுபாடும் இல்லை. அப்படி கமலுக்கு தோன்றிய ஆசையின் வெளிப்பாடுதான் விக்ரம் திரைப்படம்.

அடித்தொண்டையில் பாடிய, 'விக்ரரரம்... நான் வெற்றி பெற்றவன், இமயம் தொட்டுவிட்டவன்... 'அறிமுகப் பாடல் முதல் அனைத்து அம்சங்களும் 007 படங்களைப் பிரதிபலிப்பதாக அமைந்தது. கதையும்கூட, ராக்கெட்டை கடத்துவது என்று சர்வதேச ரகத்தில் அமைந்தது. இந்த மாதிரி கதைக்கு சுஜாதாவைவிட்டால் வேறுயார்?

சுஜாதா எழுதிய கதையின் அடிப்படையில் விக்ரம் எடுக்கப்பட்டது. வரிக்குவரி அப்படியே வர வேண்டும் என்பதற்காக கமல் நிறைய மெனெக்கெட்டார். படத்தை இயக்கியது ராஜசேகர் என்றாலும், கமல் படத்தில் கமலும் ஓர் இயக்குனர்தானே.

சுஜாதா தனது கதையில், 'இந்தக் கதைக்கு ஆதாரமான, மிக ஆதாரமான சம்பவம் ஒரு செப்டம்பர் மாத மழை நாளில் சென்னை செஷன்ஸ் கோர்ட்டில் ஒரு பிற்பகலில் நடந்தது' என்று எழுதியிருப்பார்.

இந்தக் காட்சியை மியூசியம் தியேட்டரின் முன்னால் படமாக்கினர். ஆனால், மழைக்குப் பதில் வெயில் கொளுத்தியது. சுஜாதா கதையில் மழை பெய்வதாக எழுதியிருந்ததால் தண்ணீர் லாரிகள் வரவழைக்கப்பட்டு, ராட்சஸ விசிறிகள் வைத்து, செயற்கையாக மழையும், காற்றும் உருவாக்கப்பட்டன.

ராஜசேகர் சுஜாதாவிடம் வந்து, 'சார் மழை பேய்ஞ்சா என்ன பேயாட்டி என்ன. நீங்க பாட்டுக்கு செப்டம்பர் மாத மழை நாளில்னு எழுதிட்டீங்க. தாவு தீர்றது பாருங்க' என்று நொந்து கொண்டிருக்கிறார். அதைவிட இன்னொரு சம்பவத்தை அவர் விவரிக்கிறார்.

விக்ரம் கதையில், 'பாதுகாப்பு மந்திரி சபையின் போர்டின் மேல் ஒரு பறவை உட்கார்ந்திருந்தது' என்று எழுதியிருந்தார் சுஜாதா. அதனால், அந்தக் காட்சியை படமாக்கும் போது இரண்டு புறாக்களையும், புறாக்காரரையும் கையோடு அழைத்துச் சென்றிருக்கிறார்கள். அதனை சுஜாதாவே விவரிக்கிறார்.

'அதிகாலை புறாவின் காலில் கயிறு கட்டப்பட்டு அதை போர்டின் மேல் உட்கார வைத்து, கிரேனில் கேமெரா காத்திருக்க, அது புது இடத்தில் பாஷை புரியாததால் கேமெரா பக்கமே திரும்ப மாட்டேன் என்று அடம் பிடித்தது. தானியம் லஞ்சம் கொடுத்தும் பயனில்லை. தொண்டைக்குள் க்கும் பக்கும் என்று சொல்லியும் ம்ஹூம். அது ஒரு மணிக்குப் பின் தான் கேமெரா பக்கமே திரும்பியது.

அப்போது டைரக்டர், 'யோவ் புறா அளுக்காயிருச்சு சுத்தம் பண்ணிக் கொண்டு வாய்யா' என்று சொல்ல, யாரோ ஒருவர் அவசரப்பட்டு அதைத் தண்ணீரில் முக்கிவிட, புறா குளிரில் ஒரு டேபிள்டென்னிஸ் பந்து அளவுக்குச் சுருங்கி விட்டது.

இரண்டாவது புறாவைப் பார்க்கலாம் என்றால் அது பறந்து பதறியது. கடைசியில் சீனியர் புறாவை ஹேர் டிரையர் போட்டு சூடு பண்ணி, மறுபடி புஸுபுஸுவாக்கிக் கொண்டு வந்தார்கள்.'

அப்படி ஒருவரியை படமாக்க ஒரு மணி நேரம் எடுத்துக் கொண்டிருக்கிறார்கள். காட்சியை படமாக்கிய பின், கமல் சுஜாதாவிடம் வந்து, 'என்ன, திருப்திதானே' என்று கேட்டிருக்கிறார்.

