இளம்பெண்களைக் கொல்லும் சீரியல் கில்லர்.. தேடுதல் வேட்டையில் பெண் அதிகாரி.. எப்படி இருக்கிறது 'தஹாத்'.? விமர்சனம் இதோ!

’எப்போ கல்யாணம்?’ என்று பெண்களிடம் கேட்கப்படும் தொடர் கேள்வி கள் வெறும் கேள்விகளாக மட்டுமே இருப்பதில்லை. அதில் உள்ள உளவியல் சிக்கல் எவ்வளவு கொடுமையானது என்பதை சமீபத்தில் அமேசான் ப்ரைம் வீடியோ தளத்தில் வெளியாகியுள்ள ‘தஹாத்’ சீரிஸ் சிறப்பாக காட்டியிருக்கிறது.

8 எபிசோட்களைக் கொண்டிருக்கும் இது ஒரு த்ரில்லர் சீரிஸ். அடிப்படையில் இந்தி மொழியில் உருவாக்கப்பட்டிருந்தாலும், தென்னிந்திய மொழிகளிலும் டப்பிங் செய்யப்பட்டிருக்கிறது ‘தஹாத்’.

ராஜஸ்தானில் திருமணக் கோலத்தில் இளம்பெண்கள் பல்வேறு கிராமங்களின் பொதுக் கழிப்பிடங்களில் சைனைட் உண்டு மரணிக்கின்றனர். அவர்களின் உடல்கள் அடையாளம் தெரியாததாலும், சைனைட் சாப்பிட்டதாலும் தற்கொலை என்ற ரீதியில் காவல்துறை வழக்கை முடித்து வைக்கின்றனர். இந்நிலையில், ஒரு பெண் காணாமல் போனதை விசாரிக்கும் பெண் காவல் அதிகாரி ஒருவர் தனது விசாரணையில் இந்தத் தொடர் மரணங்கள் நிகழ்ந்திருப்பதையும், அதை ஒரு சீரியல் கில்லர் செய்திருப்பதையும் கண்டுபிடிக்கிறார். இதில் பல்வேறு அரசியல் தலையீடுகளும் அவரது விசாரணையில் குறிக்கிடுகின்றன. இறுதியில் சீரியல் கில்லர் பிடிபட்டானா இல்லையா என்பது மீதிக்கதை.

இதில் அஞ்சலி பாட்டி என்ற ஒடுக்கப்பட்ட சமூகத்தைச் சேர்ந்த பெண் காவல் அதிகாரியாக சோனாக்‌ஷி சின்ஹா நடித்துள்ளார். இளம்பெண்களைக் குறிவைத்துக் கொலை செய்யும் சீரியல் கில்லராக விஜய் வர்மா நடித்துள்ளார். இவர்கள் மட்டுமின்றி, குல்ஷன் தேவய்யா, சோஹம் ஷா ஆகியோர் நடித்திருக்கின்றனர்.

தொடக்கத்தில் மெதுவாக இருந்தாலும், அடுத்தடுத்த திருப்புமுனைகளால் சூடுபிடிக்கிறது திரைக்கதை. ராஜஸ்தானில் நடைபெறும் கதை என்பதால் அந்த நிலத்தின் வெப்பம், சீரியல் கில்லரின் கொலைகளை விட பலமாக காட்சிப்படுத்தப்பட்டிருக்கிறது. 

ஒரு சீரியல் கில்லரைப் பிடிக்கும் த்ரில்லர் கதையில் இந்தியாவில் நிலவும் ஆணாதிக்கம், பெண்ணடிமைத்தனம், சாதிய வேறுபாடு, மதப் பாகுபாடு, வரதட்சணை ஆகியவற்றை நேரடியாக விமர்சித்திருக்கின்றனர் இயக்குநர்கள் ரீமா காக்தி (Reema Kagti), ஸோயா அக்தர் (Zoya Akhthar) ஆகியோர். கொலை செய்தவன் குற்றவாளியா, இந்த சமூகமே குற்றவாளிகளா என்று இறுதியாக கேள்வி எழுப்புகிறது ‘தஹாத்.