ஒய்.ஜி.மகேந்திரனின் அட்டர் ஃப்ளாப் படத்தை அமோக வெற்றியாக்கிய விசு

ஒய்.ஜி.மகேந்திரன் இயக்கத்தில் 1975 இல் உறவுக்கு கை கொடுப்போம் படம் வெளியானது.

படத்தின் திரைக்கதை, வசனம் மற்றும் இயக்க மேற்பார்வை பழம்பெரும் இயக்குனர் கே.எஸ்.கோபாலகிருஷ்ணன். விசு எழுதி வெற்றிகரமாக நடத்தப்பட்ட நாடகத்தைதான் அதே பெயரில் படமாக்கியிருந்தனர். ஜெமினி கணேசன், சௌகார் ஜானகி என நட்சத்திர ஜோடி. எனினும் பாக்ஸ் ஆபிஸில் படம் அப்பளமானது.

11 வருடங்களுக்குப் பிறகு அதே கதையை விசு இயக்கினார்.

அப்படம் அந்த வருடத்தின் அதிக வசூல் செய்த படமாக அமைந்ததுடன் தேசிய விருதையும் வென்றது. தமிழ் சினிமா சரித்திரத்தின் வியப்பான நிகழ்வுகளில் ஒன்றாகவும் ஆனது.

விசு எழுதிய முதல் நாடகம் உறவுக்கு கை கொடுப்போம். வெற்றிகரமாக ஓடிய நாடகம் இது. ஒரு கூட்டுக்குடும்பத்தில் ஊதாரித்தனமாக செலவளிப்பதால் ஏற்படும் பிரச்சனைகளை நாடகம் நகைச்சுவை கலந்து சொன்னது. நாடகத்தின் வெற்றியைப் பார்த்த இயக்குனர் கே.எஸ்.கோபாலகிருஷ்ணன் நாடகத்தின் கதை உரிமையை வாங்கி அதே பெயரில் தனது சித்ரா புரொடக்ஷன்ஸ் சார்பில் தயாரித்தார். சினிமாவுக்காக கதை, காட்சி, வசனங்களில் திருத்தங்களும் செய்தார்.

படத்தில் வரும் குடும்பத்தின் தலைவராக வி.எஸ்.ராகவன் நடித்திருந்தார். மூத்த மகனாக ஜெமினி கணேசனும், வீட்டில் உள்ள அனைவரையும் அனுசரித்து செயல்படும் மூத்த மருமகளாக சௌகார் ஜானகியும் நடித்திருந்தனர்.

வி.எஸ்.ராகவனின் இரண்டாவது மகனாக சண்முகசுந்தரம் நடித்திருந்தார். இன்றைய நாயகிகள் போடுவதற்கு கூச்சப்படும் குட்டைப் பாவாடையுடன் நடனங்களும் வைக்கப்பட்டன.

வெற்றிகரமாக ஓடிய நாடகம்தானே, சினிமாவாகவும் ஓடும் என்ற நம்பிக்கையில் படத்தை எடுத்தனர். ஆனால், ரசிகர்கள் படத்தை புறக்கணித்தனர். படம் தோல்வியடைந்தது. தயாரிப்பாளருக்கு நஷ்டத்தை ஏற்படுத்தியது.

விசுவின் கதையில் மாற்றங்கள் செய்ததே தோல்விக்கு காரணம் என அப்போது பேசப்பட்டது. உறவுக்கு கை கொடுப்போம் படத்தின் டைட்டிலில் மூலக்கதை விசு என்று கிரெடிட் கொடுக்கப்பட்டிருந்தது. அதாவது மூலக்கதையை எடுத்துக் கொண்டு பலவற்றையும் சினிமாவுக்காக மாற்றியிருந்தனர்.

உறவுக்கு கை கொடுப்போம் வெளிவந்து 11 வருடங்கள் கழித்து விசு அதே கதையை மறுபடி எடுத்தார். குடும்பத் தலைவர் கதாபாத்திரத்தில் அவரே நடித்தார். ஜெமினி கணேசன் நடித்த மூத்த மகன் கதாபாத்திரத்தில் ரகுவரனும், மூத்த மருமகளாக சௌகார் ஜானகி நடித்த வேடத்தில் லட்சுமியும் நடித்தனர்.

வேலைக்கார பெண்மணியாக மனோரமா கதாபாத்திரத்தை மெருகேற்றி பயன்படுத்தினார். ஏவிஎம் தயாரித்த அப்படம் வெள்ளிவிழாக் கண்டது. அது வேறு எந்தப் படமும் அல்ல, சம்சாரம் அது மின்சாரம்.

இந்தப் படத்துக்கு முன்புதான் ஏவிஎம்முக்காக விசு நல்லவனுக்கு நல்லவன் படத்தின் திரைக்கதையை எழுதித் தந்தார். ரஜினி, ராதிகா நடித்த அந்தப் படம் தெலுங்கில் வெளியான தர்மாத்துடு படத்தின் தமிழ் ரீமேக். தழுக்காக படத்தின் திரைக்கதையில் சில மாற்றங்கள் செய்து புதிதாக எழுதித் தந்தார் விசு. அந்த நேரம் அவர் ஏவிஎம் சரவணனிடம் பல கதைகள் கூறினார். எதுவும் அவர் எதிர்பார்த்தபடி இல்லை. குடும்ப உறவுகளை மையப்படுத்திய கதையை அவர் கேட்க, விசு சொன்ன கதைதான் சம்சாரம் அது மின்சாரம்.

சரவணனுக்கு கதைப் பிடித்துப் போனது. ஏன் இதை முன்பே சொல்லவில்லை என்று கேட்க, தனது கதை உறவுக்கு கை கொடுப்போம் என்ற பெயரில் சினிமாவாகி தோல்வியடைந்ததை கூறினார் விசு. அனாலும், அந்தக் கதையில் சரவணனுக்கு நம்பிக்கை இருந்தது. அவரது ஆலோசனையின்படி வேலைக்கார கண்ணம்மா கதாபாத்திரத்தை சம்சாரம் அது மின்சாரத்துக்காக விசு உருவாக்கினார். மனோரமா நடித்த அந்த கதாபாத்திரம் படத்தின் வெற்றிக்கு முக்கிய காரணமாக அமைந்தது.

35 தினங்களில் பதினைந்து லட்சம் முதலீட்டில் சம்சாரம் அது மின்சாரம் எடுக்கப்பட்டு 1986 ஜுலையில் திரைக்கு வந்தது. படம் அனைத்து சென்டர்களிலும் அமோக வரவேற்பை பெற்று 25 வாரங்களை கடந்து வெள்ளிவிழா கண்டது. அந்தக் காலத்திலேயே சுமார் ஒன்றே முக்கால் கோடிகளை படம் வசூலித்தது. சிறந்த பொழுதுப்போக்கு திரைப்படத்துக்கான தேசிய விருது உள்பட பல விருதுகளை இப்படம் பெற்றது. இந்த விருதைப் பெற்ற முதல் தமிழ்ப் படமும் இதுதான். தோல்வி கண்ட ஒரு கதையை சிறிது மாற்றி எடுத்து வெற்றி பெற முடியும் என்பதற்கு சம்சாரம் அது மின்சாரம் சிறந்த உதாரணம்.