Trisha Krishanan: விஜய்-அஜித்துடன் தலா 4 படங்களில் நடித்த த்ரிஷா... உங்களுக்குப் பிடித்தது எது?

இன்று தனது 39-வது பிறந்தநாளைக் கொண்டாடும் த்ரிஷா, தமிழ் சினிமாவின் முன்னணி நடிகர்களான விஜய், அஜித்துடன் தலா 4 படங்களில் நடித்துள்ளார். இந்த இருபெரும் நட்சத்திரங்களை வைத்துப் பார்த்தால், முதலில் த்ரிஷா நடித்தது விஜய்யுடன் கில்லி படத்தில் தான். சரி விஜய் அஜித்துடன் த்ரிஷா நடித்த 8 படங்களை இங்கே பட்டியலிடுகிறோம்.

ஒக்கடு படத்தின் ரீமேக்கான கில்லி படத்தை இயக்குநர் தரணி இயக்கியிருந்தார். கபடி வீரராக விஜய், பிரகாஷ் ராஜிடமிருந்து தப்பித்து அவரிடம் தஞ்சமடையும் தனலட்சுமியாக த்ரிஷா இருவருமே நடிப்பில் அசத்தியிருப்பார்கள். 2004, ஏப்ரல் 17-ம் தேதி வெளியான இப்படம் 8 கோடி பட்ஜெட்டில் எடுக்கப்பட்டு பாக்ஸ் ஆபிஸில் 50 கோடி வசூலித்தது. இன்றும் பலரின் ஃபேவரிட் படமாக இருக்கிறது கில்லி!

2005 பொங்கலை முன்னிட்டு அந்தாண்டு ஜனவரி 14-ம் தேதி வெளியானது விஜய் - த்ரிஷாவின் திருப்பாச்சி. பேரரசு இயக்கிய இந்தப் படம் அண்ணன் - தங்கை பாசத்தை மையப்படுத்தி எடுக்கப்பட்டது. சரத்குமாரின் ஐயா, தனுஷின் தேவதையைக் கண்டேன் ஆகியப் படங்களுடன் வெளியான திருப்பாச்சி, 112 திரையரங்குகளில் 100 நாட்களையும், தமிழ்நாட்டில் மொத்தமாக 200 நாட்களையும் நிறைவு செய்தது.

விஜய்யுடன் த்ரிஷா நடித்த முதல் படம் கில்லி மாபெரும் வெற்றி பெற்றது போல், அஜித்துடன் அவர் நடித்த முதல் படமான ஜி அமையவில்லை. லிங்குசாமி இயக்கிய இப்படம் 205, பிப்ரவரி 11-ல் வெளியானது. ஆனால் படம் எதிர்பார்த்த வெற்றியை தரவில்லை.

த்ரிஷாவும் - விஜய்யும் மூன்றாவது முறையாக திரையில் இணைந்த படம் தான் ஆதி. ரமணா இயக்கிய இப்படம் 2006 (ஜனவரி 15) பொங்கலுக்கு வெளியானது. ஆனால் விஜய் - த்ரிஷா கூட்டணியின் முந்தையப் படங்களான கில்லி, திருப்பாச்சியைப் போல இப்படம் வெற்றி பெறவில்லை.

இயக்குநர் ஏ.எல்.விஜய் இயக்கிய முதல் படம் கிரீடம். இதில் இரண்டாவது முறையாக அஜித்துடன் இணைந்தார் த்ரிஷா. 2007 ஜூலை 7-ம் தேதி இப்படம் வெளியானது. குடும்பம், ஆக்‌ஷன், காதல் என அனைத்தும் இருந்த இப்படம் நிறைய பாஸிட்டிவ் விமர்சனங்களைப் பெற்றது.

2008 கோடையை மையைப்படுத்தி மே 8-ம் தேதி வெளியானப் படம் குருவி. இந்தப் படத்திற்குப் பிறகு மீண்டும் விஜய் - த்ரிஷா இணையவே இல்லை. கில்லி படத்திற்குப் பிறகு மீண்டும் அதே நடிகர்களை வைத்து குருவியை இயக்கினார் தரணி. படம் வெளியாகி கலவையான விமர்சனக்களைப் பெற்றது.

வெங்கட் பிரபு இயக்கிய இப்படம் 2011, ஆகஸ்ட் 31-ம் தேதி வெளியானது. இன்று வரை அஜித்தின் திரை வாழ்க்கையில் முக்கிய இடம் பிடித்திருக்கும் இப்படத்தில் அவருக்கு ஜோடியாக த்ரிஷா நடித்திருப்பார். 24 கோடியில் தயாரான இப்படம் 100 கோடி வரை வசூலித்ததாகக் கூறப்படுகிறது.

அஜித்தும் த்ரிஷாவும் இணைந்த கடைசிப்படம் என்னை அறிந்தால். கெளதம் மேனன் இயக்கிய இப்படம் 2015, பிப்ரவரி 5-ல் வெளியானது. விவாகரத்துக்குப் பின் சிங்கிள் பேரண்டாய் த்ரிஷா, அவரை காதலிப்பவராக அஜித் இருவரும் நடிப்பில் அசத்தியிருப்பார்கள். 50 கோடியில் உருவான இப்படம் 100 கோடி வரை வசூலித்ததாம்.