டைமிங் காமெடி.. நடிப்பில் அப்டேட்.. 'எதிர்நீச்சல்' நாயகன் சிவகார்த்திகேயன் பிறந்தநாள் இன்று!

சின்னத்திரையில் 'கலக்கப்போவது யாரு' நிகழ்ச்சியின் ‘முதல் டைட்டில் வின்னர்’ ஆனதில் தொடங்கியது இவரது பயணம். 2012ஆம் ஆண்டு இயக்குநர் பாண்டிராஜ் இயக்கிய 'மெரினா' திரைப்படத்தின் மூலம் நாயகனாக வெள்ளித்திரைக்குள் காலடி எடுத்து வைத்தார். அப்போது முதல் இவரின் சின்ன சின்ன குறும்புகளும், சுளுக்கி சிரிக்க வைக்கும் நகைச்சுவையும் மனம் கொத்தி பறவையாய் தமிழக திரை ரசிகர்களை கொத்திச் சென்றது.

தன் இயல்பான நடிப்பாலும், யதார்த்த பேச்சினாலும் மக்கள் மனதில் விரைவாக இடம்பிடித்தார் சிவகார்த்திகேயன். ரசிகர்கள் மட்டுமல்லாமல் முன்னணி கதாநாயகர்களின் மனதிலும் இடம் பிடித்தார் இந்த மனம் கொத்தி நாயகன்.

திரை ரசிகர்களின் தளபதி விஜய் ஒரு மேடையில் ‘குழந்தைகளுக்கு பிடித்த ஹீரோ சிவகார்த்திகேயன்’ என சொன்னது வைரல் ஆனது. தனுஷோடு " மூணு" திரைப்படத்தில் ஆரம்பித்த நட்பு சிவகார்த்திகேயனை வெள்ளி திரையில் எதிர் நீச்சல் போட ஆயுத்தமாக்கியது.

தமிழக இளைஞர்களின் கனவு கன்னிகள் இந்த கதாநாயகனின் நாயகிகள் ஆனார்கள். நயன்தாரா முதல் ஹன்சிகா வரை சிவகார்த்திகேயனின் கெமிஸ்ட்ரி நன்றாகவே அமைந்தது. சாமானிய மனிதனின் கனவொன்று சரித்திரம் ஆகியது.

‘மான் கராத்தே’ பீட்டரும்.., ‘காக்கிச்சட்டை’ மதிமாறனும். ‘ரஜினி முருகனின்’ ரஜினி முருகனும் ரசிகர்களிடம் கூடு விட்டு கூடு பாய்ந்தனர். சிவ கார்த்திகேயனின் ‘வருத்தப்படாத வாலிபர் சங்கம்’ தமிழக பட்டிதொட்டியெங்கும் கிளை பரப்பியது....

வெள்ளித்திரையில் தடம் பதித்த சில வருடங்களிலேயே தயாரிப்பாளர்களின் மோஸ்ட் வாண்டேட் ஹீரோ ஆனதோடு குழந்தைகளின் மனம் கவர்ந்த டான் ஆகவும் அவதாரம் எடுத்தார் சிவகார்த்திகேயன். 'ரெமோ' திரைப்படத்தில் பெண் வேடமிட்டு நடித்து குழந்தைகளுக்கு பிடித்தமான நடிகர் பட்டியலில் முதல் இடம் பிடித்தார்.

‘டாக்டர்’ திரைப்படத்தில் தன் வழக்கமான டைமிங் காமடிகளை தவிர்த்து நடிப்பில் மெருகெறிய சிவகார்த்திகேயனை ‘மாவீரன்’ சிவகார்த்திகேயனாக பார்க்க காத்துக்கொண்டிருக்கிறது அவரது ரசிகர் படை.