மாறுவேடத்தில் இருக்கும் இந்த முன்னாள் முதல்வர் யார் தெரிகிறதா?

ஆண் வேடத்தில் இந்தப் புகைப்படத்தில் இருப்பவர் தமிழகத்தின் முன்னாள் முதல்வர் . ஜெய்சங்கருடன் நிறைய படங்கள் நடித்துள்ளார். அதில் ஒன்று வைரம் திரைப்படம். சரியாக 48 வருடங்களுக்கு முன்னால், 1974 மே 24 ஆம் தேதி வைரம் வெளியானது.

டி.ஆர்.ராமண்ணா இயக்கத்தில், டி.ஆர்.பாப்பா இசையில் உருவான வைரம் இந்தி விக்டோரியா நம்பர் 203 படத்தின் தமிழ் ரீமேக்காகும். இந்திப் படம் 1972 இல் வெளியானது.

3 கோடி ரூபாய் மதிப்புள்ள கோல்கொண்டா வைரத்தை ஆர்.எஸ்.மனோகர் கடத்த திட்டமிடுகிறார். அதற்கு ஒரு ஆளை நியமிக்கிறார். அவனோ, வைரத்தை தான் சொந்தமாக்கிக் கொள்ள நினைக்கிறான். இதனை அறிந்து கொள்ளும் ஆர்.எஸ்..மனோகர். அவனை கொன்று வைரத்தை எடுத்துவர தனது அடியாள் ஸ்ரீகாந்த் தலைமையில் ஆள்களை அனுப்புகிறார். ஸ்ரீகாந்தின் கத்தி வீச்சில் அவன் படுகாயமடைகிறான். ஆனால், வைரத்தை அவர்களால் கைப்பற்ற முடியாமல் போகிறது.

காயமடைந்தவன், வைரம் இருக்கும் இடம் குறித்து ஒரு குறிப்பை எழுதிவிட்டு இறந்து போகிறான். அவன் காயம்பட்டு கிடந்தவேளை அவனை காப்பாற்ற நினைத்த முதியவரை, அவனை கொலை செய்ததாக தவறாக குற்றம் சுமத்தி சிறைக்கு அனுப்புகிறார்கள். அவரது மகள் ஜெயலலிதா ஆண் வேடம் அணிந்து தந்தை செய்து வந்த குதிரை வண்டி ஓட்டும் தொழிலை செய்ய ஆரம்பிக்கிறார். புகைப்படத்தில் ஆண் வேடத்தில் இருப்பது அவர்தான்.

ஆர்.எஸ்.மனோகரனின் ஊதாரியான மகன் ஜெய்சங்கர் அடிக்கடி ஜெயலலிதா ஆண் வேடம் இட்டு ஓட்டும் குதிரை வண்டியில் பயணம் செய்கிறார். இன்னொரு சந்தர்ப்பத்தில் ஜெயலலிதாவை அவரது உண்மையான தோற்றத்தில் பார்க்கும் ஜெய்சங்கர் அவர் மீது காதல் கொள்கிறார்.

இந்த கதையுடன் சிறையிலிருந்து வெளிவரும் காமெடி திருடர்கள் எம்.ஆர்ஆர்.வாசு, எஸ்.ஏ.அசோகன் இருவரும் சந்தர்ப்பவசத்தால் இணைந்து கொள்வார்கள். அவர்கள் கையில் வைரம் எங்கிருக்கிறது என்ற குறிப்பு இருக்கும் லாக்கரின் சாவி கிடைக்கும்.

இறுதியில் வைரத்தை ஜெய்சங்கர் கண்டுபிடிப்பார். வில்லன்கள் தண்டிக்கப்பட நல்லவர்கள் காப்பாற்றப்படுவார்கள். சின்ன வயதில் காணாமல் போன வாசுவின் மகன்தான் ஜெய்சங்கர் என்பது கிளைமாக்ஸ் ட்விஸ்டாக இருக்கும்.

ஜெய்சங்கர் இதுபோன்ற த்ரில்லர் கதைகளில் நிறைய நடித்துள்ளார். திருட்டு, வஞ்சகம், சண்டை, பழிவாங்குதல், கிளப் டான்ஸ் என்று படம் கிளுகிளுப்பாகப் போகும். இதிலும் வில்லனுடன் கூடவே இருக்கும் பெண் ஒருத்தி உண்டு. டவுசரைவிட சின்ன உடை கொடுத்திருப்பார்கள்.

தனது தந்தை சிறைக்குச் செல்ல காரணம் ஸ்ரீகாந்த் என்பதை அறிந்து கொள்ளும் ஜெயலலிதா, அவரை மாட்ட வைப்பதற்காக மழை நாளில் உடைகளை கிழித்துக் கொண்டு, தன்னை பாலியல் பலாத்காரம் செய்ய துரத்துவதாக ஸ்ரீகாந்த் வீட்டில் தஞ்சம் அடைவார். அங்கு குட்டையான உடை அணிந்து பாட்டுப்பாடி ஸ்ரீகாந்தை மயக்க முயல்வார். இன்றைய நாயகிகளே போடத் தயங்கும் அளவுக்கு உடை இருக்கும்.

அதேபோல், ஆண் வேடத்திலிருந்து அவர் பெண் வேடத்துக்கு மாறுவதை அசோகன் மறைந்திருந்துப் பார்க்கும் காட்சியையும் கிளுகிளுப்பாக படமாக்கியிருப்பார்கள். எம்ஜிஆர் படங்களில்கூட ஜெயலலிதா இந்தளவு இறங்கி நடித்ததில்லை.

படத்தின் நடுவில் வரும் தேங்காய் சீனிவாசன் காமெடி ஓரளவு சிரிக்க வைக்கும். ஹோட்டலில் சாப்பிட்டு பில்லுக்கு பணம் இல்லாமல், சாப்பாட்டில் கரப்பான்பூச்சி கிடக்குது என்று சலம்புகிற காமெடி முதலில் இந்தப் படத்தில்தான் இடம்பெற்றது. பிறகு பல படங்களில் அதனை மறுஉருவாக்கம் செய்தனர்.

ஜெயலலிதாவின் தங்கையாக மறைந்த நடிகை ஷோபனா நடித்திருந்தார். அப்போது அவர் சிறுமி. பாடல்கள் எதுவும் தேறாத ரகம். மெல்லிசை மன்னரின் இசையில் நாலு ஹிட் பாடல்கள் படத்தில் இருந்திருந்தால் வைரம் இன்னும் ஜொலித்திருக்கும்.