Vadivelu Birthday: ரஜினி, விஜய், அஜித்... என முன்னணி நடிகர்களுடன் திரையில் வடிவேலு நிகழ்த்திய மேஜிக்!

வைகைப்புயல் வடிவேலு இன்று தனது 62-வது பிறந்தநாளைக் கொண்டாடுகிறார். திருவிளையாடல் படத்தில் சிவாஜிக்கும் நாகேஷுக்கும் வரும் உரையாடலைப் போல பிரிக்க முடியாதது, வடிவேலுவையும் தமிழ் சமூகத்தையும் என சந்தேகமே இல்லாமல் சொல்லலாம்.

அந்தளவுக்கு தமிழ்நாட்டில் ஒவ்வொரு வீட்டு ரேஷன் கார்டில் மட்டும் தான் வடிவேலு பெயர் இல்லை. மற்றபடி, போகிற போக்கில் அன்றாடம் நமக்கே தெரியாமல் பல வடிவேலுவின் வசனங்களை நாம் உபயோகித்துக் கொண்டிருக்கிறோம். எவ்வளவு பெரிய இன்னல்கள் வந்தாலும், அவரின் பாணியில், “விட்றா விட்றா சூனா பானா” என எளிதாக கடந்துப் போக அவரது வசனங்கள் நமக்கு பேருதவி புரிகின்றன. சிலரின் நடிப்பு நம்மை ஆட்கொள்ளும், சிலரின் டயலாக் டெலிவரி நம்மை சிரிக்க வைக்கும். ஆனால் வடிவேலுவை பொறுத்தவரை அவர் நடிக்கவும் வேண்டாம், வசனமும் பேச வேண்டாம், ஸ்கிரீனில் வந்து நின்னாலே ரசிகர்கள் விழுந்து விழுந்து சிரிக்கும் அளவுக்கு மக்களை தன்வசப்படுத்தியிருக்கிறார். இன்றைய சூழலில், குடும்பம், அலுவலகம், தனிப்பட்ட பிரச்னைகள் என ஒரு நாளைக் கடப்பதே ஒரு யுகத்தைக் கடப்பது போல நாம் ஓடிக் கொண்டிருக்கையில், இரவு தூங்குவதற்கு முன்னால் 10 நிமிடமாவது தலைவனின் காமெடியை பார்த்து மனதை லேசாக்கிக் கொள்பவர்கள் தான் பெரும்பாலும். சிறியவர் முதல் பெரியவர் வரை வடிவேலுவை தெரியாதவர்களும், பிடிக்காதவர்களும் இருக்கவே முடியாது என்பது தான் யதார்த்தம். சீரியஸான பிரச்னைகள் வரை பொழுதுபோக்கு விஷயங்கள் வரை அனைத்திலும் மீம் டெம்ப்ளேட்டாக இடம்பெற்று நம்மை சிரிக்கவும், சிந்திக்கவும் வைக்கிறார். இப்படி வடிவேலுவைப் பற்றி சொல்லிக் கொண்டே போகலாம். இது ஒருபுறமிருக்க, அவர் மற்ற நடிகர்களுடன் இணைந்து திரையில் நிகழ்த்திய மாயாஜாலத்தில் சிலவற்றை இங்கே குறிப்பிடுகிறோம்.

சில படங்களில் ரஜினிகாந்த் - வடிவேலு இணைந்து நடித்திருந்தாலும், அவர்கள் கூட்டணியில் வெளியான முத்து, சந்திரமுகி படங்கள் எப்போதும் ரசிகர்களின் ஃபேவரிட். குறிப்பாக சந்திரமுகி படத்தில் வரும் காமெடி சீக்வென்ஸுகள் நம்மை விழுந்து விழுந்து சிரிக்க வைக்கும். பேய் இருக்கா இல்லையா? என்ற கேள்விக்கு இன்னும் பதிலில்லை.

மற்ற முன்னணி நடிகர்களுடன் வடிவேலு இணையும் படங்களை விட, விஜய்யுடன் அவர் இணையும் படங்கள் எப்போதும் ரசிகர்களுக்கு நகைச்சுவை விருந்து வைக்க தவறுவதில்லை. காரணம், இயல்பாக நகைச்சுவை உணர்வு கொண்ட விஜய், வைகைப்புயலுடன் இணையும் போது உருவாகும் ஒவ்வொன்றுமே மேஜிக் தான். இதில் காமெடியன் யாரு என்னும் சந்தேகம் எழுமளவுக்கு சில காட்சிகள் இருக்கும். இவர்கள் இருவரும் கிட்டத்தட்ட 15 படங்களில் ஒன்றாக நடித்துள்ளனர். ’மதுர’, ‘பகவதி’, 'சச்சின்', 'ஃப்ரெண்ட்ஸ்', 'போக்கிரி', 'வசீகரா', 'காவலன்' உள்ளிட்ட படங்கள் இவர்களின் சிறந்த படங்களாக இருப்பதால், இந்த ஜோடி மீண்டும் எப்போது இணையும் என ரசிகர்கள் எதிர்பார்க்கின்றனர்.

