ராணுவத்தில் இணைந்த முதல் தமிழ் நடிகை.! குவியும் பாராட்டுக்கள்..

2021 ஆம் ஆண்டு வெளியான 'காதம்பரி' என்ற திரைப்படத்தின் மூலம் தமிழ் திரையுலகில் கதாநாயகியாக அறிமுகமானவர் அகிலா நாராயணன். இந்த படமானது இயக்குனர் அருள் இயக்கி,நாயகனாகவும் நடித்து வெளிவந்தது. அமெரிக்காவில் வாழும் தமிழ் வம்சாவளியை சேர்ந்த இவர் கலைத்துறை மீதுள்ள ஆர்வத்தினால் தனது சொந்த முயற்சியால் திரைத்துறையில் அறிமுகமானவர் என்பது குறிப்பிடத்தக்கது.

சமூக கருத்தை மையமாக கொண்டு திகில் படமாக வெளிவந்த 'காதம்பரி' படத்தில் கதாநாயகியாக மட்டுமல்லாமல் பாடகியாகவும் தன்னை திரையுலகில் அறிமுகப்படுத்திக்கொண்டார். இந்த படம் ரசிகர்கள் மத்தியில் ஓரளவு நல்ல வரவேற்பையும் பெற்றது.

சினிமாவில் ஒரு படத்தில் நடித்துவிட்டாலே அடுத்தடுத்து முன்னணி நடிகர்களுடன் நடிக்க வேண்டும் என்று ஆசைப்படும் பல நடிகைகளுக்கு மத்தியில் தற்போது அகிலா நாராயணன் தான் வாழும் நாட்டுக்கு சேவை செய்ய வேண்டும் என்பதற்காகவே அமெரிக்க ராணுவத்தில் இணைந்துள்ளார்.

இதற்காக பல மாதங்களாக அமெரிக்க இராணுவப் போர்ப் பயிற்சியை பெற்றுவந்த அகிலா நாராயணன் தற்போது வெற்றிகரமாக அமெரிக்க ராணுவ வீரர்களின் சட்ட ஆலோசகராக இணைந்துள்ளார். மேலும் தனது குடும்பத்தினரின் ஆதரவோடு அமெரிக்க ராணுவத்தில் வழக்கறிஞராக இணைந்துள்ள அகிலா நாராயணன் அமெரிக்க இராணுவத்திற்கு சேவை செய்வதை தனது கடமையாக கருதுகிறார்.

மேலும் ‘நைடிங்கேல் ஸ்கூல் ஆஃப் மியூசிக்’ என்ற ஆன்லைன் இசை பள்ளியை நடத்தி வரும் அகிலா மாணவர்களுக்கு இசைக் கலையை ஆன்லைன் மூலம் கற்றுக்கொடுக்கிறார்.

அமெரிக்க ராணுவத்தில் இணைந்த முதல் தமிழ் நடிகை என்ற பெயரையும் பெற்றுள்ளார் அகிலா நாராயணன். சினிமாவை விட்டுவிட்டு அமெரிக்க இராணுவத்தில் இணைந்த தமிழ் நடிகை அகிலாவின் புகைப்படங்கள் தான் தற்போது சோஷியல் மீடியாவில் வைரலாகி வருகிறது. இவரது இந்த சேவை மனப்பான்மைக்கு சமூக வலைதளங்களில் ரசிகர்கள் மற்றும் நெட்டிசன்கள் பாராட்டுக்கள் தெரிவித்து வருகின்றனர்.