அதற்கு காரணம் இருக்கிறது. சுஜாதாவின் பல கதைகளை படமாக்குகிறேன் என்று கொத்துக்கறியாக்கியிருக்கிறார்கள். இனிமே என்கிட்ட கதையே கேட்டு வராதீங்க என்று கடிந்துமிருக்கிறார். அப்படியொரு தவறு செய்துவிடக் கூடாது என்று அவர் எழுதிய டீட்டெயிலில் ஒன்றைக்கூட விடாமல் அனைத்தையும் பார்த்துப் பார்த்து செய்தார் கமல். புறாவை வைத்து வெற்றிகரமாக காட்சியை முடித்த பின் சுஜாதாவிடம், திருப்திதானே என்று கேட்க, சுஜாதா, 'குமுதத்தில் கருங்குருவி என்று எழுதியதாக ஞாபகம்' என்கிறார். என்ன நக்கல் பாருங்கள்.

கதையைப் பாதிக்காத விஷயங்களில் அடம்பிடித்து இப்படித்தான் செய்ய வேண்டும் என்று உழைப்பை வீணடிப்பது விமர்சனத்துக்குரியது. ஒரு பெயர் பலகையை காண்பிக்கையில் அதன் மீது புறா இருந்தால் என்ன இல்லாவிட்டால் என்ன. படத்தின் கதையோ, அதன் பிடிப்போ இந்தக் காட்சியால் மாறிவிடப் போவதில்லைதானே. பிறகு ஏன் இத்தனை மெனக்கெட வேண்டும் என்ற கேள்வி சுஜாதாவின் நையாண்டியில் தொக்கி நிற்பதைப் பார்க்கலாம்.

விக்ரம் படத்தின் பாடல்கள், காட்சிகள், வசனங்கள் என அனைத்தும் இன்றும் பார்த்து ரசிக்கிற விதத்தில் உள்ளன என்பது ஆச்சரியமான ஒன்று. ராக்கெட் கடத்தல், உளவாளி, எலி கோவில், வித்தியாசமான கலாச்சாரத்தை கொண்ட சாம்ராஜ்யம், அதன் கோமாளி ராஜா, சாப்பிடுகிற உணவில் எச்சில் உமிழும் போலி சாமியார், ஒன்றுக்கு மேற்பட்ட நாயகிகள், பாலைவனம், துப்பாக்கிச் சண்டை என ஜேம்ஸ்பாண்ட் படங்களுக்குரிய அனைத்தும் விக்ரமில் இருந்தது.

படம் தமிழில் வெளியான அதேநாள் ஆந்திரா, கேரளா, கர்நாடகாவிலும் வெளியானது. நல்ல ஓபனிங்கை பெற்றாலும் படம் நீடித்த ஓட்டத்தை பெறவில்லை. குடும்பம், சென்டிமெண்ட் இல்லாத படங்கள் இப்போதும்கூட திரையரங்குகளில் இரண்டு வாரத்துக்கு மேல் தாக்குப் பிடிப்பது கடினம். விக்ரம் அதிக நாள்கள் ஓடாததற்கும் இதுவே காரணமாக அமைந்தது. ஜுன் 3 வெளியாகும் புதிய விக்ரம் இந்த சென்டிமெண்டுகளைத் தாண்டி வசூலிக்கும் என நம்புவோம்

விக்ரம் விஷயத்தில் படத்திற்கு சம்பந்தமில்லாத இன்னொரு ஹாலிவுட் தொடர்பும் உள்ளது. கமலின் விக்ரம் 1986 ஜுன் 29 வெளியாவதற்கு இரண்டு வாரங்கள் முன்பு 1986 மே 16 ஆம் தேதி டாம் க்ரூஸ் நடித்த டாப் கன் படம் வெளியானது. 36 வருடங்களுக்குப் பிறகு அந்தப் படத்தின் இரண்டாம் பாகத்தை அதே டாம் க்ரூஸை வைத்து எடுத்து சில தினங்கள் முன்பு மே 27 ஆம் தேதி வெளியிட்டனர். 36 வருடங்களுக்குப் பிறகு அதே விக்ரம் பெயரில் கமல் நடித்த படமும் ஜுன் 3 ஆம் தேதி வெளியாகிறது. டாம் க்ரூஸின் படம் பழைய படத்தின் சீக்வெல். கமலின் புதிய விக்ரம் பழைய விக்ரமின் சீக்வெல் அல்ல. இது ஒன்றுதான் வித்தியாசம்.