பிரபுதேவாவின் பல படங்களில் முன்னணி நகைச்சுவை நடிகராக நடித்துள்ளார் வடிவேலு. திரையில் நண்பர்களாக நடித்ததோடு, திரைக்கு வெளியேயும் நல்ல நண்பர்களாக இருக்கின்றனர். 'காதலன்' மற்றும் 'மனதை திருடி விட்டாய்' ஆகிய இரண்டும் இவர்களின் பெஸ்ட் படங்கள்.

சுந்தர் சி இயக்கிய 'வின்னர்' சூப்பர்ஹிட் வெற்றிக்குப் பிறகு வடிவேலு மற்றும் பிரசாந்த் பலரின் விருப்பமான ஜோடியாக மாறினர். ‘நாங்க அடி வாங்காத ஏரியாவே கிடையாது’ என்ற வசனம் இன்றும் பல சூழல்களில் மீம் டெம்ப்ளேட்டாக பயன்படுத்தப்படுகிறது.

அர்ஜூன் - வடிவேலு இருவரும் பல படங்களில் நடித்திருந்தாலும், கிரியில் வரும் வீரபாகுவையும், மருதமலையில் வரும் ஏட்டு ஏகாம்பரத்தையும் யாராலும் மறக்க முடியாது. அதிலும் அந்த பேக்கரி டீலிங்... சொல்ல வார்த்தைகளே இல்லை.

சத்யராஜ் - வடிவேலு கூட்டணியும் பல படங்களில் இணைந்து நடித்துள்ளது. அதிலும், இங்கிலீஷ்காரன், வெற்றிவேல் சக்திவேல், கோவை பிரதர்ஸ் ஆகியப் படங்களின் காமெடிகள் ஒவ்வொன்றும், மழைக்கு இதமான இஞ்சி டீ-யைப் போன்று அத்தனை சிறப்பானவை.

சரத்குமார் - வடிவேலு கூட்டணியும் 1 டஜன் படங்களுக்கு மேல் இணைந்து நடித்துள்ளது. அரசு படத்தில் கோயிலில் மணி அடிக்கும் வடிவேலும், இந்தி குடும்பத்திடம், ‘கோன் ஐஸ் கோயிலுக்கு வெளில விப்பாங்க, பேட்டா எங்கம்மா தர்றாங்க’ போன்ற வசனங்கள் இன்றும் பலரின் பேவரிட் லிஸ்ட்டில் இடம்பெற்றுள்ளன. அதோடு ஏய் படத்தில், நமீதாவை காதலிக்க சரத்குமாருக்கு பலவித ஐடியாக்களை சொல்லுவார் வடிவேலு. ஆனால் எல்லாத்தையும் சொதப்பிக் கொண்டே வருவார் சரத். ஒரு கட்டத்தில் ’இனி நான் ஐடியா சொல்லணும்ன்னா என் பிரைனுக்கு பெட்ரோல் போடணும்” என்று வடிவேலு சொல்ல அதற்கு முறைப்பார் சரத்குமார். ‘முறைக்காத வேலு உன் லவ்வுக்கு ஃபுல்லா நான் என் மூளைய தானே செலவு பண்றேன். உன் மூளை ஃப்ரெஷ்ஷா அப்படியே தானே இருக்கு’ என சிக்ஸர் அடிப்பார் வடிவேலு.

ஆறு, சில்லுன்னு ஒரு காதல், ஆதவன், வேல் ஆகியப் படங்களில் சூர்யாவோடு இணைந்து காமெடியில் அதகளம் செய்திருப்பார் வடிவேலு.

கிங், அருள், கந்தசாமி, மஜா ஆகியப் படங்களில் வடிவேலு - விக்ரம் காமெடி காட்சிகள் ரசிகர்களை வெகுவாக கவர்ந்தன.

அஜித் - வடிவேலு இருவரும் இணைந்து பல படங்களில் நடித்திருந்தாலும் ஆனந்த பூங்காற்றே, ராஜா ஆகியப் படங்களின் காமெடிகள் வெகுவாக ரசிகர்களை சிரிக்க வைத்தன.