இதயத்தை சந்தோஷமா வச்சுக்கோங்க... தனக்கு ஹார்ட் அட்டாக் ஏற்பட்டதை அறிவித்த சுஷ்மிதா சென் - ரசிகர்கள் உருக்கம்

நடிகை சுஷ்மிதா சென் கடந்த 1994 ஆம் ஆண்டு மிஸ் யூனிவர்ஸ் பட்டம் வென்றார்.

தமிழ் மற்றும் தெலுங்கில் பிரம்மாண்டமாக தயாரான நாகர்ஜுனாவின் ரட்சகன் படத்தில் சுஷ்மிதா சென் ஹீரோயினாக நடித்து பிரபலமானார்.

இயக்குநர் ஷங்கரின் முதல்வன் படத்தில் இவர் நடனமாடிய ஷக்கலக்க பேபி பாடல் இன்றளவும் ரசிகர்களின் ஃபேவரைட்.

தொடர்ந்து ஹிந்தி மற்றும் பெங்காலி மொழி படங்களில் சுஷ்மிதா சென் நடித்துவந்தார்.

இவர் நடித்து டிஸ்னி பிளஸ் ஹாட்ஸ்டாரில் வெளியான ஆர்யா என்ற வெப் சீரிஸ் ரசிகர்களிடையே மிக பிரபலம்.

விரைவில் சுஷ்மிதா சென் நடிப்பில் ஆர்யா சீசன் 3 வெப் சீரிஸ் வெளியாகவிருக்கிறது.

இந்த நிலையில் நடிகை சுஷ்மிதா சென் தனக்கு ஹார்ட் அட்டாக் ஏற்பட்டுள்ளதாக தனது இன்ஸ்டாகிராம் பக்கத்தில் அதிர்ச்சி தகவலை பகிர்ந்துள்ளார்.

அவரது பதிவில் உங்கள் இதயத்தை மகிழ்ச்சியாகவும் தைரியமாகவும் வைத்துக்கொள்ளுங்கள். அது உங்களுக்கு தேவையானபோது உங்களுக்காக நிற்கும். இது என் அப்பா சொன்ன வார்த்தைகள்.

கடந்த சில நாட்களுக்கு முன் எனக்கு ஹார்ட் அட்டாக் ஏற்பட்டது. ஆஞ்சியோபிளாஸ்டி செய்து ஸ்டென்ட் வைக்கப்பட்டது. இதில் முக்கியமானது என்னவென்றால் எனது இதயம் மிகப் பெரியது என கார்டியாலஜிஸ்ட் தெரிவித்தார். சரியான தருணத்தில் உதவியவர்களுக்கு நன்றி.

நான் நலமுடன் இருக்கிறேன், மீண்டும் வாழத் தயாராக இருக்கிறேன் என்பதை என் நலம் விரும்பிகளுக்கும் என்னை நேசிப்பவர்களுக்கும் அறிவிப்பதற்காகவே இந்தப் பதிவு என்று குறிப்பிட்டுள்ளார்.