நினைவுகள் 2022 : பெரும் சோகத்தை ஏற்படுத்திய திரையுலக பிரபலங்களின் மறைவுகள்

ஜனவரி 5: எம்.எஸ்.விஸ்வநாதன், இளையராஜா, தேவா, யுவன் ஷங்கர் ராஜா என பல இசையமைப்பாளர்கள் இசையில் பாடல் எழுதியுள்ள பிரபல பாடலாசிரியர் காமகோடியான் வயது மூப்பின் காரணமாக மரணமடைந்தார்.

பிப்ரவரி 7: மைக்கேல் மதன காமராஜன் படத்தில் பீம்பாய் என்ற வேடத்தில் நடித்த பிரவீன்குமார் சோப்தி தனது 74 வயதில் மாரடைப்பு ஏற்பட்டு மரணமடைந்தார்.

பிப்ரவரி 22: காதலுக்கு மரியாதை, கிரீடம் போன்ற தமிழ் படங்களில் நடித்த பிரபல மலையாள நடிகை கே.பி.ஏ.சி.லலிதா தனது 74 வயதில் கல்லீரல் பிரச்னை காரணமாக மரணமடைந்தார். இவர் தமிழில் தேவர் மகன் படத்தை இயக்கிய மலையாள இயக்குநர் பரதனின் மனைவி என்பது குறிப்பிடத்தக்கது.

ஏப்ரல் 8:  கண்ணம்மா, என் இதயராணி, பொம்மை நாய்கள், அதிர்ஷ்டம் போன்ற படங்களை இயக்கிய எஸ்.எஸ். பாபாவிக்ரம் தனது 80வது வயதில் வயது மூப்பு காரணமாக மரணமடைந்தார்.

ஏப்ரல் 23: பழம்பெரும் நடிகர் சக்கரவர்த்தி மாரடைப்பு காரணமாக மரணமடைந்தார்.

ஏப்ரல் 28: வேட்டைக்காரன் உள்ளிட்ட பல படங்களில் வில்லனாக மிரட்டிய சலீம் கவுஸ் தனது 70வது வயதில் உடல் நலக்குறைவு காரணமாக மரணமடைந்தார்.

ஏப்ரல் 29: நடிகை ரங்கம்மாள் பாட்டி (83) உடல் நலக்குறைவு காரணமாக மரணமடைந்தார்.

மே 22: தயாரிப்பாளர் ஏக்நாத் தனது 78வது வயதில் உடல்நலக்குறைவால் மரணமடைந்தார்.

மே 22: தமிழில் ஏ.ஆர்.ரஹ்மான் இசையில் மிஸ்டர் ரோமியோ படத்தின் தண்ணீரை காதலிக்கும் போன்ற பல பாடல்களைப் பாடிய சங்கீதா சஜித் சிறுநீரக பிரச்னை காரணமாக மரணமடைந்தார்.

ஜூன் 1: தமிழில் பல ஹிட் பாடல்கள் பாடியுள்ள பின்னணி பாடகர் கே.கே. என்ற கிருஷ்ணகுமார் தனது 53வது வயதில் இசை நிகழ்ச்சி ஒன்றில் பாடிக்கொண்டிருக்கும்போது மாரடைப்பு ஏற்பட்டு மரணமடைந்தார்.

ஜூன் 27: தமிழில் குணச்சித்திர வேடங்களில் நடித்து ரசிகர்கள் மனதில் இடம் பிடித்த 'பூ' ராமு மாரடைப்பால் மரணமடைந்தார்.

ஜுலை 11: அவன் - இவன் போன்ற பல படங்களில் குணச்சித்திர வேடங்களில் நடித்த ராமராஜ் உடல் நலக்குறைவால் மரணமடைந்தார்.

ஜூலை 15: பிரபல இயக்குநரும் நடிகருமான பிராதப் போத்தன் தனது 70வது வயதில் உடல்நலக்குறைவால் மரணமடைந்தார்.

ஜூலை 18: தமிழில் இளையராஜா இசையில் நண்டு படத்தில் பாடிய பாலிவுட் பாடகர் பூபிந்தர் சிங் 82 வயதில் கொரோனா தொற்று காரணமாக மரணமடைந்தார்.

செப்டம்பர் 2: புல்லினங்கால், சிம்டாங்காரன் போன்ற பல ஹிட் பாடல்களைப் பாடிய பின்னணி பாடகர் பம்பா பாக்யா 48 வது வயதில் மாரடைப்பால் மரணமடைந்தார்.

செப்டம்பர் 18: வாய்தா, துப்பறிவாளன் ஆகிய படங்களல் நடித்த தீபா என்ற பவுலின் 29 வயதில் காதல் தோல்வி காரணமாக தூக்கிட்டு தற்கொலை செய்துகொண்டார்.

செப்டம்பர் 26: அனிருத்தின் தாத்தாவும் இயக்குநருமான எஸ்.வி.ரமணன் 87வது வயதில் உடல்நலக்குறைவால் மரணமடைந்தார்.

நவம்பர் 15: தெலுங்கு சூப்பர் ஸ்டார் என ரசிகர்களால் கொண்டாடப்பட்டவரும் நடிகர் மகேஷ் பாபுவின் தந்தையுமான கிருஷ்ணா 80வது வயதில் உடல் நலக்குறைவால் மரணமடைந்தார்.

டிசம்பர் 1: அன்பே சிவம், பகவதி, உன்னை நினைத்து போன்ற பல படங்களை தயாரித்த லட்சுமி மூவி மேக்கர்ஸ் நிறுவனத்தின் தயாரிப்பாளர்களில் ஒருவரான முரளிதரன் உடல்நலக்குறைவால் மரணமடைந்தார்.

டிசம்பர் 3: வெண்ணிலா கபடி குழு திரைப்படப் புகழ் நடிகர் ஹரி வைரவன் 32 வயதில் உடல்நலக் குறைவால் உயிரிழந்தார்.

டிசம்பர் 24: மாயி, துள்ளாத மனமும் துள்ளும், வெண்ணிலா கபடி குழு, குள்ளநரி கூட்டம், மிளகாய், கட்டா குஸ்தி போன்ற படங்களில் நகைச்சுவை மற்றும் குணச்சித்திர வேடங்களில் நடித்துள்ள மாயி சுந்தர் தனது 50வது வயதில் மரணமடைந்தார்.