இந்த விஷயம் தெரியுமா...? நடிகர் விக்ரம் குறித்து பலரும் அரியாத சுவாரஸ்ய தகவல்கள்..!

தமிழ் சினிமாவில் நடிப்பதற்கு என எந்த தியாகத்தையும் செய்யக்கூடிய நடிகர் என்றவுடன் ரசிகர்களின் நினைவுக்கு வரும் பெயர்களில் முக்கியமான ஒன்று விக்ரம்.

பொன்னியின் செல்வன் படத்தில் ஆதித்த கரிகாலன் கதாபாத்திரத்திற்கு உயிர் கொடுத்திருந்தார் நடிகர் விக்ரம். அதற்கு முன்னதாக சோழா டீ விளம்பரத்தில் மாடலான விக்ரம் சோழ மன்னனாக ஆரம்ப காலகட்டத்திலேயே நடித்துள்ளது குறிப்பிடத்தக்கது.

சினிமாவில் வெற்றிக்காக ஏறத்தாழ 15 ஆண்டுகள் காத்திருந்த விக்ரம் இந்த இடைவெளியில் கலாட்டா குடும்பம் உள்ளிட்ட ஒரு சில தொலைக்காட்சி தொடர்களிலும் தோன்றியுள்ளார் என்பது வெகு சில ரசிகர்களுக்கு மட்டுமே தெரிந்த தகவல்.

இதேபோல வெற்றிக்காக காத்துக்கொண்டிருந்த காலகட்டத்தில் தமிழ் சினிமாவில் பல்வேறு நடிகர்களுக்கு விக்ரம் டப்பிங் பேசியிருப்பார். அஜித்தின் முதல் திரைப்படமான அமராவதி, பாசமலர்கள் உள்ளிட்ட திரைப்படங்களில் நடிகர் அஜித்தின் குரலாக ஒலித்தது நடிகர் விக்ரமின் குரல்.

இதே போல நடிகர் பிரபு தேவா நடிப்பில் வெளியான காதலன், ராசையா, விஐபி என பல்வேறு திரைப்படங்களில் பிரபு தேவாவின் குரலாக ஒலித்தவர் நடிகர் விக்ரம். இன்று திரைப்படம் பார்க்கும்பொழுது காதலன் திரைப்படத்தில் பிரபுதேவா சொல்லும் 91,92, 93 போன்ற எண்களில் நடிகர் விக்ரமின் குரல் பளிச்சிடுவதை நம்மால் உணர முடியும்.

இதே போல தமிழ் சினிமாவின் சாக்லேட் பாய் அப்பாஸ் நடித்த காதல் தேசம், ஜாலி உள்ளிட்ட திரைப்படங்களில் அப்பாஸிற்கு நடிகர் விக்ரம் டப்பிங் பேசியுள்ளார். இதே போல 1998 ஆம் ஆண்டு ஹாலிவுட் வெளியான காந்தி திரைப்படத்தின் தமிழ் பதிப்பில் காந்தியாக ஒலித்ததும் நடிகர் விக்ரமின் குரல் தான்.

தமிழ், தெலுங்கு, மலையாளம் என பல்வேறு மொழிகளில் வெற்றிக்காக போராடிய நடிகர் விக்ரமிற்கு ஏறத்தாழ 10 ஆண்டுகளுக்கு பிறகே சேது படத்தின் மூலம் வெற்றி கிடைத்தது.

இந்த இடைவெளியில் விக்ரம் தமிழ் சினிமாவில்  ஏதோவொரு வகையில் தொடர்ந்து இயங்கிக் கொண்டே இருந்தது சினிமாவில் வெற்றி பெற வேண்டும் என நினைக்கும் ஒவ்வொருவருக்கான நம்பிக்கை.