முதியோர் இல்லத்தில் பிறந்தநாள் கொண்டாடிய விஷால்

நேற்று விஷாலின் 44-வது பிறந்தநாள். ஆதரவற்ற முதியோர் மற்றும் குழந்தைகள் இல்லங்களில் தனது பிறந்தநாளை விஷால் கொண்டாடினார்.

விஷால் நடிப்பில் எனிமி படம் விரைவில் வெளியாக உள்ளது. நேற்று அவரது பிறந்தநாளை முன்னிட்டு தற்போது நடித்து வரும் விஷால் 31 படத்தின் பெயர் மற்றும் பர்ஸ்ட் லுக் வெளியிடப்பட்டது. படத்துக்கு வீரமே வாகை சூடும் என பெயர் வைத்துள்ளனர்.

விஷாலுக்கு தெலுங்கிலும் சின்னதாக மார்க்கெட் உண்டு. அதனால் தெலுங்கிலும் இந்தப் படத்தை வெளியிடுகின்றனர். நேற்று படத்தின் தெலுங்கு பெயர் மற்றும் பர்ஸ்ட் லுக் வெளியிடப்பட்டது.

பிறந்தநாளை முன்னிட்டு நேற்று விஷால் சென்னை கீழ்ப்பாக்கத்தில் உள்ள மெர்சி ஹோமுக்கு சென்றார். ஆதரவற்ற முதியோர்களுக்கான இல்லம் இது.

மெர்சி ஹோமிலுள்ள முதியோர்களுக்கு விஷால் சார்பில் உணவு வழங்கப்பட்டது. கெல்லீஸ் பகுதியில் அமைந்துள்ள சுரபி இல்லத்துக்கும் விஷால் சென்றார்.

அங்குள்ள குழந்தைகளுடன் சேர்ந்து கேக் வெட்டினார். சுரபி இல்லத்தில் உள்ள குழந்தைகளுக்கு விஷால் உணவு வழங்கினார். சில குழந்தைகளுக்கு அவரே ஊட்டிவிடவும் செய்தார்.

இந்த நிகழ்வில் விஷால் மக்கள் நல இயக்கத்தின் செயலாளர் ஹரிகிருஷ்ணன், சென்னை மாவட்ட தலைவர் ராபர்ட், மத்திய சென்னை மாவட்ட தலைவர் சீனு, தென் சென்னை மாவட்ட தலைவர் ராஜா, திருவள்ளூர் மாவட்ட தலைவர் கண்ணன் மற்றும் மக்கள் நல இயக்கத்தின் நிர்வாகிகளும் கலந்துக்கொண்டனர்