திரிஷாவைக் கட்டியணைத்து வரவேற்ற விஜய் - 'தளபதி 67' பூஜை புகைப்படங்கள் இதோ!

வாரிசு படத்துக்கு கிடைத்த வரவேற்புக்கு பிறகு நடிகர் விஜய் தற்போது லோகேஷ் இயக்கத்தில் தளபதி 67 படத்தில் நடித்துவருகிறார்.

இந்தப் படத்துக்கான அறிவிப்பு அதிகாரப்பூர்வமாக வெளியிடப்பட்டது. அதனைத் தொடர்ந்து நேற்றும், இன்றும் படத்தின் நடிகர்கள், தொழில்நுட்பக் கலைஞர்கள் குறித்து அறிவிப்பு வெளியாகி வருகிறது.

இந்தப் படத்துக்கு அனிருத் இசையமைக்க, மனோஜ் பரமஹம்சா ஒளிப்பதிவு செய்கிறார். நண்பன், பீஸ்ட் படங்களுக்கு பிறகு 3வது முறையாக விஜய் - ஒளிப்பதிவாளர் மனோஜ் பரமஹம்சா இணைந்து பணியாற்றவிருக்கின்றனர்.

மேலும் கில்லி, திருப்பாச்சி, ஆதி, குருவி போன்ற படங்களுக்கு பிறகு 5வது முறையாக விஜய் - திரிஷா ஜோடி தளபதி 67 படத்துக்காக இணையவுள்ளனர்.

இதனையடுத்து நேற்று படக்குழுவினர் காஷ்மீர் கிளம்பிசென்றனர். படக்குழுவினர் யார் யார் பயணம் செய்தார்கள் என்ற விவரங்கள் சமூக வலைதளங்களில் வெளியானது. அதில் நடிகர சத்யராஜின் பெயரும் இடம் பெற்றிருந்தது. ஆனால் சத்யராஜின் பெயர் இதுவரையிலும் அறிவிக்கப்படவில்லை.

இந்தப் படத்தின் இசை வெளியீட்டு உரிமையை சோனி மியூசிக் நிறுவனம் கைப்பற்றியுள்ளது.

இந்தப் படத்தில் அர்ஜுன், சஞ்சய் தத், பிரியா ஆனந்த், சாண்டி மாஸ்டர் உள்ளிட்டோர் முக்கிய வேடங்களில் நடிக்கின்றனர்.

ஆனால் லோகேஷ் சினிமாட்டிக் யூனிவர்ஸ் படி இந்தப் படம் உருவாகும் என்று தகவல் வெளியாகியிருந்தது. ஆனால் லோகேஷின் முந்தைய படங்களான கைதி, மாஸ்டர், விக்ரம் பட நடிகர்கள் ஒருவர் கூட இதுவரை அறிவிக்கப்படாததால் தளபதி 67 படம் முற்றிலும் புதிய படமாக உருவாவாகவிருப்பதாக சந்தேகத்தை ஏற்படுத்தியுள்ளது.

கைதி படத்தில் கார்த்தி கதாப்பாத்திரத்துக்கு முதல் சாய்ஸ் மன்சூர் அலிகான் தான் எனவும் அவரது நடிப்பு தனக்கு பிடிக்கும் எனவும் லோகேஷ் பல பேட்டிகளில் தெரிவித்திருக்கிறார். இதனால் இந்தப் படத்தில் அவரது கதாப்பாத்திரத்தைக் காண ரசிகர்கள் ஆர்வமாக காத்திருக்கிறார்கள்.

தளபதி 67 பட பூஜை கடந்த மாதம் வெகு விமர்சையாக நடைபெற்றது.

நிகழ்வில் திரிஷா, அர்ஜுன், மன்சூர் அலிகான், பிரியா ஆனந்த் போன்ற பல பிரபலங்கள் கலந்துகொண்டார்கள்.

மேலும் இயக்குநர்கள் புஷ்கர் காயத்ரி, கார்த்திக் சுப்புராஜ், இன்று நேற்று நாளை இயக்குநர் ரவிக்குமார் உள்ளிட்டோர் கலந்துகொண்டனர்.

நிகழ்வுக்கு வந்த திரிஷாவை நடிகர் விஜய் கட்டியணைத்து வரவேற்றார்.

தயாரிப்பாளர் லலித்குமார் கிளாப் போர்டு அடித்து படப்பிடிப்பை துவங்கிவைத்தார்.