கைதியின் காதலியில் அண்ணன், தங்கையாக நடித்த நட்சத்திர தம்பதி!

நடிகர் எஸ்.எஸ்.ராஜேந்திரன் 1961 இல் அப்போதைய முன்னணி நடிகை சி.ஆர்.விஜயகுமாரியை காதலித்து திருமணம் செய்து கொண்டார். இவர்களைப் போன்ற நட்சத்திர ஜோடிகள் திருமணத்துக்குப் பிறகும் நடித்திருக்கிறார்கள். ஆனால், ஒரேயொரு வேற்றுமை உண்டு.

எஸ்.எஸ்.ஆரும், விஜயகுமாரியும் பல படங்களில் காதலன் காதலியாக நடித்திருக்கின்றனர். கணவன் மனைவியாக நடித்தப் படங்களும் உண்டு. முன்னாள் முதல்வர் மு.கருணாநிதியின் பூம்புகார், அவன் பித்தனா? போன்ற படங்களில் இவர்கள் ஜோடியாக நடித்துள்ளனர்.

எம்ஜிஆர் - ஜானகி, ஜெமினி கணேசன் - சாவித்ரி, ஏவிஎம் ராஜன் - புஷ்பலதா என ஏராளமான நட்சத்திர தம்பதிகள் திரைப்படங்களில் காதலன் - காதலியாகவும், கணவன் - மனைவியாகவும் நடித்திருக்கிறார்கள். ஆனால், இவர்களில் யாரும் அண்ணன் - தங்கையாக நடித்ததில்லை. அதிலும், திருமணம் செய்து கொண்டபின் அண்ணன் - தங்கையாக நடித்த ஒரே நட்சத்திர தம்பதி, எஸ்எஸ்.ஆர், விஜயகுமாரி ஜோடியாகத்தான் இருக்கும்.

இந்த நிகழ்வு நடந்தது 1963 இல். தயாரிப்பாளரும், இயகநருமான ஏ.கே.வேலன் கைதியின் காதலி என்ற படத்தை எழுதி, இயக்கி, தயாரித்தார். வேலன் தீவிர திமுக அனுதாபி. இந்தப் படமே அண்ணா மேடையில் பேசிக் கொண்டிருப்பதை கூட்டத்தில் அமர்ந்து நாயகன் பார்ப்பது போல்தான் ஆரம்பிக்கும். பின்னணியில், உதய சூரியன் வளமோடு வந்தான் என்ற பாடல் ஒலிக்கும்.

நாயகனின் அம்மா மரணப் படுக்கையில் இருப்பார். வைத்தியம் செய்ய நாயகனிடம் பணம் இருக்காது. பணம் சம்பாதித்துவர வெளியே செல்பவன், ஒரு சாமியார் செய்யும் திருட்டில் சம்பந்தமில்லாமல் மாட்டி சிறைக்குச் செல்வான். இங்கே அவனது அம்மா இறந்து போவாள். தற்கொலை செய்யப் போகும் தங்கையை ஒருவன் காப்பாற்றி விபச்சாரத்தில் தள்ள முயல, போலீஸ் அதிகாரி அவளை காப்பாற்றி மணந்து கொள்வார்.

சிறையிலிருந்து வரும் நாயகன் அம்மா, தங்கையை தேடி வருவான். இருவரும் இருக்க மாட்டார்கள். ஒரு நல்ல மனிதரின் உதவியால் வேலை கிடைக்கும். காதலிக்க ஒரு பெண்ணும் கிடைப்பாள். நாயகன் தொழிலாளர்களுக்காக பேசுவது அவனது முதலாளிக்குப் பிடிக்காது.

இந்த நேரம், அவனது காதலி காணாமல் போவாள். அவளைத் தேடிச் சென்று கண்டும் பிடிப்பான். ஆனால், அவளுக்கோ இவன் யார் என்றே தெரியாது. அந்த மர்மத்தை தேடும் போது, நாயகனின் காதலியும், அவளது தோற்றத்தில் இருக்கும் பெண்ணும் இரட்டை சகோதரிகள் என்பது தெரிய வரும். இதனிடையில் தனது தங்கையையும் நாயகன் கண்டுபிடிப்பான்.

இந்தப் படத்தில்  நாயகனாக எஸ்.எஸ்.ராஜேந்திரனும், அவரது காதலியாக எல்.விஜயலட்சுமியும் நடித்தனர். எஸ்.எஸ்.ராஜேந்திரனின் மனைவி விஜயகுமாரி அவரது தங்கை கண்ணமாவாக நடித்திருந்தார். கணவன், மனைவி அண்ணன், தங்கையாக நடித்த அதிசயத்தை கைதியின் காதலி படத்தில் ரசிகர்கள் பார்த்தார்கள்.

மு.கருணாநிதியின் பூம்புகார் திரைப்படத்தில் விஜயகுமாரி கண்ணகியாக நடித்தார். கண்ணகிக்கு சிலை வடிக்கும் போது விஜயகுமாரியைத்தான் மாடலாகக் கொண்டு சிலையை வடிவமைத்தனர். 1973 இல் எஸ்.எஸ்.ராஜேந்திரனும், விஜயகுமாரியும் பிரிந்தனர். இவர்களுக்கு ரவி என்ற மகன் உண்டு. நடிகர் விஜயகுமாரின் முதல் மனைவியின் மகளை ரவி திருமணம் செய்தார். பிறகு இருவரும் விவாகரத்து செய்து கொண்டனர்.

ரசிகர்களின் கனவுக்கன்னியாக திரையில் வலம் வந்த நடிகைகளில் பெரும்பாலானவர்களுக்கு சொந்த வாழ்க்கை கசப்பான அனுபவமாக இருக்கும். தலையில், நெஞ்சில், முதுகில் குத்து வாங்கியிருக்கிறேன் என்று சமீபத்திய பேட்டியொன்றில் விஜயகுமாரி சொன்னது, அவரது சொந்த வாழ்க்கை எத்தனை ஏமாற்றமாக இருந்தது என்பதை உணர்த்தும்.