விக்ரம்.. காந்தாரா.. கேஜிஎப்.. 2022 இந்திய சினிமாவின் டாப் 10 திரைப்படங்கள்!

2022 இந்தியாவில் வெளியான திரைப்படங்களில் டாப் 10 திரைப்படங்கள் எவை என பிரபல இணையதளமான ஐஎம்டிபி பட்டியல் வெளியிட்டுள்ளது. இதில் இரு தமிழ்ப் படங்கள் இடம்பிடித்துள்ளன.

10. 777 சார்லி (கன்னடம்): உலிதவரே கண்டெந்தே திரைப்படத்தை இயக்கி நடித்த ரக்ஷித் ரெட்டி தயாரித்து, நடித்தப் படம் 777 சார்லி. நாயை பிரதான கதாபாத்திரமாகக் கொண்ட இந்தப் படம் கன்னடத்தில் மட்டுமின்றி பிற மொழிகளிலும் வரவேற்பை பெற்று ஓடியது.

9. பொன்னியின் செல்வன் - பார்ட் 1 (தமிழ்): கல்கி எழுதிய பொன்னியின் செல்வன் நாவலை அதே பெயரில் மணிரத்னம் திரைப்படமாக்கியிருந்தார். அதன் முதல் பாகம் இந்த வருடம் வெளியாகி, இந்தியாவில் அதிகம் வசூலித்த திரைப்படங்களில் ஒன்றாக இடம் பிடித்ததுடன் ஐம்டிபி பட்டியலிலும் ஒன்பதாவது இடத்தைப் பிடித்துள்ளது.

8. சீதா ராமம் (தெலுங்கு): துல்கர் சல்மான், மிருனாள் தாக்கூர் நடிப்பில் ஹனு ராகவபுடி இயக்கிய தெலுங்குப் படம் சீதா ராமம் தெலுங்கு மட்டுமின்றி பிற மொழிகளிலும் 'டப்' செய்யப்பட்டு நல்ல வசூலை பெற்றது. நீண்ட காலத்திற்குப் பிறகு வந்த நல்ல காதல் திரைப்படம் என பெயரையும் பெற்றது.

7. மேஜர் (இந்தி, தெலுங்கு): 2008 மும்பை தாக்குதலில் பலியான மேஜர் சந்தீப் உன்னிகிருஷ்ணனின் வாழ்க்கையைத் தழுவி தெலுங்கு, இந்தியில் ஒரே நேரத்தில் மேஜர் திரைப்படம் எடுக்கப்பட்டது. அதிவி சேஷ் பிரதான வேடத்தில் நடித்ததோடு படத்தின் கதை, திரைக்கதையையும் எழுதியிருந்தார். சசி கிரண் டிக்கா இயக்கிய இந்தப் படம் பல்வேறு தரப்பினரின் பாராட்டுக்களை பெற்றது.

6. ராக்கெட்ரி - தி நம்பி எபெக்ட் (தமிழ், இந்தி, ஆங்கிலம்): இஸ்ரோ விஞ்ஞானி நம்பி நாராயணன் அந்நிய நாட்டுக்கு இந்திய நாட்டு ரகசியங்களை விற்றார் என கைது செய்யப்பட்டு, பல வருட சட்டப் போராட்டத்துக்குப் பின் நிரபராதி என விடுதலை செய்யப்பட்டார். அவரது வாழ்க்கைக் கதையை மாதவன் எழுதி, இயக்கி, நடித்தார். இயக்குனராக அவருக்கு இது முதல் படம்.

5. காந்தாரா (கன்னடம்): ரிஷப் ஷெட்டி இயக்கி நடித்த கன்னடப் படம் காந்தாரா அனைத்து மொழிகளிலும் ஆரவாரமான வரவேற்பைப் பெற்றது. உலக அளவில் 400 கோடிகளைத் தாண்டி படம் வசூலித்தது. இந்தியாவில் தமிழில்தான் படம் குறைவாக வசூலித்தது என்பது குறிப்பிடத்தக்கது.

4. விக்ரம் (தமிழ்): கமல், விஜய் சேதுபதி, பகத் பாசில், நரேன், கௌரவ வேடத்தில் சூர்யா என ஏராளமான நட்சத்திரங்கள் நடித்த இந்த ஸ்பை த்ரில்லர் ஆக்ஷன் திரைப்படம் தமிழகத்தில் மிகப்பெரிய வெற்றியை பெற்றது. அதேபோல் கேரளாவிலும் நல்ல லாபத்தை சம்பாதித்தது. கமலின் திரைவாழ்க்கையில் இதுதான் டாப் வசூல்.

3. கேஜிஎஃப் - சாப்டர் 2 (கன்னடம்): பிரசாந்த் நீல் இயக்கத்தில் யாஷ் நடித்த கேஜிஎஃப் - சாப்டர் 1 இந்திய அளவில் மிகப்பெரிய வெற்றியை பெற்றதால் இரண்டாவது பாகத்துக்கு அதிக எதிர்பார்ப்பு இருந்தது. அதனை சாப்டர் 2 நிறைவு செய்ய, உலக அளவில் 1000 கோடி வசூலை படம் தாண்டியது.

2. தி காஷ்மீர் பைல்ஸ் (இந்தி): காஷ்மீர் பண்டிட்டுகள் கொல்லப்பட்ட சம்பவத்தை அடிப்படையாக வைத்து தி காஷ்மீர் பைல்ஸ் எடுக்கப்பட்டது. அரசின் தரவுகள் உள்பட எதையும் கணக்கில் கொள்ளாமல் முஸ்லீம் வெறுப்பை மட்டுமே பிரதானமாகக் கொண்டு எடுக்கப்பட்ட இப்படம் இந்தியாவில் ஓடியது இந்த வருடத்தின் ஆகப்பெரும் துரதிர்ஷ்டம். இந்த உண்மையை இஸ்ரேலிய இயக்குனர் போட்டுடைத்தது ஒன்றே ஆறுதல்.

1. ஆர்ஆர்ஆர் (தெலுங்கு): ராஜமௌலியின் ஆர்ஆர்ஆர் முதலிடத்தைப் பிடித்துள்ளது. அதிக பிரபலம்,. அதிக வசூல் அத்துடன் கோல்டன் குளோபில் இரண்டு பரிந்துரைகள் பெற்றுள்ளதால் எளிதாக முதலிடத்தை ராஜமௌலியின் படம் எட்டியுள்ளது.