பிரபல இணையதளம் வெளியிட்ட டாப் 10 திரை நட்சத்திரங்கள் - முதலிடத்தை பிடித்த தமிழக நடிகர்!

10. யாஷ் (கன்னடம்):  இந்தப் பட்டியலில் பத்தாவது இடத்தில் கன்னட நடிகர் யாஷ் உள்ளார். இந்த வருடம் வெளியான அவரது கேஜிஎஃப் - சேப்டர் 2 திரைப்படம் இந்திய அளவில் மிகப்பெரிய வசூலை பெற்றது. உலக அளவில் ஆயிரம் கோடிகளை இப்படம் தாண்டியது.

9. அல்லு அர்ஜுன் (தெலுங்கு): ஒன்பதாவது இடத்தில் புஷ்பா படத்தின் நாயகன் அல்லு அர்ஜுன் இடம் பிடித்துள்ளார். கடைசியாக அவரது நடிப்பில் வெளியான படம் புஷ்பா - தி ரைஸ் பார்ட் 1. 2021 டிசம்பரில் வெளியான இந்தப் படம் அவருக்கு பெரும் புகழை ஈட்டித் தந்தது.

8. ஜுனியர் என்டிஆர் (தெலுங்கு): தெலுங்கு நடிகர் ஜுனியர் என்டிஆர் எட்டாவது இடத்தைப் பிடித்துள்ளார். ராஜமௌலி இயக்கத்தில் அவர் நடித்த ஆர்ஆர்ஆர் திரைப்படம் இந்த இடத்தைப் பெற்றுத் தந்துள்ளது.

7. கியாரா அத்வானி (இந்தி): பூல் புலையா 2 படம் உள்பட இரு படங்கள் கியாரா அத்வானியின் நடிப்பில் இந்த வருடம் வெளியாகி வெற்றி பெற்றன. கரண் ஜோஹரின் காபி வித் கரண் நிகழ்ச்சியில் கியாரா அத்வானி கலந்து கொண்டு பதிலளித்தவிதம் அவரது பிரபலத்தை இன்னும் அதிகப்படுத்தி ஏழாவது இடத்தைப் பெற்றுத் தந்துள்ளது.

6. ஹிர்த்திக் ரோஷன் (இந்தி): ஹிர்த்திக் ரோஷன் நடிப்பில் ஒரேயொரு படம், விக்ரம் வேதா மட்டுமே இந்த வருடம் வெளியானது. படம் நல்ல விமர்சனத்தைப் பெற்றாலும் வசூல் பெறவில்லை. எனினும், ஹிர்த்திக் தனது ரசிகர்களையும், பிரபலத்தையும் தக்க வைத்துக் கொண்டுள்ளார் என்கிறார்கள். நம்புவோம்.

5. சமந்தா (தெலுங்கு, தமிழ்): சமந்தா நடிப்பில் இந்த வருடம் தமிழ்ப் படம் காத்து வாக்குல ரெண்டு காதலும், தெலுங்குப் படம் யசோதாவும் வெளியாகின. இரண்டுமே சுமார்தான். அதைவிட 2021 டிசம்பர் இறுதியில் வெளியான புஷ்பாவில் இடம்பெற்ற, ஊ சொல்றியா மாமா பாடலுக்கு சமந்தாவின் ஆட்டம் இந்த வருடத்திலும் சூடு குறையாமல் உள்ளது.

4. ராம் சரண் (தெலுங்கு): ராஜமௌலியின் ஆர்ஆர்ஆர் என்ற ஒரே படம் ராம் சரணை இந்தியாவின் அத்தனை மொழிகளிலும் பிரபலப்படுத்தியது. அவருக்கு நான்காவது இடத்தைத் தந்திருக்கிறார்கள்.

3. ஐஸ்வர்யா ராய் பச்சான் (இந்தி, தமிழ்): ஆச்சரியமாக ஐஸ்வர்யா ராய்க்கு மூன்றாவது இடம் தந்திருக்கிறார்கள். செய்திகளில் ஒருபோதும் அடிபடாத இவர் மணிரத்னத்தின் பொன்னியின் செல்வனில் நடித்தது மட்டுமே இந்த வருடத்தின் ஒரே சம்பவம். அதுதான் இந்த வருட இவரது பிரபலத்துக்கு காரணம் என்கிறார்கள்.

2. அலியாபட் (இந்தி): கங்குபாய் கத்யவாடி, டார்லிங்ஸ், பிரமாஸ்திரா என்று ஒருபுறம் வெற்றிப் படங்கள், ரன்பீர் கபூரை மணந்து, குழந்தை பெற்றுக் கொண்டது என சொந்த வாழ்க்கையில் பல சாதனைகள் என அலியாபட்டுக்கு இது மறக்க முடியாத வருடம். இரண்டாமிடத்துக்கு சரியான தேர்வு.

1. தனுஷ் (தமிழ்): தனுஷின் முதல் ஹாலிவுட் படம் தி க்ரே மேன் வெளியாகி அவரை உலகம் முழுவதும் பிரபலப்படுத்தியது. மாறன் காலைவாரினாலும் திருச்சிற்றம்பலம் ஓடி பாக்ஸ் ஆபிஸில் ஜெயித்தது. நானே வருவேன் பெயர் வாங்கித் தந்தது. வருடம் முழுக்க தனுஷைப் பற்றி செய்திகள் வந்து கொண்டிருந்ததால் முதலிடத்தை அவருக்கு தந்திருக்கிறார்கள்.