இனி BMW ரைடுதான்... அஜித் பற்றவைத்த பைக் ஆசை.. டூ வீலர் லைசென்ஸ் வாங்கிய மஞ்சு வாரியர்!

துணிவு பட நடிகை மஞ்சு வாரியர் எர்ணாகுளம் காக்கநாடு ஆர்.டி.ஓ. அலுவலகத்துக்கு நேரில் சென்று அதிகாரி முன்னிலையில் பைக் ஓட்டி காண்பித்து ஓட்டுனர் உரிமத்தைபெற்றுள்ளார்.

நேர்க்கொண்ட பார்வை, வலிமை ஆகியப் படங்களுக்குப் பிறகு மீண்டும் அஜித், ஹெச்.வினோத், போனி கபூர் கூட்டணி துணிவு படத்தில் இணைந்துள்ளது. அஜித்தின் 61-வது படமான இதில் நடிகை மஞ்சு வாரியர் ஹீரோயினாக நடித்துள்ளார்.

பொங்கல் பண்டிகையை முன்னிட்டு இந்தப் படம் கடந்த 11-ம் தேதி அதிகாலை 1 மணி முதலே திரையரங்குகளில் வெளியாகியுள்ளது. மேலும் ஜிப்ரான் இசையில் வெளியான 3 பாடல்களும் ஹிட் அடித்தது.

இதில் அஜித்துடன் சமுத்திரகனி ஜான் கோக்கென், அஜய், தர்ஷன், சிபி சக்கரவர்த்தி, அமீர், பட்டிமன்ற பேச்சாளர் மோகன சுந்தரம், பால சரவணன், மகாநதி சங்கர் உள்ளிட்டவர்கள் நடித்துள்ளனர்.

ஆக்சன் ஃபார்முலாவில் உருவாகி இருக்கும் இந்த திரைப்படம் ரசிகர்கள் மத்தியில் பெரும் வரவேற்பு பெற்று இருக்கிறது. ஏற்கனவே படப்பிடிப்பு ஓய்வு நேரங்களில் 'பைக்' பயணம் மேற்கொள்ளும் அஜித்குமார் 'துணிவு' படப்பிடிப்பு சமயத்திலும் வட இந்தியாவில் பல பகுதிகளில் பைக்கில் சுற்றி வந்தார்.

இந்த 'பைக்' பயணத்தில் மஞ்சுவாரியரும் இணைந்தார். அஜித்குமாருடன் லடாக் பகுதியில் பைக் பயணம் செய்த புகைப்படங்களை மஞ்சுவாரியர் வலைத்தளத்தில் பகிர்ந்து மகிழ்ச்சி தெரிவித்து இருந்தார்.

இந்த நிலையில் மஞ்சுவாரியர் தற்போது பைக் ஓட்டுவதற்கான ஓட்டுனர் உரிமத்தை பெற்று இருக்கிறார். எர்ணாகுளம் காக்கநாடு ஆர்.டி.ஓ. அலுவலகத்துக்கு நேரில் சென்று அதிகாரி முன்னிலையில் பைக் ஓட்டி காண்பித்து ஓட்டுனர் உரிமத்தை அவர் பெற்று இருக்கிறார். அவர் ஓட்டுனர் உரிமம் வாங்கிய புகைப்படம் வலைத்தளத்தில் வெளியாகி வைரலாகிறது.