நன்றி... வணக்கம் என்பதற்கு அர்த்தம் இதுதான் - விஜய்சேதுபதி பளீர் பேட்டி

முத்தையா முரளிதரன் அறிக்கையை ட்விட்டரில் பகிர்ந்த விஜய் சேதுபதி நன்றி வணக்கம் என்று ட்வீட் செய்திருந்த நிலையில் தனது நிலைப்பாட்டை தெளிவுபடுத்தியுள்ளார்.

இலங்கை கிரிக்கெட் வீரர் முத்தையா முரளிதரன் வாழ்க்கை வரலாற்று படத்தில் விஜய் சேதுபதி நடிக்கக் கூடாது என ரசிகர்கள், அரசியல்வாதிகள் உள்ளிட்ட பலர் தெரிவித்த நிலையில் எதிர்ப்புகள் வலுத்தன.

‘800’ படத்தின் தயாரிப்பு நிறுவனம் இந்தப் படம் அரசியல் படமல்ல என்று விளக்கமளித்தது. அதேபோல் முத்தையா முரளிதரனும் தன் மீதான சர்ச்சைகளுக்கு விளக்கமளித்து அறிக்கை வெளியிட்டிருந்தார். ஆனாலும் எதிர்ப்புகள் குறையவில்லை.

இந்நிலையில் இன்று அறிக்கை வெளியிட்ட முத்தையா முரளிதரன், “என் மீதுள்ள தவறான புரிதலால் 800 படத்தில் இருந்து விலக வேண்டும் என்று நடிகர் விஜய்சேதுபதி அவர்களுக்கு சிலர் தரப்பில் இருந்து கடுமையான அழுத்தம் தருவதை நான் அறிகிறேன். எனவே என்னால் தமிழ்நாட்டில் ஒரு தலைசிறந்த கலைஞன் பாதிப்படைவதை நான் விரும்பவில்லை. அதுமட்டுமல்லாது விஜய் சேதுபதி அவர்களின் கலைபயணத்தில் வருங்காலங்களில் தேவையற்ற தடைகள் ஏற்பட்டுவிடக்க் கூடாது என்பதையும் கருத்தில் கொண்டு இத்திரைப்படத்தில் இருந்து விலகிக் கொள்ளுமாறு அவரை கேட்டுக் கொள்கிறேன்” என்று கூறினார்.

முத்தையா முரளிதரனின் இந்த அறிக்கையை தனது ட்விட்டர் பக்கத்தில் பகிர்ந்து, “நன்றி. வணக்கம்” என சொல்லி ‘800’ படத்துக்கு என்ட் கார்ட் போட்டார் விஜய் சேதுபதி.

விஜய் சேதுபதி வெளிப்படையாக விலகுவதாக அறிவிக்காமல் நன்றி, வணக்கம் என்று மட்டும் சொன்னால் அதன் அர்த்தம் என்ன என்று நெட்டிசன்கள் பலரும் கேள்வி எழுப்பினர்.

இந்நிலையில் நன்றி, வணக்கம் என்றால் எல்லாம் முடிந்துவிட்டது என்றுதான் அர்த்தம். இனி ‘800’ படம் குறித்து பேசுவதற்கு எதுவும் இல்லை என்று விளக்கமளித்துள்ளார் விஜய் சேதுபதி. தமிழக முதல்வர் எடப்பாடி பழனிசாமியின் தாயார் மறைவுக்கு அஞ்சலி செலுத்த வந்த போது செய்தியாளர்களிடம் அவர் இதை தெரிவித்தார்.

முதலமைச்சரிடம் அவரது தாய் மறைவு குறித்து விசாரிக்கும் விஜய் சேதுபதி