சென்சார் தடை செய்த சிவாஜி படமும், எம்ஜிஆர் கலந்து கொண்ட கடைசி விழாவும்

1984 ஆம் ஆண்டு ஆகஸ்ட் 28 ஆம் தேதி ஜல்லிக்கட்டு திரைப்படம் வெளியானது. சிவாஜி - சத்யராஜ் இணைந்து நடித்த இந்தப் படத்தை மணிவண்ணன் இயக்கினார். ராதா நாயகி.

எழுபது மற்றும் எண்பதுகளில் வெளிவந்த 'பி' கிரேட் ஆக்ஷன் படங்களை அடியொற்றி எழுதப்பட்ட கதை. வில்லன்கள் குடும்பத்தை வேட்டையாட, அநாதையாகும் நாயகன் அவர்களை பழிவாங்குவான் அல்லவா. அதே நமத்துப்போன பட்டாசுதான் ஜல்லிக்கட்டு. நாயகன் பழிவாங்க வில்லன்களால் பாதிக்கப்பட்டவர் உதவி செய்வார். அந்த உதவி செய்யும் நபர் நாயகனை சிறையில் அடைத்த நீதிபதி என்ற ஜிகினா பேப்பர் ஜல்லிக்கட்டு ஒரேயடியாக நமத்துப்போகாமல் பாதுகாத்தது.

சத்யராஜ் மொட்டைத் தலையுடன் என்ட்ரி கொடுக்கும் அறிமுகக் காட்சியே அமர்க்களமாக இருக்கும். சொந்த அண்ணனையும், அவரது குடும்பத்தையும் கொலை செய்ததாக குற்றச்சாட்டு. போலி சாட்சியங்கள் பலமாக இருப்பதால் நீதிபதியான சிவாஜி சத்யராஜுக்கு கடுங்காவல் தண்டனை தருவார்.

பிறகு தான் ரிட்டையர்ட் ஆகும் போது, தனித்தீவில் இருக்கும் தனது பங்களாவில் சத்யராஜை வேலைக்காரனாக வைத்துக் கொள்ள அனுமதியும் பெறுவார்.

அந்தத் தனித்தீவுக்கு படகில் போகலாம். அதைவிட்டால் ஹெலிகாப்டரில்தான் போக முடியும். சத்யராஜ் அங்கிருந்து எப்படியாவது தப்பிக்க நினைப்பார். ஆனால், ஜட்ஜ் விடமாட்டார்.. ஒருகட்டத்தில் இருவருக்கும் இடையே ஒரு பந்தம் உருவாகும். தனது அண்ணனையும், குடும்பத்தையும் கொன்றவர்கள்தான் நீதிபதியின் பேத்தியையும் கற்பழித்து கொன்றவர்கள் என்பதை சத்யராஜ் அறிந்து கொள்வார். சிவாஜி போட்டுத் தரும் திட்டத்தின்படி வில்லன்கள் ஒவ்வொருவரையாக சத்யராஜ் தீர்த்துக் கட்ட, சத்யராஜுக்காக சிவாஜி வாதாடி விடுதலை பெற்றுத் தருவார்.

ஆகஸ்ட் 28 படத்தை வெளியிடுவது என முடிவு செய்து சென்சாருக்கு படத்தை அனுப்பினால் படத்துக்கு சான்றிதழ் தர முடியாது என்று சென்சார் அதிகாரிகள் கைவிரித்துவிட்டனர். சட்டத்தை காப்பாற்ற வேண்டிய நீதியதியே எப்படி குற்றவாளியை தப்பிக்க வைக்கலாம். இது மோசமான முன்னுதாரணமாகும் என்று படத்தை தடை செய்துவிட்டனர்.

முழுப்படமும் எடுத்து, விநியோகஸ்தர்களிடம் அட்வான்சும் வாங்கிய பின் இப்படியொரு தடங்கல். தயாரிப்பாளர் சித்ரா லட்சுமணனும் மற்றவர்களும் கலந்து பேசி, சத்யராஜும், சிவாஜியும் நீதிபதி முன்னால் சரணடைவது போல் ஒரு காட்சியை எடுத்து இறுதியில் இணைத்தனர். எப்படியோ, குற்றவாளிகள் சிறைக்குச் சென்றால் சரி என சென்சார் போர்டும் தணிக்கைச் சான்றிதழ் அளிக்க, படம் அறிவித்த தேதியில் திரைக்கு வந்தது.

மொத்த படத்தையும் அனுமதிக்க மாட்டோம் என்று சொன்ன சென்சாரை, வெறும் ஐம்பது வினாடி காட்சிகளை இணைத்து, சரிகட்டி சான்றிதழ் பெற்றது அசாதாரணமான நிகழ்வு. ஜல்லிக்கட்டில் இளையராஜா இசையில் அனைத்துப் பாடல்களையும் கங்கை அமரன் எழுதியிருந்தார். ஏரியில் ஒரு ஓடம்..., ஏய் ராஜா..., காதல் கிளியே காதல் கிளியே... ஆகிய பாடல்கள் நல்ல வரவேற்பை பெற்றன.

சத்யராஜ் கொலை செய்யும் போது மாறுபட்ட வேடங்களில் வருவார். நம்பியாரை கொலை செய்யும் போது கடலோர கவிதைகள் சின்னப்பதாஸ் கெட்டப்பில் வருவார். அந்தப் படத்தில் இடம்பெற்ற, கத்திச் சண்டைப் போடமலே பாடலையும் இதில் பயன்படுத்தியிருந்தனர்.

நம்பியாருடன் மலேசியா வாசுதேவன், தயாரிப்பாளர் சித்ரா லட்சுமணன் ஆகியோரும் வில்லன்களாக நடித்திருந்தனர். துணை வில்லனாக பிரதாப் போத்தன்.

படத்தில் ஹெலிகாப்டர் இடம்பெறும் காட்சிகள் பல உண்டு. அப்போதெல்லாம் ஹெலிகாப்டர் இடம்பெற்றால் அது பெரிய பட்ஜெட் சண்டைப் படம். ஜல்லிக்கட்டு வெளியாகி நல்ல வரவேற்பை பெற்றது.

இதன் 100 வது நாள் வெற்றிவிழாவில் அப்போதைய முதலமைச்சர் எம்ஜிஆர் கலந்து கொண்டு ஷீல்டுகள் வழங்கினார். 1984 டிசம்பர் 24 அவர் மறைவதற்கு முன் அவர் கலந்து கொண்ட கடைசி நிகழ்ச்சி இதுவாகும்.