கமலுடன் இருக்கும் இந்த நடிகர் யார் தெரிகிறதா?

சட்டையில்லாமல் நிற்கும் கமலுடன் இருக்கும் இந்த அழகான பெண்மணி பெண்ணல்ல, ஒரு பிரபல நடிகர். அவர் யார் என்று தெரிகிறதா?

எழுபதுகளின் ஆரம்பத்தில் கமல் வளர்ந்துவரும் நடிகர். சில படங்களில் நாயகனாகவும், சிலவற்றில் இரண்டாவது நாயகனாகவும், சில படங்களில் குணச்சித்திர வேடங்களிலும் நடித்து வந்தார்.

1975 இல் அவரது நடிப்பில் 10 படங்கள் வெளியானது. அந்தரங்கம், அபூர்வராகங்கள், ஆயிரத்தில் ஒருத்தி, சினிமா பைத்தியம், தேன் சிந்துதே வானம், பட்டிக்காட்டு ராஜா, பட்டாம்பூச்சி, மாலை சூட வா, மேல்நாட்டு மருமகள் மற்றும் தங்கத்திலே வைரம்.

இதில் தங்கத்திலே வைரம் படத்தில் சிவகுமார் நாயகன். கமல் இரண்டாவது நாயகன். கதைப்படி இருவரும் அண்ணன், தம்பிகள். மேடையில் மேற்கத்திய இசை விருந்து அளிப்பவர்கள். அண்ணன் சிறந்த பாடகர் என்றால், தம்பி சிறந்த நடனக் கலைஞர்.

அண்ணன் சிவகுமாருக்கு தனது மகள் மனோரமாவை திருமணம் செய்து வைக்க, அவர்களின் தந்தை தேங்காய் சீனிவாசனிடம் விகே ராமசாமி கேட்பார். தேங்காய் சீனிவாசனின் தங்கை மகள் தான் மனோரமா. இந்தப் பந்தம் மனோரமாவின் அம்மா, விகே ராமசாமியின் மனைவி இறந்த போது செய்து கொண்ட ஒப்பந்தம்.

அதற்கு தேங்காய் சீனிவாசன் உடன்பட மாட்டார். ஒரே வீட்டைச் சேர்ந்த அக்கா, தங்கையைதான் என் மகன்களுக்கு திருமணம் செய்து வைப்பேன், அப்போதுதான் குடும்பம் பிரியாது என்பார். உன் மகன்ளை பிரிக்கிறேனா இல்லையா பார் என்று விகே ராமசாமி மனதிற்குள்ளேயே சபதம் செய்து கொள்வார்.

இந்தக் கதையைவிட படத்தின் நாயகிகள் ஜெயசித்ரா, ஸ்ரீப்ரியாவின் கதை சுவாரஸியமானது. இரண்டு பேரும் எதிரெதிர் வீட்டில் வசிக்கிறவர்கள். சரியான ஏட்டிக்குப் போட்டி. ஒருவர் ஒரு முழம் பூ வாங்கினால் மற்றவர் இரண்டு முழம் வாங்குவார். இந்த போட்டி இறுதியில் பாடகர்களான அண்ணன், தம்பியை பாராட்டுவதில் வந்து முடியும்.

ஜெயச்சித்திரா அண்ணன் சிவகுமாரை பாராட்ட, ஸ்ரீப்ரியா தம்பி கமலை பாராட்ட, இதை காதல் என்று நினைத்து கல்யாணம்வரை இரண்டு சகோதரர்களும் உருட்டிக் கொண்டு வந்துவிடுவார்கள்.

விகே ராமசாமியின் கைங்கர்யத்தால் அண்ணன், தம்பிக்குள் பிரிவு ஏற்படும். ஆனால், பழி இருவரின் மனைவிகள் (ஜெயச்சித்திரா, ஸ்ரீப்ரியா) மீது விழும். சண்டைக்கோழிகளான அவர்கள் இருவரும் சமாதானமாகி தங்கள் கணவர்களுக்குள் ஏற்பட்ட பிரிவை நேர்செய்ய முயற்சிப்பார்கள். ஆனால், முடியாது. அவர்களின் பள்ளியறை பிளாக்மெயிலும் பிசுபிசுத்துப் போகும். இறுதியில் தேங்காய் சீனிவாசன் போடும் ட்ராமாவால் ஒருவழியாக அண்ணன், தம்பி ஒன்றிணைய சுபம்.

இந்தப் படத்தில் சிவகுமாரும், கமலும் இணைந்து சில பாடல்களில் ஆடியிருந்தனர். அவர்கள் நடத்தும் கச்சேரியின் தொடர்ச்சியாக இந்தப் பாடல்கள் வரும். ஒரு பாடலில் கமலுடன் அவர்கள் ட்ரூப்பில் இருக்கும் மனோரமா ஆடுவார்.

பாடலின் நடுவில் பெண் வேஷம் போட்டு சிவகுமார் கமலுடன் ஆடுவார். அந்தக் காட்சிதான் நீங்கள் முதலில் பார்த்தது. கமலுடன் பெண் வேடத்தில் இருப்பது நடிகர் சிவகுமார்.

இந்தப் படம் குறித்து நினைவுகூர்ந்த சிவகுமார், 'அப்போது நான் நாயகனாக நடித்து வந்தேன். கமல் வளர்ந்து வரும் நாயகன். கமல் சிறந்த டான்சர் என்பதால் அவரை மட்டும் ஆட வைப்பது என்றுதான் இயக்குனர் முடிவு செய்திருந்தார். ஆனால், டான்ஸ் மாஸ்டர் நானும் ஆடினால் நன்றாக இருக்கும் என்றார். அண்ணனுக்கு என்ன ஸ்டெப் வருமோ அதுவே எனக்கும் வைங்க என்று கமல் எனக்காக தன்னுடைய நடனத் திறமையை குறைத்துக் கொண்டார்' என கூறியுள்ளார்.

ஜாலியான பொழுதுப்போக்கு திரைப்படத்தை விரும்புகிறவர்களை என்டர்டெயின் செய்யும் பலம் தங்கத்திலே வைரம் படத்துக்கு இப்போதும் உள்ளது. நேரம் இருப்பவர்கள் முயன்றுப் பார்க்கலாம்.

தங்கத்திலே வைரம் திரைப்படம்.